1-SONLI MAKTABDA “ONA TILIM – SARChAShMANGDAN SARXUSh DILIM” DEB NOMLANGAN ADABIY KEChA OʻTKAZILDI

Oktyabr oyi umumtaʼlim maktablarida ona tili va adabiyot fani oyligi deb belgilangani munosabati bilan Amudaryo tumanidagi oʻquv maskanlarida oʻquvchilarni fanga yanada qiziqtirish, bilim va koʻnikmalarini oshirishga qaratilgan tadbirlar, uchrashuv va adabiy kechalar, ochiq oʻquv mashgʻulotlari tashkil etilmoqda. Oylik doirasida barcha taʼlim dargohlaridagi kabi 1-sonli maktabda oʻtkazilayotgan tadbirlar ham oʻquvchilarning fanni yanada mukammalroq oʻzlashtirishlarida, faolliklarini oshirishda muhim ahamiyatga ega boʻlmoqda.

Maktabda boʻlib oʻtayotgan fan oyligi doirasida “Ona tilim – sarchashmangdan sarxush dilim” deb nomlangan adabiy-badiiy kecha tashkil etildi. Maktab oʻqituvchi va oʻquvchilari tomonidan tashkil etilgan ushbu kechaga tumandagi davlat xavfsizlik xizmati chegara qoʻshinlariga qarashli harbiy qism xizmatchilari ham tashrif buyurishdi.

Kechani maktabning ona tili va adabiyot fani oʻqituvchisi Sanobar Murodova ochib berdi. U oʻtgan yildan beri til bayrami sifatida nishonlanayotgan ushbu kun bilan barchani muborakbod etib, mamlakatimizda davlat tilini rivojlantirish boʻyicha amalga oshirilayotgan ishlar haqida soʻzladi.

Oylik doirasida maktabda oʻtkazilgan “Kitobni sevaman” mavzusidagi davra suhbati, diktantlar tanlovi, “Soʻz mulkining sultoni” mavzusidagi ijodiy bayon musobaqasi, “Ona tilim – iftixorim” mavzusidagi insholar tanlovi, “Jadid adabiyoti namoyandalari” mavzusidagi kitobxonlik kechasi, ochiq oʻquv mashgʻulotlarini oʻtkazishda fan oʻqituvchilarining ishtiroki, oʻquvchilarning faolliklari xususida ham gapirib oʻtdi.

Kecha davomida soʻzga chiqqanlar til har bir millatning oʻziga xos timsoli, xalqning ruhini va maʼnaviyatini belgilovchi vosita ekanligini taʼkidlashdi. Shuning uchun uni asrab-avaylash, sofligini saqlash va rivojlantirishni har bir fuqaro oʻziga burch deb bilishi lozimligini, Navoiy va Mashrab, Bobur va Muqimiy kabi daholar uning vositasida oʻzlarining ulugʻvor asarlarini yaratganligi, maʼrifatni keng targʻib qilganini eʼtirof etishdi.

Undan tashqari, oʻzbek tilining taraqqiy etishida shoirlar bilan bir qatorda shoiralarning ham oʻrni beqiyosligi tilga olinib, Jahon otin Uvaysiy, Nodirabegim, Mohlaroyim, Dilshodi Barno, Anvar otin Mahzuna, Zebunisobegim kabi oʻtkir qalam sohibalarining nomlari esga olindi va ijodlariga toʻxtalib oʻtildi.

Shundan soʻng, Nodirabegim saroyida millatimizning atoqli shoiralari ishtirokida boʻlib oʻtgan mushoira maktabning 9-sinf oʻquvchilari ijrosida sahna koʻrinishda namoyish etildi. Ular dastlab oʻzbek tilining rivojlanish bosqichlari, bu ezgu ishga hissa qoʻshgan atoqli shoiralarning hayoti va ijodi haqida maʼlumotlar berishdi. Adabiyot ixlosmandlari shoiralarning gʻazallar, sheʼrlarini yoddan aytishdi va oʻz ijrolari bilan tomoshabinlar koʻz oʻngida yurt tarixini gavdalantirib, tomoshabinlarda katta taassurotlar qoldirishdi.

Tadbir davomida maktabning 7-sinf oʻquvchilari ona tilimizni madh etuvchi sheʼrlarini ifodali yod aytib, olqishlarga sazovor boʻlishdi. Shuningdek, 5-sinf oʻquvchilari esa tilga doir hikmatli soʻzlarni talqin etib, kechaga fayz kiritishdi. Undan tashqari, Oʻzbekiston Republikasining Davlat tili haqidagi Qonuni va boshqa tegishli hujjatlar toʻgʻrisida 8-sinf oʻquvchilari tomonidan berilgan maʼlumotlar bilimlarni yanada boyitib, mustahkamladi.

Maroqli oʻtgan tadbir oʻquvchilar va boshqa ishtirokchilarning ona tiliga boʻlgan qiziqishlarini, qalbidagi mehri, faxru-iftixor tuygʻularini yanada oshirdi.

O.Xudoyberganova.