FAOLIYaTNING OChIQLIGI - TARAQQIYoT KAFOLATI

Oʻzbekiston Respublikasi Konstitutsiyasining 2-moddasida "Davlat xalq irodasini ifoda etib, uning manfaatlariga xizmat qiladi. Davlat organlari va mansabdor shaxslar jamiyat va fuqarolar oldida masʼuldirlar” deb belgilab qoʻyilgan.

Joriy yilning 2-may kuni Oʻzbekiston Respublikasining "Davlat hokimiyati va boshqaruv organlari faoliyatining ochiqligi toʻgʻrisida”gi Qonunining kuchga kirishi davlatimizning xalq irodasini ifoda etishidagi yana bir zalvorli qadam boʻldi. Boisi, ushbu qonun xalqimizning davlat boshqaruvi organlari faoliyati toʻgʻrisidagi axborotdan doimiy ravishda xabardor boʻlish imkoniyatini amalda taʼminlaydi.

Mazkur qonun fuqarolarning davlat boshqaruvi organlari faoliyati haqidagi axborotga boʻlgan konstitutsiyaviy huquqlarini amalga oshirish mexanizmlarini takomillashtirish, ular faoliyatining ochiqligini, shaffofligini taʼminlash, shuningdek, davlat hokimiyati va boshqaruvi organlari hamda ular mansabdor shaxslarining qabul qilinayotgan qarorlar uchun masʼuliyatini oshirish maqsadida ishlab chiqilgan.

Qonunda asosiy vazifalar, davlat hokimiyati va boshqaruvi organlari faoliyati ochiqligining asosiy printsiplarining belgilanib qoʻyilishi, shuningdek, axborotdan foydalanuvchi soʻroviga binoan eʼlon qilinishi va taqdim etilishi mumkin boʻlgan axborot roʻyxatining alohida "Davlat hokimiyati va boshqaruvi organlarining faoliyati toʻgʻrisidagi axborot” moddasi bilan tasdiqlanishi, oʻz navbatida, mazkur sohadagi axborot xavfsizligini taʼminlaydi.

Davlat hokimiyati va boshqaruvi organlarining faoliyati toʻgʻrisidagi axborotdan foydalanuvchilarning huquqlari alohida koʻrsatilgan boʻlib, jumladan, ularning murojaati asosida davlat hokimiyati va boshqaruvi organlarining faoliyati toʻgʻrisidagi ishonchli axborotni olish va tarqatish huquqlari belgilangan. Qonunda davlat hokimiyati va boshqaruvi organlari rahbarlarining davlat hokimiyati va boshqaruvi organlari faoliyatining ochiqligini taʼminlash sohasidagi vakolatlari, ularning huquq va majburiyatlari aniq taʼriflangan.

Bundan tashqari, davlat hokimiyati va boshqaruvi organlari faoliyatini OAVda yoritishga masʼul axborot xizmatining majburiyatlari koʻrsatilgan boʻlib, davlat hokimiyati va boshqaruvi organlarining rasmiy veb-saytida ularning faoliyati toʻgʻrisidagi axborotni joylashtirish va yangilab borish vazifalari ham yuklangan.

Mazkur Qonun ijrosini taʼminlash hamda tuman hokimligi va tumandagi mahalliy ijroiya organlari faoliyatining oshkoraligini taʼminlash, keng jamoatchilik va aholini tumanda amalga oshirilayotgan iqtisodiy va ijtimoiy islohotlarning borishi toʻgʻrisida muntazam xabardor qilish maqsadida shu yilning 11-noyabr kuni tuman hokimining "Tuman hokimligi va uning tarkibiy boʻlinmalari faoliyatining ochiqligi va oshkoraligini taʼminlash borasida qoʻshimcha chora-tadbirlar toʻgʻrisida”gi 460-sonli qarori qabul qilindi va mazkur qaror bilan tuman hokimligining axborot xizmati tashkil qilindi.

Tuman hokimligining Axborot xizmati toʻgʻrisida nizom tasdiqlanib, shu asosda amaliy ishlar boshlandi.

Oʻylaymizki, yangi tashkil qilingan axborot xizmati tumanimizda davlat hokimiyati va boshqaruvi organlari faoliyatining ochiqligini taʼminlashda muhim vosita boʻladi.

Akbar XOʻJAMUROTOV,

tuman hokimligining axborot xizmati rahbari.