OTA DUOSINI OLGAN QIZ

Mayra Umirboyevaning oʻqituvchilik kasbiga ixlos qoʻyishiga otasi – bir umr bolalarga taʼlim-tarbiya berib kelayotgan, nevaralar ardogʻida, oʻgʻil-qizlari kamolidan quvonib yashayotgan Marat Otajonov sababchi  boʻldi.

Mayra ulgʻaysam, albatta, otamdek ustoz boʻlaman, deb orzu qilar, xayolan oʻzini otasi oʻrnida tasavvur qilib ham koʻrardi. Biroq  Xoʻjayli shahridagi 1-sonli maktabning 9-sinfini tamomlagach, shu tuman Tibbiyot birlashmasida shifokor boʻlib ishlaydigan onasining raʼyini qaytara olmay, Tibbiyot kollejiga oʻqishga  kirdi. Kollejni aʼlo baholarga bitirib, oʻz mutaxassisligi boʻyicha faoliyatini boshlagan vaqtida ham koʻnglidagi oʻqituvchilikka boʻlgan havas uni tark etmadi. Shunday qilib, qoʻli yengil, shirin soʻzli hamshira boʻlib ishlab yurgan qiz NDPIga hujjat topshirdi va sinovdan yaxshi oʻtib, davlat granti asosida talabalikka qabul qilindi.

Mayra oliygohni muvaffaqiyatli tugatgach, Kuyuk koʻpir ovuliga kelin boʻlib tushdi va hududdagi 14-sonli maktabda qozoq tili fani oʻqituvchisi boʻlib mehnat faoliyatini boshladi. Bunga endigina 9-yil boʻlayapti. Shu davr ichida Mayra maktab oʻqituvchilar jamoasi bilan bir oila farzandlariday boʻlib ketdi. Dastlab yangi oila, yangi maktab oʻqituvchilari, oʻquvchilariga koʻnikishi oson ham boʻlmadi. Biroq maktabning rahbarlari, matematika oʻqituvchisi A.Bekmurodov, geografiya fani oʻqituvchisi R.Toʻramurodovlar unga dalda, yoʻl-yoʻriq berib turishdi.

Ha, Mayra epladi, ustoz oʻqituvchilar ishonchini oqlab, bolalarning sevimli ustoziga aylandi.

U oʻqituvchilik qilib, qozoq tili va adabiyotidan dars bergan sevimli shogirdi A.Jalgʻasbayeva 2019-yilda oliygohning oʻzi oʻqigan fakultetiga oʻqishga kirganida xuddi oʻz bolasi talaba boʻlganday quvondi, oʻz-oʻziga ishonchi ortdi, ota-onalar unga oʻzgacha hurmat bilan qaraydigan boʻldi.

Oilasidagi yumushlari, 2013-yilda tugʻilgan qizi Aydana, 2018-yilda tugʻilgan oʻgʻli Nurdauletlar tarbiyasidan ortib, Mayra darsdan keyin ham oʻquvchilarini toʻgarak mashgʻulotlariga jalb etdi. Natijada oʻquvchilari yaxshi koʻrsatkichlarni qoʻlga kiritdi. Xususan, 2020-yilda G.Serikboyeva, M.Oʻrinboyevalar NDPIning Turkiy tillar filologiyasi fakultetining qozoq tili boʻlimiga oʻqishga kirishgan boʻlsa, 2021-yilda bir bitiruvchisi B.Reyimboyeva fanlar olimpiadasining mamlakat bosqichi gʻolibi boʻlib, oliygohga imtihonsiz qabul qilindi.

Jamiyatimizda oʻz oilasining tinch-totuvligini, ahilligini taʼminlabgina qolmay, yosh avlodni iqtidorli, bilimli, maʼnaviyatli qilib tarbiyalashga munosib hissa qoʻshayotgan Mayra, u kabi fidoyi ayol-qizlarga bu taʼrif ham kam, nazarimda.

Ilohim, omon boʻling, kasbingizdan baraka toping!

Oygul RAJABOVA.