TUMANDAGI NAShRIYoTDA TAYYoRLANGAN “UMMONDAN TERILGAN MARJONLAR” TOʻPLAMINING TAQDIMOTI OʻTKAZILDI

“Taraqqiyot koʻzgusi” gazetasi tahririyati ijodiy jamoasi tashabbusi bilan tashkil etilgan “Jayxun ilhomlari” nodavlat notijorat tashkiloti tumanimizdagi ijodkor yoshlarni qoʻllab-quvvatlab, ularning qobiliyatlarini rivojlantirishga xizmat qilib kelmoqda.

Tashkilot 2021-yilning sentyabrida Oʻzbekiston Respublikasi Oliy Majlisi huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat fondi taʼsis etgan grant tanlovlarida “Yoshlar – Yangi Oʻzbekiston bunyodkorlari” loyihasi bilan qatnashib, gʻolib boʻldi va loyiha 2022-yilning 31-avgustigacha muvaffaqiyatli amalga oshirildi.

Loyiha doirasida taʼlim muassasasalarida, ovul, mahallalarda uchrashuv, davra suhbatlari oʻtkazilib, yoshlarni giyohvandlik, axloqsizlik va yot gʻoyalardan himoya qilishga alohida eʼtibor qaratildi, oʻquvchi yoshlarning boʻsh vaqtlarini mazmunli oʻtkazish maqsadida insholar tanlovlari oʻtkazilib, gʻoliblar ragʻbatlantirildi. Eng mazmunli va ravon  yozilgan insholar tuman matbuotida yoritildi. Amudaryo televideniyesida mavzuga doir koʻpgina koʻrsatuvlar efirga berildi.

Loyiha ish rejasiga muvofiq tumanimizning isteʼdodli yosh qalamkashlarini elga tanitish, ularga ijodiy ruh, ragʻbat bagʻishlash maqsadida tumanimiz maktablarida taʼlim-tarbiya olayotgan 84 nafar oʻquvchilarning ijod namunalari joy olgan “Ummondan berilgan marjonlar” toʻplami nashr etildi.

10-oktyabr kuni 55-sonli maktabda ijodiy-madaniy ishlar boʻyicha maktab targʻibotchisi, Qoraqalpogʻistonda xizmat koʻrsatgan madaniyat xodimi, “Barkamol avlod” bolalar maktabi direktori Xonimjon Rajabova, “Jayxun ilhomlari” nodavlat notijorat tashkiloti raisi Oʻrozali Reyimovlar tashabbusi bilan ushbu kitob taqdimoti oʻtkazildi.

Tadbirda maktab oʻqituvchilari, oʻquvchilari ishtirok etdilar. Kitob taqdimoti aynan shu maktabda oʻtkazilgani bejiz emas. Sababi, mazkur maktab oʻquvchilari Jasmina Bekimbetova, Marjona Dehqonovalarning sheʼrlari ham toʻplamdan joy olgan.

Tadbirda bu haqda batafsil soʻz  yuritildi. Marjona Dehqonova, Jasmina Bekimbetovalarni ustozlari, doʻstlari qizgʻin tabriklab, yangidan-yangi ijodiy muvaffaqiyatlar tiladilar. Jasmina va Marjona samimiy tilaklardan, tengdoshlarining havas bilan boqishlaridan koʻngillari quvonchga toʻldi.

- Bu sizlarning ijod yoʻlidagi ilk muvaffaqiyatingiz. Hali oʻqib, oʻrganib, salohiyatli qizlar boʻlib kamolga yetishingizga, mashaqqatlaridan choʻchimay sermahsul ijod qilishingizga ishonaman, - dedi ularga Xonimjon Rajabova.

Mamlakatimizda yoshlarning chuqur ilm olishlariga, qobiliyatlarini namoyon etishlariga sharoit yaratilayotganligi ularning olgʻa intilishlariga ragʻbat boʻlmoqda.

“Ummondan terilgan marjonlar” toʻplamida ijod namunalari yoritilgan tumanimizning yosh ijodkorlari kelajagida ham buning isbotini koʻrishimizga shubha yoʻq. Toʻplamga koʻpsonli  adabiyot ixlosmandlarining mashqlari saralab olingani ramzi sifatida “Ummondan terilgan marjonlar” deya nomlangani ham bejiz emas.

Toʻplam taqdimoti tadbir ishtirokchilarida ulkan taassurotlar qoldirdi.

Oygul RAJABOVA.