4-СЕКТОР ҲУДУДИДАГИ НАМУНА МАҲАЛЛАСИ АҲОЛИСИ ЧУҚУРЛАШТИРИЛГАН ТИББИЙ КЎРИКДАН ЎТКАЗИЛДИ

Кейинги йилларида юртимизда халқимиз саломатлигини мустаҳкамлаш, аҳолига кўрсатилаётган тиббий хизмат сифати ва савиясини юксалтириш, айниқса, оналар ва болалар, ижтимоий кўмакка муҳтож фуқаролар соғлиғини муҳофаза қилишга алоҳида эътибор қаратилмоқда. Амударё туманида ҳам олис ва чекка ҳудуд бўлган Намуна маҳалласи аҳолиси учун Тиббиёт  бирлашмаси шифокорлари ва тор доирадаги  мутахассислари, 6-сонли оилавий поликлиника шифокорлари билан ҳамкорликда "Инсон қадри учун" акцияси остида чуқурлаштирилган тиббий кўрик ташкил этилди.

3 июнь куни ҳудуд бўйича сектор раҳбари ташаббуси билан Президентимизнинг 2020 йил 12 ноябрдаги Фармонида белгиланган вазифалар ижросини таъминлаш мақсадида ўтказилган мазкур тиббий кўрик юртимизда аҳоли, айниқса, оналар ва болалар саломатлигини муҳофаза қилиш, тиббий хизмат сифати ва самарадорлигини юксалтиришга қаратилаётган эътиборнинг бир намунаси бўлди. Тиббий кўрикда терапевт, педиатр, кардиолог, онколог, гинеколог, отолоринголог, офтальмолог, эндокринолог, стоматолог, невропатолог мутахассислар иштирок этдилар. Шунингдек, кўрик давомида, диспансер ҳисобида турган беморлар, ногиронлар, хотин-қизлар ва болалар саломатлигига алоҳида эътибор қаратилди.

Шу куни маҳалланинг 350  нафар аҳолиси УЗИ, 328 нафари флюрография, 140 нафари ЭКГ,  392 нафари клиник лаборатория текширувларидан ўтказилди. Аҳамиятлиси, шифокорлар қабулига келиш имкони бўлмаган,  хатлов натижасига кўра 4-гуруҳга мансуб 4 нафар беморлардан ҳам хонадонларига борилган ҳолда хабар олинди ва уй шароитида  тиббий кўрикдан ўтказилди. Шифокорлар тиббий кўрик натижаларига кўра аниқланган касалликларга кўра амбулатор ва стационар даво чоралари бўйича керакли тавсиялар беришди.

Аниқланган беморларнинг беш нафарига Бирлашманинг жарроҳлик бўлимига, икки нафар  кардиология бўлимига, туғиш ёшидаги аёллардан 3 нафарига гинекология бўлимида даволаниш учун йўлланмалар берилди. Онкологик касаллик хавфи бўлган бир нафар беморга мутахассис шифокор томонидан даво муолажалари белгиланди. Қандли диабет касаллиги аникланган яна бир бемор эндокринолог шифокор томонидан тавсиялар берилди. Юрак қон-томир касаллиги бўлган 38 нафар, тери-таносил касалликлари бўлган 12 нафар, лор касалликлари бўлган 14 нафар беморларга  амбулатор даво чоралари буюрилди. Миопияси бўлган 12 нафар беморга мос диоптрийдаги кўзойнаклар тавсия қилинди.

Шунингдек, 202  нафар  3-гуруҳга  мансуб  “Д” назоратда  турган  беморларга  амбулатор даволар берилиб, оилавий поликлинка ҳисобидан дори-дармонлар  билан  таьминланди. Етмиш ёшдан ошган 24 та нуронийларга “Кальций  Д-3” таблеткаси 4-гуруҳга киритилган   Ражаб Холменовга  ногиронлик аравачаси бериш режалаштирилди. Жомбул Тажибоевга эса ногиронлик нафақаси тайинлаш учун керакли ҳужжатларни шакллантириш бошлаб юборилди.

Тиббий кўрик натижасида жами 202 нафар беморга амбулатор муолажа ва 11 нафар беморга стационарга йўлланма берилди.

Тадбирда аҳоли орасида соғлом турмуш тарзини кенг тарғиб қилиш, фуқароларнинг тиббий билим ва маданиятини ошириш, касалликларни илк даврида аниқлаш ва даволаш чораларини кўришга кабиларга ҳам эътибор қаратилди.

Тиббий кўрик ўтказиш билан бирга, ҳозирги вақтда кенг тарқалган юқумли касалликлар, ўпка, диабет, онкологик, юрак-қон томир касалликларининг олдини олиш, профилактика қилиш ва даволаш усуллари, соғлом турмуш тарзи ва фаол жисмоний ҳаракатнинг аҳамияти тушунтирилди. Тиббиёт бирлашмасининг саломатлик бўлими шифокорлари томонидан шахсий гигиенага риоя қилиш  ва соғлом турмуш тарзи, жисмоний фаоллик, тўғри овқатланиш тамойиллари тўғрисида маърузалар қилинди ҳамда мавзуга оид буклетлар тарқатилди.

Намуна маҳалласи аҳолиси чекка ҳудудлар аҳолисининг саломатлигини муҳофаза қилишга яқиндан ёрдам бериш мақсадида шу ернинг ўзида тиббий кўрик ташкил этилгани, ўзларига қаратилган бундай эътибор ва ғамхўрликдан ниҳоятда мамнун бўлдилар. Бу каби сайёр тиббий кўриклар аҳолига катта қулайлик яратиш билан бирга, шифокорларнинг ўзаро тажриба алмашишлари, даволашдаги илғор иш услубларини ўрганишларига, касбий билим ва малакаларини оширишга яқиндан ёрдам беради.

Ж.Явкашев, туман ТТБ шифокори.