ҚАЙТА ТАЪМИРЛАНГАН 33-СОНЛИ МАКТАБГАЧА ТАЪЛИМ ТАШКИЛОТИ БИНОСИ ФОЙДАЛАНИШГА ТОПШИРИЛДИ

Амударё туманининг Арнабўйи маҳалласидаги 33-сонли мактабгача таълим ташкилоти биноси қайта таъмирланиб, фойдаланишга топширилди.

12 декабрь куни шу муносабат билан ўтказилган тадбирда туман прокурори ёрдамчиси Зоиджон Худойберганов, туман ҳокимлигининг Болаларни ҳимоя қилиш шўъбаси раҳбари Жаҳонгир Холмуродов, Мактабгача таълим бўлими бошлиғи ўринбосари Абдурашид Насриллаев ҳамда фуқаролар йиғини масъуллари иштирок этдилар.

Замонавий кўринишга келтирилган ташкилот биноси остонасида алвон рангли ленталар кесилгач, йиғилганлар ўйин майдончалари ва машғулот хоналари, ошхона ва ётоқхоналарда яратилган шарт-шароитлар билан яқиндан танишдилар.

Таъкидланганидек, Халқ депутатлари туман Кенгашининг 2022 йил 21 апрелдаги тегишли қарори ҳамда Амударё тумани ҳокимининг 2022 йил 27 апрелдаги “Маблағ ажратиш тўғрисида”ги фармойиши ижросини таъминлаш мақсадида “Openbudjet.uz” электрон дастурида кўп овоз тўплаган Арна бўйи маҳалласи ҳудудидаги 33-сонли мактабгача таълим ташкилоти биносида жорий таъмирлаш ишлари олиб борилди. Бинодаги 299 млн. сўмлик қурилиш ишлари “Урганч Муроджон сервис” масъулияти чекланган жамияти томонидан бажарилиб, қайта таъмирланди.

Ушбу мактабгача таълим ташкилотига 120 нафар бола қамраб олинган бўлиб, эндиликда уларга замонавий кўринишдаги, барча шарт-шароитлар яратилган, янгидан жиҳозланган бинода таълим-тарбия бериш имконияти яратилди. Ташкилотнинг чиройли, кенг ва кўркам хоналари, мусиқа залларининг деворлари кичкинтойларга мос чиройли расмлар билан безатилди.

Шу ўринда айтиш жоизки, жорий йилда инвестиция дастури асосида Тўлқин овули ҳудудидаги 39-сонли мактабгача таълим ташкилоти ҳамда Юқори қишлоқ маҳалласи ҳудудидаги 28-сонли мактабгача таълим ташкилоти филиали биноларида реконструкция қилиш ишлари олиб борилмоқда. Шунингдек, Обод қишлоқ дастури асосида Тўлқин овули ҳудудидаги 24-сонли мактабгача таълим ташкилоти биносида мукаммал таъмирлаш ишлари олиб борилиб, фойдаланишга топширилди.

Бундан ташқари тумандаги 5 та, яъни 8-, 18-, 33-, 44-, 47-сонли мактабгача таълим ташкилотларида жорий таъмирлаш ишлари амалга оширилди. Йил давомида мактабгача таълим тизимига тадбиркорларни жалб қилган ҳолда 11 та оилавий нодавлат мактабгача таълим ташкилотлари ташкил қилинди. Йил якунига қадар инвестиция дастури ҳисобидан Юқори қишлоқ маҳалласида реконструкция қилинаётган 28-сонли мактабгача таълим ташкилоти филиалига 120 нафар, Чойкўл овули ҳудудидаги 1 та, Ойбек номли маҳалласидаги 1 та, жами 2 та оилавий нодавлат мактабгача таълим ташкилотига 75 нафар болаларни қамраб олиш режалаштирилган бўлиб, муассасалардаги болалар сонини 12 минг 144 нафар, яъни мактабгача таълим ёшидаги болаларнинг 72,1 фоизга етказиш режалаштирилган.

Тадбирга ташриф буюрган масъуллар қайта таъмирланган 33-сонли мактабгача таълим ташкилоти биносида кичкинтойлар учун уларни мактаб таълимига тайёрлаш, интеллектуал салоҳиятини юксалтириш, ҳар жиҳатдан етук ва баркамол вояга етишлари учун зарур бўлган барча шароитлар яратилганининг гувоҳи бўлдилар.

Эндиликда замонавий махсус мебеллар, янги тўшаклар билан жиҳозланган ётоқхоналар, хавфсиз қаттиқ ва юмшоқ ўйинчоқлар, бино олдидаги ёзги ўйин майдончалари, кўркам ва файзли ошхона болажонларнинг доимий хизматида бўлади.

Келажак эгалари учун яратилган ушбу қулайликлар нафақат кичкинтойларни, балки тадбирга ташриф буюрган масъуллар, қолаверса, Арнабўйи маҳалласининг бутун аҳолисини жуда қувонтирди.

Озода Худойберганова.