OPPOQ TONG KUYChISI

1-mart – Oʻzbekiston xalq shoirasi Zulfiyaxonim tavallud topgan kun
“… togʻdek bardoshi bilan vafo va sadoqat ramziga aylangan Zulfiya opa singari ayollar har qanday yuksak hurmat va ehtiromga munosibdir”
(Islom Karimov)
Oʻzbek ayolining chinakam timsoli, baxt va hayot kuychisi, fidoyi oʻzbek xalqini, tinim bilmas elini oʻz sheʼrlarida madh etgan, vafo va sadoqat ramzi, sabr-u matonati bilan hammaga oʻrnak boʻlaoladigan atoqli oʻzbek shoirasi Zulfiyaxonim siymosida ham insoniylik, ham ayollik fazilatlarining mujassamlashganini koʻrishimiz mumkin.
Mamlakatimizda ahli har bahorni shoira Zulfiya Isroilova tavallud topgan kunni nishonlash bilan kutib olish anʼanaga aylangan. Sevimli shoiramiz Zulfiyaning hayotiy va ijodiy merosi, ayniqsa, Sharq qizlariga, ayollariga oʻrnak boʻladigan maʼnaviy dunyosi, axloqiy qiyofasi xalqimiz tomonidan yuksak qadrlanib kelinmoqda.
Zulfiyaxonim shaxsidagi buyuklikning yana bir ildizi uning ustozlik maqomi bilan chambarchas bogʻliq. U oʻz davrida “yilt” etgan isteʼdodi koʻzga tashlangan har bir yosh ijodkorning yurib kelayotgan soʻqmoqlarini katta yoʻllarga tutashtirgan inson. Shuningdek, Zulfiyaxonim oʻz shogirdlarining ijod mahsullarini mehr nazaridan oʻtkazib, ularga chinakam ijodning sehrini, jilvasini koʻrsatish bilan bir qatorda har birining uchun oʻzini javobgar his etganlar. Bu - ustozlikning, ustozlik maqomining oliy belgisidir. Bugungi kunda Zulfiya nomidagi Davlat mukofoti sohibalari safining kundan-kunga ortib borayotganini koʻrib, ularga havasimiz keladi. Zero, Zulfiyaxonimning oʻzi orzu qilganidek,
Men ketsam, mungʻaymas umrim hech qachon,
Bu bogʻlar bir bogʻ boʻladi hali…
Hayotni, borliqni qanday koʻrish insonning oʻziga, yaʼni “qarash uslubi”ga bogʻliq. Shoira hayotga umid bilan, ishonch-u orzular bilan boqdi hamda sheʼrlarida ham hayotni kuyladi.
Oʻzbek sheʼriyatining peshtoqidagi yorqin yulduzi Zulfiyaxonim nomini biz hamisha yuksak ehtirom ila tilga olamiz. U vafo hamda muhabbatni tarannum etuvchi yetuk shoiradir. Uning hayot yoʻli, ijodi bilan yaqindan tanishar ekanmiz, shoiraning haqiqatan ham komil inson darajasiga yetganining shohidi boʻlamiz. Zulfiyaxonim oʻz sheʼrlari orqali oʻquvchini hamisha samimiy, irodali boʻlishga, hayotni va aziz yurtni ardoqlashga istiqlolning qadriga yetib, yurt ravnaqi yoʻlida xizmat qilish oliy fazilat va majburiyat ekanligini anglab yashashga chorlaydi.

Laylo Olimova.