4-SEKTOR HUDUDIDAGI NAMUNA MAHALLASI AHOLISI ChUQURLAShTIRILGAN TIBBIY KOʻRIKDAN OʻTKAZILDI

Keyingi yillarida yurtimizda xalqimiz salomatligini mustahkamlash, aholiga koʻrsatilayotgan tibbiy xizmat sifati va saviyasini yuksaltirish, ayniqsa, onalar va bolalar, ijtimoiy koʻmakka muhtoj fuqarolar sogʻligʻini muhofaza qilishga alohida eʼtibor qaratilmoqda. Amudaryo tumanida ham olis va chekka hudud boʻlgan Namuna mahallasi aholisi uchun Tibbiyot  birlashmasi shifokorlari va tor doiradagi  mutaxassislari, 6-sonli oilaviy poliklinika shifokorlari bilan hamkorlikda "Inson qadri uchun" aktsiyasi ostida chuqurlashtirilgan tibbiy koʻrik tashkil etildi.

3-iyun kuni hudud boʻyicha sektor rahbari tashabbusi bilan Prezidentimizning 2020-yil 12-noyabrdagi Farmonida belgilangan vazifalar ijrosini taʼminlash maqsadida oʻtkazilgan mazkur tibbiy koʻrik yurtimizda aholi, ayniqsa, onalar va bolalar salomatligini muhofaza qilish, tibbiy xizmat sifati va samaradorligini yuksaltirishga qaratilayotgan eʼtiborning bir namunasi boʻldi. Tibbiy koʻrikda terapevt, pediatr, kardiolog, onkolog, ginekolog, otoloringolog, oftalmolog, endokrinolog, stomatolog, nevropatolog mutaxassislar ishtirok etdilar. Shuningdek, koʻrik davomida, dispanser hisobida turgan bemorlar, nogironlar, xotin-qizlar va bolalar salomatligiga alohida eʼtibor qaratildi.

Shu kuni mahallaning 350  nafar aholisi UZI, 328 nafari flyurografiya, 140 nafari EKG,  392 nafari klinik laboratoriya tekshiruvlaridan oʻtkazildi. Ahamiyatlisi, shifokorlar qabuliga kelish imkoni boʻlmagan,  xatlov natijasiga koʻra 4-guruhga mansub 4 nafar bemorlardan ham xonadonlariga borilgan holda xabar olindi va uy sharoitida  tibbiy koʻrikdan oʻtkazildi. Shifokorlar tibbiy koʻrik natijalariga koʻra aniqlangan kasalliklarga koʻra ambulator va statsionar davo choralari boʻyicha kerakli tavsiyalar berishdi.

Aniqlangan bemorlarning besh nafariga Birlashmaning jarrohlik boʻlimiga, ikki nafar  kardiologiya boʻlimiga, tugʻish yoshidagi ayollardan 3 nafariga ginekologiya boʻlimida davolanish uchun yoʻllanmalar berildi. Onkologik kasallik xavfi boʻlgan bir nafar bemorga mutaxassis shifokor tomonidan davo muolajalari belgilandi. Qandli diabet kasalligi aniklangan yana bir bemor endokrinolog shifokor tomonidan tavsiyalar berildi. Yurak qon-tomir kasalligi boʻlgan 38 nafar, teri-tanosil kasalliklari boʻlgan 12 nafar, lor kasalliklari boʻlgan 14 nafar bemorlarga  ambulator davo choralari buyurildi. Miopiyasi boʻlgan 12 nafar bemorga mos dioptriydagi koʻzoynaklar tavsiya qilindi.

Shuningdek, 202  nafar  3-guruhga  mansub  “D” nazoratda  turgan  bemorlarga  ambulator davolar berilib, oilaviy poliklinka hisobidan dori-darmonlar  bilan  taminlandi. Yetmish yoshdan oshgan 24 ta nuroniylarga “Kaltsiy  D-3” tabletkasi 4-guruhga kiritilgan   Rajab Xolmenovga  nogironlik aravachasi berish rejalashtirildi. Jombul Tajiboyevga esa nogironlik nafaqasi tayinlash uchun kerakli hujjatlarni shakllantirish boshlab yuborildi.

Tibbiy koʻrik natijasida jami 202 nafar bemorga ambulator muolaja va 11 nafar bemorga statsionarga yoʻllanma berildi.

Tadbirda aholi orasida sogʻlom turmush tarzini keng targʻib qilish, fuqarolarning tibbiy bilim va madaniyatini oshirish, kasalliklarni ilk davrida aniqlash va davolash choralarini koʻrishga kabilarga ham eʼtibor qaratildi.

Tibbiy koʻrik oʻtkazish bilan birga, hozirgi vaqtda keng tarqalgan yuqumli kasalliklar, oʻpka, diabet, onkologik, yurak-qon tomir kasalliklarining oldini olish, profilaktika qilish va davolash usullari, sogʻlom turmush tarzi va faol jismoniy harakatning ahamiyati tushuntirildi. Tibbiyot birlashmasining salomatlik boʻlimi shifokorlari tomonidan shaxsiy gigiyenaga rioya qilish  va sogʻlom turmush tarzi, jismoniy faollik, toʻgʻri ovqatlanish tamoyillari toʻgʻrisida maʼruzalar qilindi hamda mavzuga oid bukletlar tarqatildi.

Namuna mahallasi aholisi chekka hududlar aholisining salomatligini muhofaza qilishga yaqindan yordam berish maqsadida shu yerning oʻzida tibbiy koʻrik tashkil etilgani, oʻzlariga qaratilgan bunday eʼtibor va gʻamxoʻrlikdan nihoyatda mamnun boʻldilar. Bu kabi sayyor tibbiy koʻriklar aholiga katta qulaylik yaratish bilan birga, shifokorlarning oʻzaro tajriba almashishlari, davolashdagi ilgʻor ish uslublarini oʻrganishlariga, kasbiy bilim va malakalarini oshirishga yaqindan yordam beradi.

J.Yavkashev, tuman TTB shifokori.