Onajonlarim!

(Barcha munis va mehribon onajonlarga bagʻishlayman.)

Quyoshim, deyinmi, osmonda oyim,

Mehr-u muhabbati ummon, daryoyim.

Ismingiz Guljamol, Oygul, Guloyim,

Bormikan dunyoda sizdek muloyim –

Mulki davlatlarim – onajonlarim.

Onamga oʻxshaydi yurishlaringiz,

“Jonim bolam”, deya suyishlaringiz.

Qiynalsam, onamday kuyishlaringiz,

Boʻylarimga boqib turishlaringiz –

Shunchalar yoqimli onajonlarim.

Bahorga mengzasam, bahor mahliyo,

Yuzingizga boqsam, jahoniy ziyo.

Iymondan yoʻgʻrilgan Alloh zikri, yo

Tilingizda bilmam, bormi margiyo,

Poyi jannatlarim – onajonlarim.

Uyim, joyim, deya yaxshi yeb-ichmay,

Yupun yelkasiga yangisin yopmay,

Oftobda oʻngigan roʻmolin yechmay,

Yorugʻ niyatlardan bir lahza kechmay,

Yashagan mardlarim – onajonlarim.

Bedorlik dashtida tunlar adashar,

Kunduzlar adashar, tonglar adashar.

Faqat ikki yurak jon-u tan yashar,

Adashmay goʻdagi bilan tillashar –

Dunyoni ulgʻaytgan onajonlarim.

Ona yer, quyoshli osmonlar aytsin,

Sabrli, bardoshli boʻlgʻonlar aytsin.

Joʻyaklarda koʻzi yorganlar aytsin,

Olti million, degan farmonlar aytsin –

Egilib, sinmagan onajonlarim.

Ayting, ne desangiz barini qilay,

Sizga kelgan gʻamni oʻzimga olay.

Ashʼor bitayinmi, oʻzim oʻrgilay,

Qadr-u qimmatingiz boshimga qoʻyay,

Qadri balandlarim – onajonlarim.

Qarang, chiroy ochib borar maʼvolar,

Tinchlik, totuvlikdan soʻlim havolar.

Boqsam, toʻrt tarafda joʻshqin navolar,

Duoga qoʻl ochib turar momolar –

Duolari darmon onajonlarim.

Manglayida quyosh misli tojisar,

Har biri muhtaram, aziz, moʻʼtabar.

Qizlari mohiroʻy, oʻgʻloni sarvar,

Barcha millat birday bagʻriga sigʻar –

Mehri ummonlarim – onajonlarim!

Robiya shod aytar, oʻzim aylanay,

Poyingizga mehr boʻlib toʻkilay.

Bir ona boʻlayin! Bir ona boʻlay!

Sizdayin ilohiy qudratga toʻlay,

Duogoʻy, farishta – onajonlarim!

Quyoshim, deyinmi, osmonda oyim...

Robiya YOʻLDOShEVA.