18-сонли мактабда тарих-ҳуқуқ,тарбия фанлари ойлиги доирасида тадбир бўлиб ўтди

7 декабрь куни Амударё туманидаги 18-сонли умумтаълим мактабида декабр − тарих-ҳуқуқ, тарбия фанлари ойлиги доирасида Ўзбекистон Республикаси Конституциясининг қабул қилинганлигига 30 йил тўлиши муносабати билан “30 ёшинг муборак, Конституциям!” номли тадбир ўтказилди.

Тадбирда мактабнинг 1-синфдан 10-синфига қадар барча синфларининг фаол ва аълочи  ўқувчилари иштирок этишди.

Тадбирни мактаб директори Сурайё Эшбаева очиб берди ва Бош қомусимизнинг 30 йиллиги билан барчани муборакбод этди. Шунингдек, тадбирни ташкиллаштирган фан ўқитувчилари Шохиста Норимова ҳамда Гулихат Хўжаниёзоваларга миннатдорлик билдириб, ўқувчиларни фан ойлиги доирасида ўтказиладиган бошқа тадбирларда ҳам фаол иштирок этишга чақирди.

Тадбирда мактабнинг жажжи 1-синф ўқувчилари ижросида “Яйра, Ўзбекистон!” қўшиғига рақс намойиш этилди. 6-синф ўқувчилари Бош Қомусимиздаги инсон ҳуқуқ ва манфаатларини кафолатловчи моддаларни ҳаётий мисоллар орқали ўқиб эшиттиришди. 5-синф ўқувчилари эса Конституциямизга аталган шеърлардан намуналар ёд олиб, иштирокчиларга ўқиб эшиттирдилар.

Тадбирда мактабнинг 7-, 8- ва 10-синф ўқувчилари ҳам фаол иштирок этишди. 10-синф ўқиувчилари томонидан тайёрланган саҳна кўриниши, 7-синф ўқувчилари ижросидаги доира рақси йиғилганларга юқори кайфият бахш этди.

Мустақиллик йилларида мамлакатимиз халқларининг конституциявий ҳақ-ҳуқуқарини таъминлаш мақсадида қабул қилинган муҳим ҳуқуқий ҳужжатлар, Ўзбекистон Республикаси Конституцияси ҳар бир моддасининг халқимиз ҳаётидаги амалий ифодасини ўзида мужассам этган суратли лавҳалар, мустақиллик даври тарихи, тараққиёт босқичлари хусусидаги расмлар, турли хил тарихий жараёнлар ва давлатимизнинг одилона сиёсатини акс эттирувчи шиорлар билан безатилган мактаб саҳнаси тадбир иштирокчилари қалбида Конституциямизнинг халқчиллиги, тарихимизнинг теран илдизларига ҳурмат ва эҳтиром туйғусини уйғотди.

Бу каби тадбирлар ўқувчиларнинг билим савиясини оширибгина қолмасдан, Бош Қомусимизга бўлган меҳр ва ишончининг янада мустаҳкамланишига ҳам хизмат қилади.

Ҳар бир ёш авлод келажакда ўзининг ҳақ-ҳуқуқларини, мажбурият ва бурчларини англашига ҳамда уларга риоя этишида мактаб пайтларида олган билимлари пойдевор бўлиб хизмат қилади. 18-сонли умумтаълим мактабида бўлиб ўтган тадбирда 1-синфдан тортиб 10-синф ўқувчиларигача қамраб олингани, тадбирнинг ҳар бир қисмида уларнинг фаол иштироки ёшларнинг Конституцияга оид билимларини ошириш билан бирга уларнинг ҳуқуқий онгининг юксалишига ҳам хизмат қилди.

Бу эса мактабдаги соғлом таълим ва тарбия муҳити, билимли ва тажрибали ўқитувчиларнинг бераётган билимлари сабаб ўқувчилар илм-фан сирларини пухта ўзлаштириб, истеъдодларини юзага чиқаришга доимо ҳаракат қилишларидан далолат беради.

Тарих-ҳуқуқ, тарбия фанлари ойлиги доирасида ўқувчиларни ўз ҳақуқларини чуқур англашлари, маънавий дунёсини бойитишга хизмат қилувчи бу каби тадбирлар давом этади.

18-сонли мактаб ўқитувчиси Ш.Норимова.