“SAYAMED” KOʻZ KLINIKASI SAMARALI FAOLIYaT YuRITMOQDA

Oʻzbekiston Respublikasi Prezidentining “Sogʻliqni saqlash sohasida xususiy sektorni yanada rivojlantirish chora-tadbirlari toʻgʻrisida”gi Qarori xususiy sektorning sogʻliqni saqlash sohasida faoliyat yuritishi uchun yanada qulay sharoitlar yaratdi.

Qaror asosida xususiy tibbiyot muassasalarining faoliyat yuritishiga, moddiy-texnik bazasining mustahkamlanishiga, koʻrsatilayotgan xizmatlar sifatini, hajmini koʻpaytirishga imkoniyatlar yaratilmoqda. Natijada xususiy tibbiyot muassasalari rivoji uchun keng yoʻl ochilib, tibbiyot taraqqiyoti etgan mamlakatlarda foydalanilayotgan ilgʻor tibbiy texnologiyalar mamlakatimizga olib kelinib, bemorlarga aniq tashhis qoʻyish va davolashda samarali qoʻllanilmoqda.

Butun mamlakatimizda boʻlgani kabi tumanimizda ham ilgʻor zamonaviy tibbiy texnologiyalar orqali tashhis qoʻyib davolaydigan xususiy tibbiyot muassasalari kun sayin koʻpaymoqda va aholining salomatligini yaxshilashga xizmat qilmoqda.

Mangʻit shahrining Olmazor mahallasida, tuman istirohat bogʻi yaqinida faoliyat koʻrsatayotgan “Sayamed” koʻz kasalliklarini davolashga ixtisoslashgan xususiy klinika ham shular jumlasidandir.

Ijaraga olingan bino maxsus jihozlanib, zamonaviy tibbiy asbob-uskunalar keltirilib, tashrif buyuruvchilarga qulay sharoitlar yaratilgan mazkur klinikada bemorlarga aniq tashhis qoʻyilib, davo muolajalari samarali olib borilmoqda.

Katarakta, glaukoma kabi kasalliklarga chalingan yurtdoshlarimiz hozirgi kunda ushbu muassasada ogʻriqsiz jarrohlik amaliyoti tufayli darddan xalos boʻlishmoqda.

Ayni kunda klinikada jami 7 nafar, shundan 3 nafar malakali koʻz kasalliklari shifokorlari, bundan tashqari, oʻrta tibbiyot xodimi va kichik hamshira faoliyat yuritishmoqda.

Joriy yilning 28-fevralida ish boshlagan klinikaga shu kungacha 750 nafardan ziyod bemorlar murojaat qildi. Bemorlarning koʻzlaridagi kasalliklarga aniq tashxis qoʻyilgan holda, aksariyati ushbu klinikada davolanib, dardlariga shifo topishdi.

Bu yurtdoshlarimizning olis shaharlarga borib ovora boʻlib yurmasdan, tumanimizning oʻzida davolanishlari, nisbatan ogʻir boʻlgan koʻz kasalliklaridan ham jarrohlik usulida xalos boʻlishlari uchun qulay sharoitlar yaratilganidan dalolatdir. Muhimi, bemorlar jarrohlik amaliyotidan bir necha soat oʻtgach, uylariga qaytishlari mumkin, faqat belgilangan vaqtda shifokor nazoratidan oʻtib, maslahatlariga amal qilib turishlari lozim.

Keyingi yillarda tumanimiz aholisi orasida koʻzning shox pardasi jiddiy zararlanishi, koʻz ichki bosimining oshishi, koʻz qorachigʻi sirtiga et oʻsishi kabi kasalliklar koʻproq uchramoqda. Avvallari odamlarni jiddiy xavotirga solgan buningdek kasalliklarni “Sayamed” koʻz kasalliklari klinikasida boshqa muassasalarga nisbatan ancha arzon va samarali davolash yoʻlga qoʻyilganligi yurtdoshlarimiz uchun yana bir qulaylik boʻldi. Klinikada darddan forigʻ boʻlayotgan bemorlar bosh shifokor Yahyo Soliyev, shifokorlar Ilhom Xolimbetov, Komiljon Tajiboyevlar faoliyatidan juda xursand.

Dard borki, davo bor, deydi xalqimiz. Biroq oʻz hududingda, ovoragarchiliksiz davolanganga nima yetsin? Tabiiyki, tumanimizda koʻz kasalliklari klinikasining tashkil etilganligi aholi uchun bu borada muhim imkoniyatdir.

Oygul RAJABOVA.