18-sonli maktabda tarix-huquq,tarbiya fanlari oyligi doirasida tadbir boʻlib oʻtdi

7-dekabr kuni Amudaryo tumanidagi 18-sonli umumtaʼlim maktabida dekabr − tarix-huquq, tarbiya fanlari oyligi doirasida Oʻzbekiston Respublikasi Konstitutsiyasining qabul qilinganligiga 30-yil toʻlishi munosabati bilan “30 yoshing muborak, Konstitutsiyam!” nomli tadbir oʻtkazildi.

Tadbirda maktabning 1-sinfdan 10-sinfiga qadar barcha sinflarining faol va aʼlochi  oʻquvchilari ishtirok etishdi.

Tadbirni maktab direktori Surayyo Eshbayeva ochib berdi va Bosh qomusimizning 30 yilligi bilan barchani muborakbod etdi. Shuningdek, tadbirni tashkillashtirgan fan oʻqituvchilari Shoxista Norimova hamda Gulixat Xoʻjaniyozovalarga minnatdorlik bildirib, oʻquvchilarni fan oyligi doirasida oʻtkaziladigan boshqa tadbirlarda ham faol ishtirok etishga chaqirdi.

Tadbirda maktabning jajji 1-sinf oʻquvchilari ijrosida “Yayra, Oʻzbekiston!” qoʻshigʻiga raqs namoyish etildi. 6-sinf oʻquvchilari Bosh Qomusimizdagi inson huquq va manfaatlarini kafolatlovchi moddalarni hayotiy misollar orqali oʻqib eshittirishdi. 5-sinf oʻquvchilari esa Konstitutsiyamizga atalgan sheʼrlardan namunalar yod olib, ishtirokchilarga oʻqib eshittirdilar.

Tadbirda maktabning 7-, 8- va 10-sinf oʻquvchilari ham faol ishtirok etishdi. 10-sinf oʻqiuvchilari tomonidan tayyorlangan sahna koʻrinishi, 7-sinf oʻquvchilari ijrosidagi doira raqsi yigʻilganlarga yuqori kayfiyat baxsh etdi.

Mustaqillik yillarida mamlakatimiz xalqlarining konstitutsiyaviy haq-huquqarini taʼminlash maqsadida qabul qilingan muhim huquqiy hujjatlar, Oʻzbekiston Respublikasi Konstitutsiyasi har bir moddasining xalqimiz hayotidagi amaliy ifodasini oʻzida mujassam etgan suratli lavhalar, mustaqillik davri tarixi, taraqqiyot bosqichlari xususidagi rasmlar, turli xil tarixiy jarayonlar va davlatimizning odilona siyosatini aks ettiruvchi shiorlar bilan bezatilgan maktab sahnasi tadbir ishtirokchilari qalbida Konstitutsiyamizning xalqchilligi, tariximizning teran ildizlariga hurmat va ehtirom tuygʻusini uygʻotdi.

Bu kabi tadbirlar oʻquvchilarning bilim saviyasini oshiribgina qolmasdan, Bosh Qomusimizga boʻlgan mehr va ishonchining yanada mustahkamlanishiga ham xizmat qiladi.

Har bir yosh avlod kelajakda oʻzining haq-huquqlarini, majburiyat va burchlarini anglashiga hamda ularga rioya etishida maktab paytlarida olgan bilimlari poydevor boʻlib xizmat qiladi. 18-sonli umumtaʼlim maktabida boʻlib oʻtgan tadbirda 1-sinfdan tortib 10-sinf oʻquvchilarigacha qamrab olingani, tadbirning har bir qismida ularning faol ishtiroki yoshlarning Konstitutsiyaga oid bilimlarini oshirish bilan birga ularning huquqiy ongining yuksalishiga ham xizmat qildi.

Bu esa maktabdagi sogʻlom taʼlim va tarbiya muhiti, bilimli va tajribali oʻqituvchilarning berayotgan bilimlari sabab oʻquvchilar ilm-fan sirlarini puxta oʻzlashtirib, isteʼdodlarini yuzaga chiqarishga doimo harakat qilishlaridan dalolat beradi.

Tarix-huquq, tarbiya fanlari oyligi doirasida oʻquvchilarni oʻz haquqlarini chuqur anglashlari, maʼnaviy dunyosini boyitishga xizmat qiluvchi bu kabi tadbirlar davom etadi.

18-sonli maktab oʻqituvchisi Sh.Norimova.