Toʻlqin ovulida marhum sportchi Furqat Rajapov xotirasiga bagʻishlab boks boʻyicha ochiq birinchilik oʻtkazildi

9-may – Xotira va qadrlash kuni mamlakatimizda keng nishonlanib, sana munosabati bilan Ikkinchi jahon urushida qatnashgan qahramonlar xotirasi yodga olinadi, oramizda yurgan faxriylar va nuroniylarga yanada chuqur eʼzoz-ehtirom koʻrsatiladi. Nafaqat urushda, balki yurt taraqqiyoti va xalq farovonligi yoʻlida fidokorona mehnat qilib, bu yorugʻ dunyoni barvaqt tark etgan vatandoshlarimiz xotirasi ham ushbu sana sababli yana bir marta yod etiladi.

Amudaryo tumanining Toʻlqin ovulida shu ovulning bir guruh faollari – boks murabbiylari Azimjon Muxtorov, Nizomaddin Qipchaqbayevlar hamda mahalla faoli Abay Sagʻinbayev tashabbusi bilan ham ana shunday xayrli tadbir tashkil qilindi.

Xotira va qadrlash kuni munosabati bilan 9, 10 va 11-may kunlari oʻtkazilgan, bir qancha Xalqaro musobaqalar, uch karra Qoraqalpogʻiston Respublikasi chempioni boʻlgan marhum Rajapov Furqat Gulmirzayevich xotirasiga bagʻishlangan boks musobaqalari yuzlab yoshlarni qamrab oldi. Musobaqaga marhum Furqat Rajapovning ota-onasi va yaqin qarindoshlari hamda ushbu hududda yashovchi sportsevar yoshlar, keng jamoatchilik vakillari tashrif buyurdi.

Musobaqaning ochilish marosimida Amudaryo tumani sport maktabi direktori Chorsham Tajimuratov va boshqalar soʻzga chiqib, Furqat Rajapovning yorqin xotirasini yodga oldilar va uning erishgan muvaffaqiyatlari, tayyorlagan shogirdlari va tumanimizda sport, xususan boks rivojiga qoʻshgan hissasi haqida soʻzladilar.

Musobaqalarda Qoraqalpogʻiston Respublikasining Amudaryo, Taxiyatosh, Chimboy tumanlari hamda Nukus shahridan, Xorazm viloyatining Gurlan va Xiva tumanlaridan jami 150 nafardan ortiq yosh sportchilar ishtirok etib, 20ta vazn toifasida oʻzaro kuch sinashdilar.

Aytish joizki, yoshlarni sportga jalb qilish ularning jismoniy va ruhiy salomatligini mustahkamlash, shuningdek sogʻlom turmush tarzini shakllantirishda muhim ahamiyatga ega. Shu sababli ham mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari ishlab chiqilgan va bu boʻyicha amaliy ishlar qilinmoqda. Bu dasturlar asosida tashkil qilinayotgan tadbirlar yoshlarni sport bilan faol ravishda shugʻullanishga ragʻbatlantiradi. Shuningdek, mazkur dasturlar ommaviy sport tadbirlarini tashkil etish, sport inshootlarini zamonaviy jihozlar bilan taʼminlash va imkoniyati cheklangan yoshlar uchun sport infratuzilmasini yaratish kabi muhim yoʻnalishlarni oʻz ichiga oladi.

Bundan tashqari, mahallalarda jamoatchilik faollari tashabbusi bilan tashkil qilinayotgan turli sport tadbirlari ham yoshlarning boʻsh vaqtlarini mazmunli oʻtkazish, ularni sportga oshno qilish, turli yot gʻoya va illatlardan himoya qilishda muhim ahamiyat kasb etib, kelajagimiz egalarining barkamol avlod boʻlib voyaga yetishlariga puxta zamin hozirlamoqda.

Doʻstlik uchrashuvi deya eʼtirof etilgan ushbu musobaqlar yakuniga koʻra amudaryolik, xususan Toʻlqin ovullik bokschilar umumiy hisobda 1-oʻrinni egallab, gʻoliblikni qoʻlga kiritdi. Gʻoliblarga tashkilotchilar tomonidan diplomlar va esdalik sovgʻalari topshirildi.

Bu kabi sport tadbirlari, musobaqalar nafaqat yoshlarning boʻsh vaqtlarini mazmunli oʻtkazish hamda jismoniy salomatliklarini mustahkamlashda, balki ijtimoiy faolligini oshirishda ham muhim ahamiyat kasb etadi. Qolaaversa, bu mahallalarda sportni ommalashtirish va yoshlarning sportga boʻlgan qiziqishini ragʻbatlantirish borasida amalga oshirilayotgan islohotlarning amaliy ifodasidir.