“MENING OILAM” GAZETASI TAHRIRIYaTINING GRANT LOYIHASI DOIRASIDA “KITOBLAR KARVONI” TADBIRI TAShKIL ETILDI

“Mening oilam” gazetasi tahririyatining Oliy majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan “Besh muhim tashabbus – yoshlarga qanot” grant loyihasi doirasida hududlarda turli tadbirlar tashkil etilmoqda.

Shu yil 1-dekabr kuni Qilichboy ovulidagi 83-sonli maktabda loyiha doirasida nogironligi boʻlgan yoshlar maʼnaviyatini yuksaltirish, ular oʻrtasida kitobxonlikni keng targʻib qilish maqsadida hududda yashovchi yoshlar uchun “Kitoblar karvoni” tadbiri oʻtkazildi. Ushbu tadbirda “Taraqqiyot koʻzgusi” gazetasi masʼul kotibi, jurnalist Ozoda Xudoyberganova, “Jayxun ilhomlari” nodavlat notijorat tashkiloti raisi Oʻrozali Reyimovlar hamda maktab direktori Dilafruz Ismoilova, maʼnaviyat-maʼrifat masalalari boʻyicha direktor oʻrinbosari Anorgul Xolimbetova hamda oʻqituvchilar, oʻquvchilar ishtirok etishdi.

Tadbirda jurnalist O.Xudoyberganova hamda “Jayxun ilhomlari” nodavlat notijorat tashkiloti raisi Oʻ.Reyimovlar dastlab yoshlarni kitobxonlikka jalb etish, ijodkor yoshlarni qoʻllab-quvvatlash, ularning ijod namunalarini yoritish borasida olib borilayotgan ishlar, tashkilot qoshidagi 5 ming donaga yaqin kitoblar fondiga ega boʻlgan kutubxona, shuningdek, tahririyat tomonidan turli loyihalar doirasida tashkil etilayotgan maʼnaviy-maʼrifiy tadbirlar xususida maʼlumotlar berib oʻtdilar. Shuningdek, koʻrgazmaga qoʻyilgan “Jayxun ilhomlari” nodavlat notijorat tashkiloti qoshidagi kutubxonaga tegishli boʻlgan 100 tadan ziyod kitoblar bilan tanishtirdilar. Yoshlar shu joyning oʻzida kutubxonaga aʼzolikka qabul qilinib, oʻzlariga yoqqan kitoblarni tanlab oldilar.

Ovul yoshlariga  hududda tashkil etilgan “Kitoblar karvoni” tadbiri juda manzur boʻldi va ular kitobxonlikka boʻlgan qiziqishlari, mehri yanada ortganligini minnatdorchiliklari, mamnuniyatlari bilan ifoda etdilar.

M.Shomurodov.