“Adolat” SDP deputati oʻz saylovchilari bilan uchrashdi

Bugun hayot shiddat bilan oʻzgarib, kundan-kunga ol­dimizga yangi talablar qoʻymoqda. Ana shunday bir vaziyatda xalq vakili boʻlgan deputat hayotni ziyrak boʻlib kuzatib borishi, oʻylashi, aholini tashvishlantirib kelayot­gan masalalarni hal etish choralarini doimiy izlashi kerak.

 Xalq deputatlari Amudaryo tuman Kengashiga “Adolat” sotsial-demokratik partiyasidan saylangan deputat Akbar Rajapov ham oʻz deputatlik burchini his qilib oldiga qoʻyilgan vazifalarni sidqidildan bajarmoqda. Deputat 28-“Daryo boʻyi” saylov okrugidan tuman Kengshi deputatligiga saylangan kundan eʼtiboran aholi muammolari bilan tizimli ravishda ishlab kelmoqda.

 Bugun deputat tomonidan hududlarda oʻtkazilayotgan sayyor qabullar hamda uchrashuvlar oʻzining ijobiy samarasini bermoqda. Sababi, aholi muammolarini joylarga chiqqan holda oʻrganish, ular bilan yuzma-yuz koʻrishib murojaatlarini tinglash qolaversa, fuqarolarning davlat idoralariga murojaat qilishlarida qulayliklar yaratish har qachongidan ham muhim va dolzar ahamiyat kasb etadi.

4-mart kuni deputat Akbar Rajapov hamda partiyaning deputatlik guruhi aʼzolari tomonidan Besh tom mahalla fuqarolar yigʻinida aholi bilan uchrashuv boʻlib oʻtdi. Uchrashuvda mahalla raisi Ozod Seytimov, mahallaga biriktirilgan hokim yordamchisi Jasur Yermetov, Yoshlar yetakchisi Husan Ashirbayevlar ham qatnashib aholining muammo va takliflaridan iborat murojaatlarini tinglashdi.

Uchrashuv davomida oʻz tadbirkorlik faoliyatini yoʻlga qoʻyishni istagan fuqarolardan Bozorgul Saparova aholini toza ichimlik suvi bilan taʼminlash istagi borligini bildirib, suv tozalovchi uskuna olishda amaliy yordam berilishini, Oʻrozbika Oʻtamuratova imtiyozli kredit ajratilishi boʻyicha, hamda Oʻrazimbat Saparniyazov yer ajratilishi masalalarida murojaat qilishdi. Murojaatlar deputat tomonidan qayd etib borildi. Hamda tegishli tartibda tushuntirishlib tez kunda hal etilishiga kelishib olindi.

Shundan soʻng, mahalla hududida yashovchi fuqarolar tomonidan ekin yerlarini sugʻorishda muammolar mavjudligi boʻyicha murojaat kelib tushdi. Deputat tomonidan shu yerning oʻzida tegishli chora −tadbirlar ishlab chiqilib texnik vositalar jalb qilindi hamda ariqlar tozalanib oqova suv yoʻli kengaytirildi.

Bundan tashqari, “Adolat” sotsial-demokratik partiyasi deputatlik guruhi aʼzolari ham “Temir daftar” va “Ayollar daftari” da turuvchi Qurol Bekenov, Flyura Xolbayeva, Nodira Jumaniyazova, Gulasal Kamalova hamda Gulbahor Xolimbetovalar holidan xabar olib 1 qop un tarqatishdi. Fuqarolar koʻrsatilgan eʼtibor va gʻamxoʻrlikdan mamnun boʻlishib deputatlarga minnaddorlik bildirishdi.

Shu kunga qadar aholining turmush darajasini koʻtarish, ijtimoiy jihatdan muhtoj aholining huquqiy muhofazasini taʼminlash borasida partiya tashabbusi bilan koʻplab takliflar kiritilib kelingan. Partiyalardan tuman Kengashiga saylangan barcha deputatlar oʻz dasturlaridan kelib chiqib oʻz faoliyatlarini samarali tarzda amalga oshirishmoqda.

Shu oʻrinda aytish kerakki, har bir siyosiy partiya oʻzgacha qarashlar va tamoyillarga asoslansa ham, ular asosiy maqsad − Vatan ravnaqi yoʻlida birlashadilar.

Oʻ.Yuldashev, “Adolat ” SDP Amudaryo tuman Kengashi raisi