Epidemiologik barqarorlik taʼminlanmoqda

Mamlakatimizda sanitariya – epidemiologiya muhiti barqarorligini taʼminlash, yuqumli kasalliklarning oldini olishga qaratilayotgan doimiy eʼtibor aholi salomatligini asrashda muhim omil boʻlayotir. Ayni kunlarda bu yoʻnalishdagi chora – tadbirlar yanada kuchaytirilmoqda. Hududlarda kuydirgi kasalligi va boshqa xavfli yuqumli kasalliklarni keltirib chiqaruvchi tabiiy oʻchoqlar ustidan doimiy kuztuv ishlari amalga oshirilmoqda. Tegishli idora, tashkilotlar, sanitariya – epidemiologiya, veterinariya sohasi mutaxassislari ishtirokida profilaktika va epidemiyaga qarshi chora – tadbirlar rejasi qabul qilinib, hayotga izchil tatbiq etilmoqda.

Xususan, Amudaryo tumani Favqulodda epidemiyaga qarshi kurashish komissiyasining “Tumanda kuydirgi va zoonoz oʻta xavfli yuqumli kasalliklar chetdan kirib kelishi va tabiiy oʻchoqlar tarqalishining oldini olish chora-tadbirlari toʻgʻrisida”gi masala yuzasidan tuman hokimligi binosida majlisi boʻlib oʻtdi.

Majlisda tegishli tashkilot va korxona rahbarlari, mahalla raislari, tuman tibbiyot birlashmasi mudirlari, veterinariya va chorvachilikni rivojlantirish boʻlimi xodimlari ishtirok etishdi. Xususan, tibbiyot hodimlari hushyorligini oshirish maqsadida joylarda malaka oshirish mashgʻulotlari, seminar-treninglar, majlislar tashkil etilmoqda. Bu kabi jarayonlarda hodimlar kasallikning profilaktikasi va davolashning samarali usullari yuzasidan tajriba va fikr almashilmoqda

Kuydirgi kasalligi – odamlar va hayvonlarda uchraydigan oʻta xavfli va yuqumli kasallikdir. Ushbu kasalliklarning asosiy manbalari chorva mollari hisoblanadi. Shu bois profilaktika chora-tadbirlarini avvalo chorva mollari oʻrtasida oʻtkazish, veterinariya punktlari va laboratoriyalarining salohiyatini yuksaltirish muhim ahamiyatga ega ekanligi taʼkidlab oʻtildi.

Majlisda soʻzga chiqqanlar kuydirgi va boshqa yuqumli kasalliklarning insonlar orasida uchrashining oldini olish borasida sanitariya – epidemiologiya sohasi va tibbiyot xodimlari tomonidan tizimli ishlar amalga oshirilayotgani haqida aytib oʻtishdi.

Shuningdek, majlisda Qoraqalpogʻiston Respublikasi Sanitariya – epidemiologik osoyishtalik va jamoat salomatligi boshqarmasi boshligʻi Bahodir Qutlimuratov qatnashdi va oʻz nutqida bunday muammolar kelib chiqishining oldini olish har bir insondan tibbiy madaniyat va oʻz salomatligiga eʼtiborli boʻlishni talab etadi. Buning uchun sogʻlom turmush tarziga, sanitariya-gigiyena qoidalariga toʻla rioya etish lozim.

Uylarda qoramol boqishda molxonalarni toza tutish, turli infektsiyalarning paydo boʻlishiga yoʻl qoʻymaslik haamda dezinfektsiya tadbirlarini oʻtkazish, hayvonlarni yiliga bir marta yuqorida aytilgan kasalliklarga qarshi emlatish, hayvonlarda biror bir kasallik alomatlari kuzatilganda darhol hududiy veterinariya xizmatiga murojaat etish kerakligi aytib oʻtildi.

Majlis davomida kuydirgi va zoonoz kabi oʻta xavfli yuqumli kasalliklarning turlariga keng turda misollar keltirilib, ularning oldini olishga qaratilgan chora-tadbirlar haqida toʻxtalib oʻtildi.

Bundan tashqari, majlisda ushbu yuqumli kasalliklarning zararli tomonlari toʻgʻrisida tushuntirish boʻyicha chekka hududlarda ham targʻibot tadbirlari uzluksiz ravishda tashkil etish belgilab olindi.

Bugungi kunda aholiga qulaylik yaratish va yuqumli kasalliklarga qarshi kurashish tadbirlarini oʻz vaqtida tashkil etish maqsadida hududlarda sanitariya – epidemiologiya, veterinariya xodimlari, shifokorlar, mahalla faollari hamkorligida maxsus guruhlar tuzilib, hududlarda epidemiologik holatni barqaror saqlash boʻyicha ishlar olib borilmoqda. Bu majlisdan koʻzlangan maqsad yuqumli kasalliklar boʻyicha maʼlumot berish, epidemiologik barqarorlikni taʼminlashdan iborat.

Sevara ISMOILOVA, QDU talabasi