40-SONLI MAKTABDA MUHAMMAD YuSUF TAVALLUDINING 68 YILLIGI KENG NIShONLANDI

Oʻzbek xalqining sevimli farzandi, Oʻzbekiston xalq shoiri Muhammad Yusuf ijodi va uning betakror, joʻshqin sheʼriyati bugungi kunda nafaqat oʻzbek xalqining, balki butun Markaziy Osiyo davlatlari xalqlarining maʼnaviy mulkiga aylangan.

Oʻzbek sheʼriyatining rivojiga juda katta hissa qoʻshgan nodir isteʼdod sohibi Muhammad Yusuf qalamiga mansub haroratli misralar bu sheʼriyat bilan oshno boʻlgan har bir qalbga ona Yurt, Vatan suratini chizgani, kindik qoni tomgan aziz tuproqqa soʻnmas mehr tuygʻusini uygʻota olgani bilan millionlab insonlar uchun qadrlidir. Shu bois, garchi shoirning oʻzi bugun oramizda boʻlmasa-da, har yili 26-aprel sanasi uning nafaqat tavallud topgan kuni, balki ona Vatan tuygʻusini oʻz sheʼriyati bilan yuksak pardalarda kuylagan chinakam xalq shoirini ulugʻlash, xotirasini qadrlash kuni sifatida butun mamlakatimizda keng nishonlanadi.

Amudaryo tumanidagi 40-sonli umumtaʼlim maktabida ham xalqimizning sevimli farzandi, Oʻzbekiston xalq shoiri Muhammad Yusuf tavalludining 68 yilligiga bagʻishlangan adabiy-musiqiy xotira tadbiri boʻlib oʻtdi.

Maktabning tantanalar zali shoir hayoti va ijodiga bagʻishlangan koʻrgazmali vositalar, shoir kitoblari, shuningdek, bolaligi va yoshlik davrlari, joʻshqin ijodiy faoliyati aks ettirilgan suratlar, koʻrgazmali vositalar bilan bezatilib, katta ekranda Muhammad Yusufning oʻzi hayot davrida tarixga muhrlangan sheʼriyat davralaridagi, davlat tadbirlaridagi chiqishlari, adabiy jarayonlardagi faoliyati xususidagi lavhalar namoyish etib borildi.

Shoir xotirasiga bagʻishlangan adabiy-musiqiy tadbirni maktab direktori, Qoraqalpogʻiston Respublikasi Joʻqorgʻi Kengesi deputati Sanobar Xoʻjamurodova ochdi va barcha sheʼriyat shaydolariga ushbu sananing oʻzbek xalqi va adabiyoti uchun oʻta muhimligi, qisqa umri  davomida xalqimizga ulkan maʼnaviy meros qoldirgan, Oʻzbekiston deb atalmish goʻzal va betakror zaminni butun jism-u joni bilan sevgan hamda betakror sheʼrlariga muhrlagan Muhammad Yusuf nomi yetti yoshdan yetmish yoshgacha har bir yurtdoshimiz uchun qadrli ekanligini taʼkidladi.

Shundan soʻng, tadbirda maktab oʻquvchilari tomonidan tayyorlangan sahna koʻrinishlari namoyish etildi. Unda Muhammad Yusufning xokisor, munis va mehribon onasi, yaqinlari, doʻst-u birodarlari, oilasi, farzandlari va shogirdlari bilan boʻlgan yuksak insoniy munosabatlari, intilish va izlanishlari, orzulari yoʻlidagi mashaqqatli mehnat damlari ishonarli tarzda ochib berildi.

Tadbir mehmoni, Oʻzbekiston Yozuvchilar uyushmasi aʼzosi, Qoraqalpogʻiston Respublikasida xizmat koʻrsatgan jurnalist, shoira  Robiya Yoʻldosheva Muhammad Yusuf bilan bogʻliq xotiralari haqida soʻzlab, shoirning deyarli barcha sheʼrlari oʻzbek adabiyotining, xalqimizning bebaho mulki ekanligini taʼkidladi.

U shoir hayoti va shaxs sifatidagi ezgu fazilatlari haqida gapirarkan, Oʻzbekiston Qahramoni, xalq yozuvchisi Said Ahmad aytganiday, garchi Muhammad Yusuf jisman oramizda boʻlmasa-da, Muhammad Yusuf deb atalgan buyuk Sheʼriyat borligini, bu sheʼriyat har bir qalbda mangu yashashini taʼkidladi.

Tadbir davomida oʻquvchi-yoshlar shoir sheʼrlarini maroq bilan oʻqidilar, Muhammad Yusuf sheʼrlari bilan aytiladigan qoʻshiqlarni ijro etdilar. Taniqli xalq hofizlari tomonidan kuylangan, xalqning betakror maʼnaviy mulkiga aylangan ashulalarga raqsga tushdilar. Tadbirning har bir lahzasida shoir sheʼrlari yangrab turdi va oʻzbek xalqining ardoqli farzandi ijodiga, porloq  xotirasiga yuksak hurmat va ehtirom koʻrsatildi.

R.Anorov, M.Shomurodov olgan suratlar.