TUYGʻULAR SATRLARGA KOʻChGANDA

Tumanimiz aholisi ijodkorlik salohiyatiga juda boy. Ayniqsa badiiy ijod bilan shugʻullanuvchi hamyurtlarimiz koʻpligi bilan doimo faxrlanamiz.

Tumanimizda ijodkor insonlarni elga tanishtirish, ularni har tomonlama qoʻllab-quvvatlash uchun barcha imkoniyatlar mavjud. Tumanimizda chop etilayotgan “Taraqqiyot koʻzgusi”, “Mening oilam” gazetalarining har bir sonidagi alohida sahifada tumanimiz ijodkorlarining sheʼr va hikoyalari yoritib borilmoqda. amunews.uz veb-sayti orqali sheʼr va hikoyalar, yangi-yangi xabarlar muxlislar eʼtiboriga havola etilmoqda. Amudaryo televideniyesi orqali tumanimizda faoliyat yuritayotgan ijodkorlar, sanʼatkorlar haqida koʻrsatuvlar tayyorlab borilmoqda. Bundan tashqari “Taraqqiyot koʻzgusi” gazetasi qoshida nashriyot tashkil etilib, tumanimiz ijodkorlarining kitoblari bosilib chiqmoqda. Yaqindagina kitobxonlar qoʻliga yetib borgan yangi kitoblar soʻzimizning isbotidir. Bugungi kunda bir necha kitoblar muallifiga aylangan tajribali ijodkorlar Saʼdulla Xoʻjaniyozov, Tursunboy Abdullayev, Ahmad Nafasov, Robiya Yoʻldosheva, Oygul Rajabova, Zulfiya Allayarova, Shomurod Xoʻjanov, Xudoybergan Jumamurodovlar kitobxonlarga yaxshi tanishdir. Ularning izdoshlari boʻlib Gulnora Yusupova, Alisher Ahmedov, Tursunoy Kenjaboyeva, Barno Samandarovalar sheʼriyat ixlosmandlariga tanilmoqdalar.

Ularning qalamiga mansub turli janrlardagi sheʼr va hikoyalar keng kitobxonlar ommasiga manzur boʻlmoqda.

Quvonarli joyi shundaki, tumanimizning ijodkorlari tez-tez muloqotlar oʻtkazib, ajoyib sheʼrxonlik davrasini uyushtirib kelmoqdalar. Bunday davralar haqiqiy ijod bayramiga aylanib ketadi. Tuygʻular satrlarga koʻchib  dillarga olam-olam zavq bagʻishlaydi.

Navbatdagi ijodiy davra suhbati “Jayxun ilhomlari” nodavlat notidorat tashkilotida boʻlib oʻtdi. Davra suhbatini Qoraqalpogʻiston Respublikasida xizmat koʻrsatgan jurnalist, shoir Saʼdulla Xoʻjaniyozov kirish soʻzi bilan ochdi hamda boshqarib bordi.

Oʻzining “Yangi yil hislari”, “Tilagim”, “Xayolim”, “Shunda seni izlarman” sheʼrlari bilan davrani tajribali qalamkash Gulchehra Otaboyeva boshlab berdi. Xotira kuniga bagʻishlangan dil soʻzlari, Vatan beshigi qadri, oʻgʻil-qizlar, nabiralar kelajagi uchun ezgu tilaklarga boy sheʼriy satrlar barchada ulkan taassurot uygʻotdi.

Shoir Tursunboy Abdullayevning “Afgʻonchi yigit” sheʼri shahid yigitlar haqidagi qaygʻuli xotiradir. “Onam menga aylanayin demabdi” sheʼri begʻubor, shoʻx bolalik haqida boʻlsa, boshqa sheʼrida oʻzni manmanlikdan asrash, nooʻrin soʻzdan tilni tiyish, eʼtiqod-iymon, taqdir-hayot haqida soʻz yuritadi.

Tuman xalq taʼlimi boʻlimiga qarashli 27-sonli umumtaʼlim maktabining 8-sinf oʻquvchsi Tursunoy Kenjaboyeva bugungi kunda barchaga taniqli ijodkor  boʻlib yetishdi. U davra  qatnashchilariga oʻzining  taʼrifi bilan aytganida “qalbi daryo”, qalbi toʻla ustozlari haqida “Ustozlar” sheʼrini oʻqib berdi. Xotira va qadrlash kuniga bagʻishlangan sheʼrida esa botir bobolar ruhi, Vatan uchun kurashgan insonlarni ulugʻlaydi.

Taniqli ijodkor Ahmad Nafasov qalamiga mansub sheʼrlar koʻngildagi his-tuygʻular, ichki dard, baxt osmonda emas – yerda, orzularga yetish umidi, odamlar oʻrtasidagi mehr-oqibat, keksalik gashti, uygʻonish davri, hayotdagi imkoniyatlar, Oʻzbekistonni gullab yashnatish yoʻlidagi orzularga boy tuygʻular bilan yoʻgʻrilgan.

