Tumandagi “qizil” toifaga kiritilgan ovul va mahallalarni “yashil” toifaga oʻtkazishga bagʻishlangan oʻquv-seminari oʻtkazildi

Mamlakatimizda huquqbuzarliklarning oldini olish, fuqarolar uchun xavfsiz va osoyishta muhit yaratish davlat siyosatining ustuvor yoʻnalishlaridan biriga aylangan. Bu borada Prezident farmon va qarorlari asosida mahallalarda amalga oshirilayotgan tizimli islohotlar profilaktika ishlarini yangi bosqichga olib chiqmoqda. Jumladan, mahallalarda xavfsiz muhitni yaratishning tashkiliy-profilaktik asoslari mahalla faollari, huquqni muhofaza qiluvchi organlar va aholining hamjihatligini taʼminlash, jinoyatchilikni keskin kamaytirishga xizmat qilmoqda.

Shu maqsadda yaqinda Amudaryo tumani Ichki ishlar boʻlimi majlislar zalida yigʻilish boʻlib oʻtdi. Unda Oʻzbekiston Respublikasi Ichki ishlar vazirligi Akademiyasi katta oʻqituvchisi, podpolkovnik Iskandar Baydadayev, Qoraqalpogʻiston Respublikasi Ichki ishlar vazirligi Huquqbuzarliklar profilaktikasi boshqarmasi katta inspektori, kapitan Paraxat Kaipov hamda tuman IIB boshligʻi podpolkovnik Muxammedali Xojamuratov ishtirok etdi. Yigʻilish doirasida tumanning Beshtom, Bosuv, Gulzor, Doʻstlik va Navoiy mahallalarining “yettilik” aʼzolari ishtirokida oʻquv seminari tashkil etildi.

Seminarda Prezidentning 2025-yil 3-yanvar kungi “2025-yilda respublika mahallalarida xavfsiz muhitni yaratish va huquqbuzarliklarning barvaqt oldini olish tizimi samaradorligini yanada oshirish boʻyicha chora-tadbirlar toʻgʻrisida”gi Qarorining mazmun-mohiyati keng tushuntirildi. Mazkur qaror mahallalarda jamoat tartibi va xavfsizlikni taʼminlash, huquqbuzarliklarning oldini olish, fuqarolarning tinch va osoyishta hayot kechirishini taʼminlashga qaratilgan.

Qarorning asosiy maqsadlari — mahallalarda xavfsiz muhitni yaratish, jinoyatchilik va huquqbuzarliklarning oldini olish, tegishli idoralar oʻrtasida hamkorlikni mustahkamlashdir. Shu munosabat bilan mahalla raisi, profilaktika inspektori, yoshlar yetakchisi hamda xotin-qizlar faolining oʻzaro muvofiqlashgan faoliyati taʼminlanishi lozimligi taʼkidlandi. Shuningdek, jinoyatchilikka moyil guruhlarni aniqlash va ular bilan maqsadli ish olib borishga alohida eʼtibor qaratiladi.

Qarorda raqamli texnologiyalar va tahlil vositalari orqali nazoratni kuchaytirish, yaʼni yagona elektron maʼlumotlar bazasi asosida tezkor va samarali chora koʻrish tizimini shakllantirish ham ustuvor yoʻnalishlardan biri sifatida belgilab qoʻyilgan. Har bir mahallada fuqarolarning ijtimoiy holati, muammolari va xavf darajalari aniqlanib, shunga qarab profilaktik ishlar samarali tashkil etiladi. Qaror ijrosida har bir mutasaddi shaxsning aniq vazifalari belgilab berilgan.

Shuningdek, qaror doirasida mahallalarga videokuzatuv kameralari oʻrnatish, profilaktika ishlarini moliyalashtirish hamda zarur texnik taʼminot bilan taʼminlash belgilangan. Bunda mahallalardagi muammolarni hal etishda aholining faol ishtirokini taʼminlashga eʼtibor qaratiladi.

Mazkur qaror ijrosi natijasida jamoat tartibini buzish holatlari kamayishi, fuqarolarning huquq va manfaatlari yanada samarali himoya qilinishini taʼminlash, yoshlar oʻrtasida jinoyatchilik, giyohvandlik va boshqa salbiy holatlarning oldi olinishi kutilmoqda. Yigʻilish davomida Respublika miqyosida mahallalarni jinoyatdan xoli hududga aylantirish boʻyicha amalga oshirilayotgan samarali ishlar haqida ham atroflicha maʼlumotlar berildi. Har bir mahalla uchun alohida namunaviy “yoʻl xaritalari” ishlab chiqilgani va ularning ijrosi nazoratga olingani taʼkidlandi. Bu orqali jinoyatchilikning sezilarli darajada kamayishiga erishilayotgani qayd etildi.

Yigʻilish soʻngida ishtirokchilar oʻzlarini qiziqtirgan savollarga mutaxassislardan batafsil javoblar oldilar. Shuningdek, Amudaryo tumani IIB boshligʻi, podpolkovnik Muxammedali Xojamuratov tomonidan joriy yilning birinchi choragi yakuni boʻyicha tumanda jinoyatchilik salmogʻi oʻtgan yilga nisbatan 44 tadan 38 taga, yaʼni 13,64 foizga kamaygani qayd etildi. Bu koʻrsatkichga erishishda tumanda barcha idora va tashkilotlar hamda mahalla “yettilik”lari hamjihatlikda ish olib borgani, aholi oʻrtasida targʻibot-tashviqot ishlari toʻgʻri yoʻlga qoʻyilgani muhim ahamiyat kasb etgani alohida taʼkidlandi.

Amudaryo tumanida ushbu qaror ijrosini taʼminlash yuzasidan amalga oshirilayotgan ishlar, mutasaddi idora va mahalla yettiliklarining oʻzaro hamkorligi, aholi bilan muloqot va targʻibot ishlari jinoyatchilik darajasini kamaytirishda oʻz samarasini bermoqda.

Shohzod Qurbonboyev.