МАНҒИТ ШАҲРИНИНГ КИЧИК ШАҲАРЧА ҚИЁФАСИНИ ОЛГАН МАҲАЛЛАСИ

Мамлакатимизда маҳалла институтини ривожлантиришга қаратилаётган эътибор ва ғамхўрликнинг мазмун-моҳиятида, аввало инсон омилига эътибор, унинг ҳаётдан рози, обод ва фаровон яшашини таъминлашдек устувор вазифалар мужассам. Маҳалла масъуллари эса ана шу устувор вазифаларни собитқадамлик билан бажаришга ҳамиша бурчлидирлар.

Манғит шаҳрининг Олмазор маҳалласи Амударё туманидаги ҳар томонлама, айниқса, инфратузилмаси жадал ривожланаётган маҳаллаларидан бири саналади. Айни пайтда 1025та оилада 3242 нафар аҳоли истиқомат қилаётган маҳалла ҳудудида замон талаблари даражасидаги истироҳат боғи, Амударё тарихий-ўлкашунослик музейи, 4та болалар боғчаси, “Sayamed” кўз касалликлари клиникаси, 1та мини стадион, Амударё БЎСМ ва унга тегишли марказий ўйингоҳ, ёпиқ бассейн, Мактабгача ва мактаб таълими бўлими маъмурий биноси, 82-сонли  умумтаълим мактаби, “Баркамол авлод” болалар мактаби, хорижий тилларга ихтисослашган хусусий мактаб, 3та чойхона, 2та тозаланган сув сотиш шохобчалари, 2та савдо-сотиқ дўкони, 1та АЁҚШ, мебель ишлаб чиқариш, кўрпа қавиш цехлари, замонавий фотостудия мавжуд. Маҳалла инфратузилмасининг замон талаблари даражасида ривожланаётганини ҳисобга олсак, ҳатто Манғит шаҳрининг марказий қисмига нисбатан ҳам қиёфаси кўркам, халқ талаб ва эҳтиёжлари даражасидаги шаҳар ичидаги шаҳарча дейиш мумкин.

Ишсизликка барҳам бериш, ижтимоий ҳимоя дафтарларига киритилган ёшлар, аёл-қизларнинг бандлигини таъминлашда “Маҳалла еттилиги”нинг тутган ўрни муҳим аҳамият касб этмоқда. “Маҳалла еттилиги”нинг ҳамкорликдаги ўрганишлари натижасида ижтимоий ҳимояга муҳтож фуқаролар рўйхатлари шакллантирилиб, 19 нафар фуқаронинг хонадонлари томи шиферлаб берилди, яна 5та хонадон томини шифер билан ёпиш ишлари давом этмоқда.

Ҳудудни энг обод ва фаровон гўшага айлантириш мақсадида МФЙ раиси А.Мадраҳимов раҳбарлигида кенг кўламли ободонлаштириш, кўкаламзорлаштириш ишлари амалга оширилмоқда. Фақат 2023 йил давомида давлат маблағи ҳисобидан Жумуртов, Фирдавсий номли, Исломобод ва Ҳумоюн номидаги кўчаларнинг 2,5 км. қисмида пиёдалар йўлакчаси қурилиб, тунги ёритгичлар ўрнатилди, Бирдамлик кўчасининг 2 км. қисмига тош-шағал тўшалди. Президентимиз ташаббуси билан ҳар бир маҳаллага давлат бюджетидан ажратилган 500 млн. сўм маблағ ҳисобидан Бирдамлик кўчаси аҳолисининг электр энергияси таъминотини  яхшилаш мақсадида 1та 250 кВт кучланишга эга трансформатор, Фирдавсий номидаги ва Исломобод кўчалари  аҳолиси учун 1та электр насос ўрнатилиб берилди. Шунингдек, Олмазор кўчасига 1та, Фирдавсий номли ва Ниҳол кўчаларига 1та болалар ўйин майдончалари қуриб берилиб, Олмазор кўчасига шағал-тош тўшалди.

Маҳалла аҳолисининг хавфсизлигини таъминлаш мақсадида Ҳумоюн номли кўчага 4та, Исломобод кўчасига 1та кузатув камералари  1-Ниҳол кўчалари ободонлаштирилиб, 1,5 км. қисмига шағал-тош ётқизилди.

Ёшлар тадбиркорлигини ривожлантиришга қаратилган эътибор туфайли маҳаллада ўзини-ўзи банд қилган фуқаролар, тадбиркорлик фаолиятини йўлга қўйиб, доимий даромад манбаига эга бўлган ёшлар ҳам талайгина.

МФЙ раиси А.Мадраҳимовнинг фаолият қўлами эса олмазорликларнинг янги-янги режалари, орзулари билан янада кенгайиб бораверади. Айни пайтда маҳаллада 2024 йил учун белгиланган режаларни адо этишга қаратилган саъй-ҳаракатлар ҳам ҳамжиҳатлик билан бошлаб юборилди.

Хусусан, Осиё тараққиёт банки маблағлари ҳисобидан лойиҳа қиймати 15,1 млрд. сўм бўлган 11,6 км. масофадаги йўлни бетонлаштириш, 2024-2025 йилларда Бирдамлик ва Янгибоғ кўчалари оралиғида 120 ўринли МТТ биносини қуриш, Ниҳол ва Фирдавсий номидаги кўчаларнинг 2 км. қисмини асфальтлаш, Бирдамлик, Исломобод, Ниҳол кўчаларига тунги ёритгичлар ўрнатиш, пиёдалар йўлакчаси қуриш, электр энергияси таъминотини яхшилаш мақсадида 250 кВт кучланишга эга 3та трансформатор ўрнатиш ва оқар сувдан фойдаланиш сифатини оширишда тежамкорликни таъминлаш учун 2 км. узунликда бетон ариқчалар қурилишини амалга ошириш, ҳудуддаги “Баркамол авлод” болалар мактабини реконструкция қилиш режалаштирилган.

– Белгиланган ушбу режавий ишларни бажаришда мен маҳалладошларимга суянаман, – дейди МФЙ раиси А.Мадраҳимов. – Мақсадимиз эса битта – халқимиз ўз ҳаётидан рози, эртанги кунига ишонч билан яшашини таъминлаш.

Ишонч бор жойда ўсиш, ривожланиш бўлади. Биз ҳам ишонч билан айта оламизки, А.Мадраҳимов раҳбарлигида Олмазор МФЙда амалга оширилаётган ишларда халқнинг ишончидан куч олган тараққиёт одимлари бор ва бу олмазорликлар турмуш тарзида, маҳалланинг кўркам  қиёфасида акс этиб турибди.

 Робия ЙЎЛДОШЕВА.