MANGʻIT ShAHRINING KIChIK ShAHARChA QIYoFASINI OLGAN MAHALLASI

Mamlakatimizda mahalla institutini rivojlantirishga qaratilayotgan eʼtibor va gʻamxoʻrlikning mazmun-mohiyatida, avvalo inson omiliga eʼtibor, uning hayotdan rozi, obod va farovon yashashini taʼminlashdek ustuvor vazifalar mujassam. Mahalla masʼullari esa ana shu ustuvor vazifalarni sobitqadamlik bilan bajarishga hamisha burchlidirlar.

Mangʻit shahrining Olmazor mahallasi Amudaryo tumanidagi har tomonlama, ayniqsa, infratuzilmasi jadal rivojlanayotgan mahallalaridan biri sanaladi. Ayni paytda 1025ta oilada 3242 nafar aholi istiqomat qilayotgan mahalla hududida zamon talablari darajasidagi istirohat bogʻi, Amudaryo tarixiy-oʻlkashunoslik muzeyi, 4ta bolalar bogʻchasi, “Sayamed” koʻz kasalliklari klinikasi, 1ta mini stadion, Amudaryo BOʻSM va unga tegishli markaziy oʻyingoh, yopiq basseyn, Maktabgacha va maktab taʼlimi boʻlimi maʼmuriy binosi, 82-sonli  umumtaʼlim maktabi, “Barkamol avlod” bolalar maktabi, xorijiy tillarga ixtisoslashgan xususiy maktab, 3ta choyxona, 2ta tozalangan suv sotish shoxobchalari, 2ta savdo-sotiq doʻkoni, 1ta AYoQSh, mebel ishlab chiqarish, koʻrpa qavish tsexlari, zamonaviy fotostudiya mavjud. Mahalla infratuzilmasining zamon talablari darajasida rivojlanayotganini hisobga olsak, hatto Mangʻit shahrining markaziy qismiga nisbatan ham qiyofasi koʻrkam, xalq talab va ehtiyojlari darajasidagi shahar ichidagi shaharcha deyish mumkin.

Ishsizlikka barham berish, ijtimoiy himoya daftarlariga kiritilgan yoshlar, ayol-qizlarning bandligini taʼminlashda “Mahalla yettiligi”ning tutgan oʻrni muhim ahamiyat kasb etmoqda. “Mahalla yettiligi”ning hamkorlikdagi oʻrganishlari natijasida ijtimoiy himoyaga muhtoj fuqarolar roʻyxatlari shakllantirilib, 19 nafar fuqaroning xonadonlari tomi shiferlab berildi, yana 5ta xonadon tomini shifer bilan yopish ishlari davom etmoqda.

Hududni eng obod va farovon goʻshaga aylantirish maqsadida MFY raisi A.Madrahimov rahbarligida keng koʻlamli obodonlashtirish, koʻkalamzorlashtirish ishlari amalga oshirilmoqda. Faqat 2023-yil davomida davlat mablagʻi hisobidan Jumurtov, Firdavsiy nomli, Islomobod va Humoyun nomidagi koʻchalarning 2,5 km. qismida piyodalar yoʻlakchasi qurilib, tungi yoritgichlar oʻrnatildi, Birdamlik koʻchasining 2 km. qismiga tosh-shagʻal toʻshaldi. Prezidentimiz tashabbusi bilan har bir mahallaga davlat byudjetidan ajratilgan 500 mln. soʻm mablagʻ hisobidan Birdamlik koʻchasi aholisining elektr energiyasi taʼminotini  yaxshilash maqsadida 1ta 250 kVt kuchlanishga ega transformator, Firdavsiy nomidagi va Islomobod koʻchalari  aholisi uchun 1ta elektr nasos oʻrnatilib berildi. Shuningdek, Olmazor koʻchasiga 1ta, Firdavsiy nomli va Nihol koʻchalariga 1ta bolalar oʻyin maydonchalari qurib berilib, Olmazor koʻchasiga shagʻal-tosh toʻshaldi.

Mahalla aholisining xavfsizligini taʼminlash maqsadida Humoyun nomli koʻchaga 4ta, Islomobod koʻchasiga 1ta kuzatuv kameralari  1-Nihol koʻchalari obodonlashtirilib, 1,5 km. qismiga shagʻal-tosh yotqizildi.

Yoshlar tadbirkorligini rivojlantirishga qaratilgan eʼtibor tufayli mahallada oʻzini-oʻzi band qilgan fuqarolar, tadbirkorlik faoliyatini yoʻlga qoʻyib, doimiy daromad manbaiga ega boʻlgan yoshlar ham talaygina.

MFY raisi A.Madrahimovning faoliyat qoʻlami esa olmazorliklarning yangi-yangi rejalari, orzulari bilan yanada kengayib boraveradi. Ayni paytda mahallada 2024-yil uchun belgilangan rejalarni ado etishga qaratilgan saʼy-harakatlar ham hamjihatlik bilan boshlab yuborildi.

Xususan, Osiyo taraqqiyot banki mablagʻlari hisobidan loyiha qiymati 15,1 mlrd. soʻm boʻlgan 11,6 km. masofadagi yoʻlni betonlashtirish, 2024-2025-yillarda Birdamlik va Yangibogʻ koʻchalari oraligʻida 120-oʻrinli MTT binosini qurish, Nihol va Firdavsiy nomidagi koʻchalarning 2 km. qismini asfaltlash, Birdamlik, Islomobod, Nihol koʻchalariga tungi yoritgichlar oʻrnatish, piyodalar yoʻlakchasi qurish, elektr energiyasi taʼminotini yaxshilash maqsadida 250 kVt kuchlanishga ega 3ta transformator oʻrnatish va oqar suvdan foydalanish sifatini oshirishda tejamkorlikni taʼminlash uchun 2 km. uzunlikda beton ariqchalar qurilishini amalga oshirish, hududdagi “Barkamol avlod” bolalar maktabini rekonstruktsiya qilish rejalashtirilgan.

– Belgilangan ushbu rejaviy ishlarni bajarishda men mahalladoshlarimga suyanaman, – deydi MFY raisi A.Madrahimov. – Maqsadimiz esa bitta – xalqimiz oʻz hayotidan rozi, ertangi kuniga ishonch bilan yashashini taʼminlash.

Ishonch bor joyda oʻsish, rivojlanish boʻladi. Biz ham ishonch bilan ayta olamizki, A.Madrahimov rahbarligida Olmazor MFYda amalga oshirilayotgan ishlarda xalqning ishonchidan kuch olgan taraqqiyot odimlari bor va bu olmazorliklar turmush tarzida, mahallaning koʻrkam  qiyofasida aks etib turibdi.

 Robiya YOʻLDOShEVA.