“SAYAMED” КЎЗ КЛИНИКАСИ САМАРАЛИ ФАОЛИЯТ ЮРИТМОҚДА
Ўзбекистон Республикаси Президентининг “Соғлиқни сақлаш соҳасида хусусий секторни янада ривожлантириш чора-тадбирлари тўғрисида”ги Қарори хусусий секторнинг соғлиқни сақлаш соҳасида фаолият юритиши учун янада қулай шароитлар яратди.
Қарор асосида хусусий тиббиёт муассасаларининг фаолият юритишига, моддий-техник базасининг мустаҳкамланишига, кўрсатилаётган хизматлар сифатини, ҳажмини кўпайтиришга имкониятлар яратилмоқда. Натижада хусусий тиббиёт муассасалари ривожи учун кенг йўл очилиб, тиббиёт тараққиёти этган мамлакатларда фойдаланилаётган илғор тиббий технологиялар мамлакатимизга олиб келиниб, беморларга аниқ ташҳис қўйиш ва даволашда самарали қўлланилмоқда.
Бутун мамлакатимизда бўлгани каби туманимизда ҳам илғор замонавий тиббий технологиялар орқали ташҳис қўйиб даволайдиган хусусий тиббиёт муассасалари кун сайин кўпаймоқда ва аҳолининг саломатлигини яхшилашга хизмат қилмоқда.
Манғит шаҳрининг Олмазор маҳалласида, туман истироҳат боғи яқинида фаолият кўрсатаётган “Sayamed” кўз касалликларини даволашга ихтисослашган хусусий клиника ҳам шулар жумласидандир.
Ижарага олинган бино махсус жиҳозланиб, замонавий тиббий асбоб-ускуналар келтирилиб, ташриф буюрувчиларга қулай шароитлар яратилган мазкур клиникада беморларга аниқ ташҳис қўйилиб, даво муолажалари самарали олиб борилмоқда.
Катаракта, глаукома каби касалликларга чалинган юртдошларимиз ҳозирги кунда ушбу муассасада оғриқсиз жарроҳлик амалиёти туфайли дарддан халос бўлишмоқда.
Айни кунда клиникада жами 7 нафар, шундан 3 нафар малакали кўз касалликлари шифокорлари, бундан ташқари, ўрта тиббиёт ходими ва кичик ҳамшира фаолият юритишмоқда.
Жорий йилнинг 28 февралида иш бошлаган клиникага шу кунгача 750 нафардан зиёд беморлар мурожаат қилди. Беморларнинг кўзларидаги касалликларга аниқ ташхис қўйилган ҳолда, аксарияти ушбу клиникада даволаниб, дардларига шифо топишди.
Бу юртдошларимизнинг олис шаҳарларга бориб овора бўлиб юрмасдан, туманимизнинг ўзида даволанишлари, нисбатан оғир бўлган кўз касалликларидан ҳам жарроҳлик усулида халос бўлишлари учун қулай шароитлар яратилганидан далолатдир. Муҳими, беморлар жарроҳлик амалиётидан бир неча соат ўтгач, уйларига қайтишлари мумкин, фақат белгиланган вақтда шифокор назоратидан ўтиб, маслаҳатларига амал қилиб туришлари лозим.
Кейинги йилларда туманимиз аҳолиси орасида кўзнинг шох пардаси жиддий зарарланиши, кўз ички босимининг ошиши, кўз қорачиғи сиртига эт ўсиши каби касалликлар кўпроқ учрамоқда. Авваллари одамларни жиддий хавотирга солган бунингдек касалликларни “Sayamed” кўз касалликлари клиникасида бошқа муассасаларга нисбатан анча арзон ва самарали даволаш йўлга қўйилганлиги юртдошларимиз учун яна бир қулайлик бўлди. Клиникада дарддан фориғ бўлаётган беморлар бош шифокор Яҳё Солиев, шифокорлар Илҳом Холимбетов, Комилжон Тажибоевлар фаолиятидан жуда хурсанд.
Дард борки, даво бор, дейди халқимиз. Бироқ ўз ҳудудингда, оворагарчиликсиз даволанганга нима етсин? Табиийки, туманимизда кўз касалликлари клиникасининг ташкил этилганлиги аҳоли учун бу борада муҳим имкониятдир.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
