ТАНИҚЛИ БИЗНЕСМЕН АЛИШЕР ҚУЛТАЕВ ТУМАНИМИЗ ТАДБИРКОРЛАРИГА БИЗНЕС-ТРЕНИНГ ЎТДИ
Ота-боболаримиздан қолган “Арғамчига қил - қувват” деган гап бор. Бу бирон ишни бошлаётган одамга бир оғиз ширин сўз ҳам мадад, деганидир. Чунки шу бир оғиз ширин сўз инсонга улуғ ишлар қилишига ишончини уйғотиб, янада интилишига, изланишига рағбат бўлади.
Бироқ шу нарса аниқки, бугунги кунда ҳам замонавий бизнесменлар ходимларни бошқаришда, улар фаолиятининг самарадорлигини оширишда неча ўн йиллардан буён амал қилиб келинаётган усул, яъни мукофот ва жарима усулларидан фойдаланишмоқда.
Кейинги йилларда дунёда, хусусан мамлакатимизда ўз бизнесини муваффақиятли бошқараётган раҳбарлар тўғри берилган мотивация орқали иш самарасини кўзлаган даражага олиб чиқишмоқда. Умуман, инсон ҳаётида ўз каръерасини ривожлантириш учун ҳам, эндигина фаолиятини бошлаган тадбиркор учун ҳам, тажрибали бизнесменлар учун ҳам мотивациянинг ўрни жуда муҳим эканлигини бугунги тезкор ҳаётнинг ўзи яққол кўрсатиб бермоқда.
16 февраль куни Амударё тумани Маданият бўлими томошалар залида туманимиздаги тадбиркорлик фаолияти билан шуғулланаётган, ишбилармон сифатида иш бошлаш истагида бўлганлар учун таниқли бизнес-тренер Алишер Қултаев томонидан бизнес тренинг ўтказилди.
Тадбиркорлик соҳасида 9 йиллик тажрибага эга бизнесмен, 2 ойлик бизнесни ривожлантириш курси муаллифи, Business Drive, kitapp uz каби бир неча лойиҳалар асосчиси бўлган Алишер Қултаев бизнес тренингда “Савдони оширишнинг эффектив усуллари” мавзусида, тадбиркорликда мотивациянинг ўрни хусусида йиғилганларга қизиқарли маъруза қилди.
Нотиқнинг таъкидлашича, шахсий ҳаётда ҳам, бизнесда ҳам мотивациянинг ўрни жуда катта. Бизнес учун аввало пухта ишланган лойиҳа ва уни муваффақиятли амалга ошириш учун ўз-ўзига ишонч лозим. Бунга қандай эришилади? Бизнес тренингда айнан шулар ҳақида сўз борди. Шунингдек, тадбирга йиғилганлар билан савдони ошириш йўллари, улар фаолиятидаги муаммолари, бартараф этиш йўл-йўриқлари хусусида самимий суҳбатлашди.
Тан олиш керак, бугунги кунда мамлакатимизда тадбиркорлик фаолияти билан шуғулланиш истагида бўлганлар учун кўпгина имкониятлар яратилган. Уларнинг тадбиркор сифатида рўйхатдан ўтишидаги бюрократик оворагарчиликларга барҳам берилди, фаолиятини бошлашлари учун имтиёзли кредитлар берилаяпти. Бироқ нега бу фаолиятга кириб келган инсонларнинг ҳаммаси ҳам ўз бизнес лойиҳаларини муваффақиятли амалга ошириб кета олмаяпти? Нега тадбиркор сифатида рўйхатдан ўтганлар ҳадемай фаолиятларини якунлаб қўймоқда?
Бизнес тренингда бу ҳақда батафсил маълумотлар берилди ва бизнесни муваффақиятли юритиш йўл-йўриқлари аниқ мисоллар билан тушунтирилди.
Тадбиркорлар, бизнесга қизиқиши бор ёшлар Алишер Қултаевга ўзларини қизиқтирган саволларни бериб, тегишли жавоблар олдилар.
Таниқли бизнесменнинг тадбиркорлик юритиш борасидаги дарси иштирокчиларда улкан таассуротлар қолдирди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