Bir necha sheʼrlar va hikoyalari jamlangan kitoblar muallifi Gulnora Yusupova oʻzining “Ustozimga” sheʼrida ijod yoʻlidagi ustozi Saʼdulla Xoʻjaniyozovga “Yurak qoʻri soʻnmasligini, qalami qayrilmasligini” tilaydi. Ustozining ijod yoʻliga havas qilib yozgan “Meni kechir” nomli fardlar turkumini oʻqib berdi.

Shomurod Xoʻjanov – oddiy va samimiy, xalq yoʻlida yozilgan joʻshqin sheʼrlari bilan ijodkorlar orasida oʻz  uslubiga ega ijodkor. U buyuk gʻalabaning 77 yilligiga bagʻishlangan “Xotira” sheʼrida “Urush soʻzi lugʻatdan oʻchsin” deya tilak bildiradi. “Quvonma” sheʼrida esa umrni bekor oʻtkazma, ortiqcha mol-dunyo yigʻma, yaxshi-yomonni, umr mazmunini anglay bil degan fikrni ilgari suradi.

Tumanimizdagi 37-sonli umumtaʼlim maktabining maʼnaviy-maʼrifiy ishlar boʻyicha targʻibotchisi Mohimjon Bobojonova davra suhbatining mehmoni boʻlib, mazkur maktabdagi ijodiy jarayon, ijodkor oʻquvchilar haqida gapirib berdi va ulardan ikki nafar yosh ijodkor qizlarni davra ishtirokchilariga tanishtirdi.

Shu maktabning  6-sinf oʻquvchisi Feruza Aminboyeva oʻz sheʼrlarida “Shoira boʻlish emas orzuim, oddiy inson boʻlgim keladi” deydi. Yana... bir kun gul boʻlaman, hozir  gulgʻuncha”  deydi u. “Muhammad Yusufga” sheʼrida “Men buyuk shoirsan, Muhammad Yusuf”, “Ustoz” sheʼrida “Ustoz otangday ulugʻ” deb eʼtirof etadi. Uning “Bulutli yomgʻir sheʼrida goʻzal tabiat taʼriflangan.

37-sonli maktabning 7-sinf oʻquvchisi Durdona Norimbatova oʻzining “Vatan”, “Zulfiya xonimga” nomli sheʼrlarini oʻqib berdi. U oʻz tengdoshlarini ilm-hunar oʻrganishga, yoshlarga berilayotgan imkoniyatlardan samarali foydalanishga chaqiradi oʻz sheʼrlarida. Bu yorugʻ kunlarni koʻrolmay shahid ketgan insonlar xotirasini asrab-avaylashga chaqiradi barchani.

Bu yosh ijodkorlar tinmay oʻqib-izlansalar, kelajakda  yetuk ijodkorlar boʻlishiga barcha umid bildirdi.

Tumanimiz ijodkorlari orasida turli kasb egalari bor. Taniqli shoir-ijodkor Tojiboy Doʻsanovning kasbi – koʻz shifokori. Koʻp yillardan buyon “Hayratiy” taxallusi bilan sheʼrlar bitadi. U oʻz ijodida sheʼr qudratini yuqori baholaydi. Tojiboy Doʻsanov hayotga mehr, oʻtgan umrdan shukronalik, mamnunlik, ustozlarga hurmat hislari ufurib turgan “Yangi Oʻzbekiston bolalari” “Yurtda ulugʻlandi ustoz muallim”, “Tugʻilgan kunim” sarlavhali sheʼrlarini davra ishtirokchilariga inʼom qildi.

Ustoz ijodkor Saʼdulla Xoʻjaniyozov ijodkorlarning bugungi kundagi faoliyatlariga yuqori baho berar ekan, shu bilan bir qatorda ijodkorlar oldidagi masʼuliyatli vazifalarga ham toʻxtalib, ijodiy yoʻnalishlar boʻyicha oʻzining qimmatli maslahatlarini berib oʻtdi. Uning “Moʻmin bola edim” sheʼrida hayot mushkullari, insonning bu yoʻlda goh gʻolib, goh magʻlub boʻlsa ham egilmasligi, inson umrining sinovlari, tashvishlari bayon qilinadi.

Davra suhbati mehmoni Oʻzbekiston milliy tiklanish partiyasi tuman Kengashi raisi Shirin Yangiboyeva tuman ijodkorlarining ishlarida yutuqlar tilab, oʻzining bolalikdan sheʼriyatga qiziqishlari, orzular roʻyobi uchun intilishlari, sheʼriyatning yoshlar tarbiyasidagi ahamiyati, yoshlarga ustozlarning oʻrnak boʻlishi lozimligi haqida oʻz fikrlarini bildirib oʻtdi.

Gulnora Yusupova oʻzining “Satrlar ifori” kitoblarini ijodiy kechaning umidli, yosh ijodkorlariga sovgʻa qildi.

Tuygʻular satrlarga koʻchgan bu ijodiy kecha barchaning qalbida unutilmas taassurotlar qoldirdi.

Qolaversa, bunday ijodiy kechalar yosh ijodkorlar uchun mahorat maktabi, ijod yoʻlidagi asosiy yoʻnalish boʻlib xizmat qilishi tabiydir.

Oʻrozali REYIMOV, “Jayxun ilhomlari” NNT raisi.