ZARNIGORANING ORZULARI

Badiiy gimnastika sportning ayol-qizlar shugʻullanadigan eng nafis turi hisoblanadi. Oʻz farzandining nafosatli, qomati chiroyli, shu bilan birga sogʻlom boʻlishini istagan ota-onalar qizlarining yoshlikdan sportning aynan shu turi bilan shugʻullanishlariga imkoniyat yaratishadi.

Doʻstlik mahallasidagi tuman Sport maktabi filialida yosh sportchilar uchun kurash, dzyudo, stol tennisi kabi sport turlari qatori badiiy gimnastika guruhi ham tashkil etilgan. Yosh murabbiy Shahodat Rajabova mashgʻulotlarda 50 nafarga yaqin qizlarga  tasma, koptok, xalqa, argʻamchi kabi buyumlar bilan mashqlar bajarishni, gimnastrada yoʻnalishi harakatlarini oʻrgatib kelmoqda.

Shahodatning shogirdlaridan biri Zarnigora Qadamboyeva badiiy gimnastika sport turi bilan ikki yildan buyon shugʻullanib kelmoqda. U tumanda va respublika miqyosida boʻlib oʻtgan turli musobaqalarda faol qatnashib, gʻoliblikni qoʻlga kiritishga erishmoqda. Tengdoshlari orasida oʻzining epchilligi, chaqqonligi, kirishimliligi bilan ajralib turadigan, odobi bilan oʻrnak ham boʻlib kelayotgan yosh sportchi qiz Zarnigora Qadamboyeva 64-sonli maktabning 5-sinfida oʻqiydi. U maktabda ham eng aʼlochi oʻquvchilar qatorida.

Nafis harakatlarni oʻziga singdirgan sportning ushbu turi oilada yakka qiz boʻlgan Zarnigorani hali juda kichikligidan oʻziga rom qilgan edi. Gimnastikachilarga xos harakatlar, mashqlar bajarishini, qoʻliga tushib qolgan tasmalarni chiroyli shaklga keltirib aylantirishini koʻrgan onasi Naimaxon Rajabova ham, dadasi Muzaffar Jumaniyozov ham buni qizaloqlarga xos boʻlgan shunchaki oʻtib ketadigan havas deb qarashdi. Ammo Zarnigoraning qiziqishi aslo soʻnmadi. Maktabning boshlangʻich sinfini tugatganidan keyin esa tuman Sport maktabi filialidagi oʻzi sevgan badiiy gimnastika guruhi mashgʻulotlariga kelib shugʻullana boshladi. Qiziqishi, intilishi kuchli boʻlgan Zarnigora mashgʻulotlarga tezda moslashib ketdi. Tanasi egiluvchan, harakatlari nafis va epchil boʻlgan qizaloqni murabbiy dastlab tuman miqyosidagi musobaqalarga olib chiqdi. Keyinchalik u  turli viloyatlarda oʻtkazilgan ochiq birinchilik chempionatlarida ham qatnashib, gʻoliblikni qoʻlga kiritdi.

Yutuqlardan ruhlangan Zarnigora shu yil 6-martda Toshkent shahrida oʻtkazilgan Respublika ochiq birinchiligi musobaqalarida ham 1-oʻrin sohibasi boʻlib, murabbiyi va ota-onasini quvontirdi.

Yosh sportchi qizning badiiy gimnastika boʻyicha trener boʻlish va jahon arenalarida yurtimiz sharafini munosib himoya qilib, Oʻzbekiston bayrogʻini koʻklarga koʻtarishdek ulkan orzulari bor. Orzu va maqsad, albatta, ulkan marralar sari yoʻl boshlaydi. Umid qilamizki, iqtidorli gimnastikachi Zarnigora ham shunday ezgu niyatlari ortidan borib, Oʻzbekiston gimnastikasini dunyoga tanitadi.

Ozoda Xudoyberganova.