TANIQLI BIZNESMEN ALIShER QULTAYeV TUMANIMIZ TADBIRKORLARIGA BIZNES-TRENING OʻTDI

Ota-bobolarimizdan qolgan “Argʻamchiga qil - quvvat” degan gap bor. Bu biron ishni boshlayotgan odamga bir ogʻiz shirin soʻz ham madad, deganidir. Chunki shu bir ogʻiz shirin soʻz insonga ulugʻ ishlar qilishiga ishonchini uygʻotib, yanada intilishiga, izlanishiga ragʻbat boʻladi.

Biroq shu narsa aniqki, bugungi kunda ham zamonaviy biznesmenlar xodimlarni boshqarishda, ular faoliyatining samaradorligini oshirishda necha oʻn yillardan buyon amal qilib kelinayotgan usul, yaʼni mukofot va jarima usullaridan foydalanishmoqda.

Keyingi yillarda dunyoda, xususan mamlakatimizda oʻz biznesini muvaffaqiyatli boshqarayotgan rahbarlar toʻgʻri berilgan motivatsiya orqali ish samarasini koʻzlagan darajaga olib chiqishmoqda. Umuman, inson hayotida oʻz karʼerasini rivojlantirish uchun ham, endigina faoliyatini boshlagan tadbirkor uchun ham, tajribali biznesmenlar uchun ham motivatsiyaning oʻrni juda muhim ekanligini bugungi tezkor hayotning oʻzi yaqqol koʻrsatib bermoqda.

16-fevral kuni Amudaryo tumani Madaniyat boʻlimi tomoshalar zalida tumanimizdagi tadbirkorlik faoliyati bilan shugʻullanayotgan, ishbilarmon sifatida ish boshlash istagida boʻlganlar uchun taniqli biznes-trener Alisher Qultayev tomonidan biznes trening oʻtkazildi.

Tadbirkorlik sohasida 9 yillik tajribaga ega biznesmen, 2 oylik biznesni rivojlantirish kursi muallifi, Business Drive, kitapp uz kabi bir necha loyihalar asoschisi boʻlgan Alisher Qultayev biznes treningda “Savdoni oshirishning effektiv usullari” mavzusida, tadbirkorlikda motivatsiyaning oʻrni xususida yigʻilganlarga qiziqarli maʼruza qildi.

Notiqning taʼkidlashicha, shaxsiy hayotda ham, biznesda ham motivatsiyaning oʻrni juda katta. Biznes uchun avvalo puxta ishlangan loyiha va uni muvaffaqiyatli amalga oshirish uchun oʻz-oʻziga ishonch lozim. Bunga qanday erishiladi? Biznes treningda aynan shular haqida soʻz bordi. Shuningdek, tadbirga yigʻilganlar bilan savdoni oshirish yoʻllari, ular faoliyatidagi muammolari, bartaraf etish yoʻl-yoʻriqlari xususida samimiy suhbatlashdi.

Tan olish kerak, bugungi kunda mamlakatimizda tadbirkorlik faoliyati bilan shugʻullanish istagida boʻlganlar uchun koʻpgina imkoniyatlar yaratilgan. Ularning tadbirkor sifatida roʻyxatdan oʻtishidagi byurokratik ovoragarchiliklarga barham berildi, faoliyatini boshlashlari uchun imtiyozli kreditlar berilayapti. Biroq nega bu faoliyatga kirib kelgan insonlarning hammasi ham oʻz biznes loyihalarini muvaffaqiyatli amalga oshirib keta olmayapti? Nega tadbirkor sifatida roʻyxatdan oʻtganlar hademay faoliyatlarini yakunlab qoʻymoqda?

Biznes treningda bu haqda batafsil maʼlumotlar berildi va biznesni muvaffaqiyatli yuritish yoʻl-yoʻriqlari aniq misollar bilan tushuntirildi.

Tadbirkorlar, biznesga qiziqishi bor yoshlar Alisher Qultayevga oʻzlarini qiziqtirgan savollarni berib, tegishli javoblar oldilar.

Taniqli biznesmenning tadbirkorlik yuritish borasidagi darsi ishtirokchilarda ulkan taassurotlar qoldirdi.

Oygul RAJABOVA.