“MAHALLALARDA MILLIY QADRIYaTLARNI MUSTAHKAMLASh HAFTALIGI”DA MEHR-OQIBAT, BAGʻRIKENGLIK VA MURUVVAT TUYGʻULARI YaNADA YuKSALDI
Navroʻz – nafaqat bahorgi tengkunlik, balki asrlar davomida shakllangan bobomeros qadriyatlar, urf-odat va anʼanalar ayyomidir. Navroʻz kunlarida oʻzaro mehr-oqibat, bagʻrikenglik, muruvvat va saxovat tuygʻulari yanada yorqinroq namoyon boʻladi. 22-28-mart kunlari “Mahalla – jamiyatimizning yorugʻ yuzi va vijdoni koʻzgusi” degan bosh gʻoyani oʻzida mujassam etgan “Mahallalarda milliy qadriyatlarni mustahkamlash haftaligi” doirasida amalga oshirilgan mehr va saxovat tadbirlarida bu yanada yaqqol namoyon boʻldi. Unda xalq tomonidan saylangan deputatlar, tadbirkorlar va ziyolilar vakillari ishtirok etishib, joylarga chiqqan holda xalq bilan samimiy muloqotda boʻldilar. Navroʻz bayrami bilan muborakbod etishib, kam taʼminlangan, ehtiyojmand oilalar ahvolidan xabar oldilar.
Mazkur haftalikda faol ishtirok etgan 30-Mangʻit saylov okrugidan Qoraqalpogʻiston Respublikasi Joʻqorgʻi Kengesi deputati Quvonch Boymurotov Mahalla xayriya jamoat fondi tuman boʻlinmasi raisi P.Yakubbayev hamrohligida saylov okrugi hududidagi Chordara, Boyovul, Navoiy nomli, Olmazor, Doʻstlik, Beruniy nomli mahallalar fuqarolar yigʻinlarida boʻlib, mazkur mahallalardagi “Temir daftar”, “Yoshlar daftari”, “Ayollar daftari” roʻyxatlarida turuvchi fuqarolar bilan uchrashdi. Mazkur mahallalardagi kam taʼminlangan, ijtimoiy himoyaga muhtoj, yakka-yolgʻiz va nogironligi bor shaxslarning xonadonlariga kirib borib, ularning hayoti va turmush sharoitlari bilan yaqindan tanishib, ularni qiynayotgan muammolarni oʻrgandi. Shu bilan birga aholini mamlakatimizda amalga oshirilayotgan keng koʻlamli islohotlar va davlatning istiqboldagi rejalari bilan ham tanishtirdi. Ayniqsa, kichik biznes va oilaviy tadbirkorlikni rivojlantirish, oila aʼzolari bilan tadbirkorlikning oʻziga maqbul bir yoʻnalishini tanlab, shu yoʻnalish boʻyicha ish boshlashni rejalashtirayotgan insonlarga zarur maslahat va yoʻl-yoʻriqlar berdi.
Oʻz navbatida mazkur okrug hududida yashovchi aholi vakillari deputat Q.Boymurtovga oʻzlarini qiynab kelayotgan muammolar yuzasidan savollar bilan murojaat qildilar. Deputat saylovchilar vakillariga ularning hayotiga oid muammolar yuzasidan yuqori tashkilotlarga deputat soʻrovi bilan chiqib, ularni bartaraf etishga vaʼda berdi.
Tadbir davomida deputat Q.Boymurotov hududdagi kam taʼminlangan, ehtiyojmand oilalarga kirib borib, ularga oziq-ovqat mahsulotlari va bayram sovgʻalarini topshirdi.
“Mahalla – jamiyatimizning yorugʻ yuzi va vijdoni koʻzgusi” degan bosh gʻoyani oʻzida mujassam etgan “Mahallalarda milliy qadriyatlarni mustahkamlash haftaligi” doirasida oʻtkazilgan mazkur uchrashuv tadbiri Navroʻz bayramiga xos ezgu va boqiy qadriyatlarning amaliy tantanasi sifatida deputat kirib borgan har bir mahalla va oilada mehr-oqibat va saxovat, bagʻrikenglik va muruvvat tuygʻularidan qalblar shodlikka toʻldi.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
