SPORTChI QIZ OLTINOY

Sport – yoshlarning jismonan sogʻlom, yetuk va barkamol insonlar boʻlib kamol topishida muhim ahamiyat kasb etadi. Shu sababdan ham yurtimizning barcha hududlari boʻylab yoshlarni sportga jalb qilish borasida koʻplab amaliy ishlar amalga oshirilmoqda. Jamiyatimizda sogʻlom turmush tarzini shakllantirish, aholining, ayniqsa, oʻsib kelayotgan yosh avlodning sport bilan muntazam shugʻullanishi uchun zarur shart-sharoitlar yaratilgan.
Ushbu imkoniyatlardan unumli foydalanib kelayotgan yoshlar safi tumanimizda ham talaygina. Ana shunday yosh sportchilardan Oltinoy Shukurullayeva sportning ogʻir atletika turi boʻyicha koʻpgina musobaqalar gʻolibi. U oʻzining iqtidori va qobiliyati bilan tengdoshlaridan ajralib turadi. Toʻqqiz yoshida tuman Bolalar-oʻsmirlar sport maktabining ogʻir atletika guruhiga qatnay boshladi. Ustozi Anvar Boboniyozovdan ogʻir atletika sport turi sir-asrorlarini oʻrgandi. Koʻplab shogirdlarning talabchan ustozi Anvar Boboniyozov Oltinoyda sportning bu turiga boʻlgan qiziqish juda kuchli ekanligini sezgach, unga jiddiy eʼtibor beradigan, u bilan alohida ham shugʻullanadigan boʻldi.
Yosh sportchi qizda oʻzi oʻrganayotgan sport turiga ixlosni murabbiyi juda qadrladi. Shu sababdan uning ham jismoniy, ham ruhiy tayyorgarligini oshirishga kirishdi, mashgʻulotlar davomida amaliy bilimlarni erinmay oʻrgatdi. Talabchan va jonkuyar murabbiyidan olgan saboqlari samarasi hademay Oltinoyning yutuqlarida aks eta boshladi.
Bugungi kunda tumanimizdagi 21-sonli maktabda taʼlim olayotgan Oltinoy Shukurullayeva Qoraqalpogʻiston, Oʻzbekiston chempionatlari sohibasi.
Shulardan, 2019-yil Xiva shahrida boʻlib oʻtgan 2005-yilda tugʻilgan va undan kichik yoshdagi oʻsmirlar oʻrtasida Oʻzbekiston chempionatida 71 kg. vazn toifasida 1-oʻrin, 2020-yil Chirchiq shahrida boʻlib oʻtgan Oʻzbekiston chempionatida 76 kg. vazn toifasida 2-oʻrin, 2021-yil Samarqand shahrida oʻtkazilgan Oʻzbekiston chempionatida 71 kg. vazn toifasida 2-oʻrin, 2021-yil Xiva shahrida Bolalar va oʻsmirlar sport maktablari sportchilari oʻrtasida oʻtkazilgan musobaqada 71 kg. vazn toifasida 2-oʻrin, 2005-2009-yillarda tugʻilgan oʻsmirlar va qizlar orasidagi Qoraqalpogʻiston Respublikasi chempionatida 1-oʻrin, qizlar oʻrtasida oʻtkazilgan Qoraqalpogʻiston Respublikasi kubogida 76 kg. vaznda 1-oʻrinni qoʻlga kiritdi. Bundan tashqari, u maktabda oʻtkazilgan maʼnaviy tadbirlarda ham faol qatnashib keladi.
Oltinoy kabi ogʻir atletika sport turini oʻrganib, nufuzli musobaqalarda sovrinli oʻrinni olayotgan sportchi qizlarning oʻqishda va sport sohasida ham muvaffaqiyatlarga erishaverishini tilaymiz.

Shahzod Qurbonboyev,
QDU talabasi.