HAMJIHATLIKDA QILINGAN MEHNATDA BARAKA BOʻLADI

Inson dunyoda mehnat bilan ulugʻ martabalarga erishadi. Keyingi yillarda Prezidentimiz Sh.Mirziyoyev  tashabbusi bilan agrar sohaga, xalqimizning rizqi butun, dasturxoni toʻkinligi yoʻlida yozning jaziramasi-yu, qishning qahratonida ham tinmay fidoyilik qiladigan qishloq xoʻjaligi mehnatkashlariga ulkan eʼtibor qaratilmoqda. Qishloq  xoʻjaligi xodimlari kuni belgilangani, agrar sohada faoliyat yuritayotganlar uchun koʻkrak nishonlari taʼsis etilgani ham shular jumlasidandir.

Men “Qishloq xoʻjaligi fidoyisi” koʻkrak nishoni bilan taqdirlangan kunimni hayotimning eng yorqin kunlaridan biri boʻldi, deya olaman. Mehnatlaring eʼtirof etilishi odamga yana ham kuch-quvvat bagʻishlaydi. 2004-yilda “Bogʻi eram” fermer xoʻjaligini tashkil etgan edim. Shundan beri nomi bir necha marta oʻzgardi. Biroq har yili ekin maydonlardan moʻl hosil yetishtirib kelayapmiz.

Tilsiz zamin bagʻriga urugʻ qadab, hosil undirish oson emas. Buning uchun yerning tilini bilish, omilkorlik  kerak, agrotexnik tadbirlarni oʻz vaqtida bajarish lozim. Yana dehqonlarda yil-yilga oʻxshamaydi, degan  ibora bor. Bu goh qurgʻoqchilik, goh namgarchilik yuqori boʻlsa-da, hosil undirishning chorasini qilish kerak, degani.

Biz xoʻjaligimiz aʼzolari bilan hamjihatlikda qilgan mehnatlarimiz tufayli 2021-yilda ham dehqonchilikning barcha turlari boʻyicha rejalarimizni ortigʻi bilan ado etdik va mahsulot yetishtirish xarajatlari, ish haqlaridan tashqari, 500 milliondan ziyod sof daromad oldik. 34 gektar yerdagi bugʻdoydan 60-70 tsentnerdan hosil yetishtirdik. Paxta maydonlarimiz hosildorligi gektariga 36-45 tsentnergacha boʻldi.

Xoʻjaligimizda dehqonchilikdan olinayotgan daromadlarimizdan yangi texnikalar xarid qilayapmiz. Hozir yerlarni tekislashdan tortib, ekish, parvarishlash, hosilini  yigʻishtirib olishgacha boʻlgan barcha ishlarda oʻz texnikalarimizdan foydalanamiz. Oʻtgan yilgi daromadimizdan lazer qurilmali yer tekislagich agregatini xarid qilganimiz tufayli ekin maydonlarimiz 100 foiz tekislandi va sugʻorishga tayyorlandi. Bundan tashqari, ekin maydonlarimizni suv tejovchi texnologiyalar  yordamida sugʻorish choralarini  koʻrayapmiz. 100 tonnalik sigʻimli muzlatkich omborxonamizda 2 gektarlik bogʻimizda yetishtirilgan mevalar, shuningdek, sabzavotlar saqlanayapti. 8 nafar mexanizator, 40 nafar pudratchilarimizning oylik ish haqlari doimo oʻz vaqtida hisob-kitob qilib borilayapti.

Oʻtgan yili xoʻjaligimizning 14 gektar gʻalladan boʻshagan yerida  pudratchilarimizga va hududimizdagi 20 ta kam taʼminlangan oilalarga takroriy ekin ekib berdik. Ehtiyojmand 10 ta oilani otaliqqa olib, vaqtida moddiy-maʼnaviy qoʻllab kelayapmiz.

Fermer xoʻjaligini boshqarishdan tashqari, mana uch yildirki, tuman Dehqon, fermer va tomorqa yer egalari Kengashiga ham raislik qilib kelayapman. Kengashimiz tomonidan tumanimiz aholisini tomorqa yerlardan samarali foydalanish targʻib etilib, bu borada qatʼiy nazorat ham olib borilayapti, ularga dehqon, fermer xoʻjaliklariga zarur tavsiya va koʻrsatmalar ham berilayapti. Mehnatlarimiz mahsulini yurtdoshlarimiz dasturxonida koʻrish ham ulkan baxt.

Ilhom POLVONOV, tuman Fermer, dehqon xoʻjaliklari va tomorqa yer egalari Kengashi raisi,

“Qishloq xoʻjaligi fidoyisi” koʻkrak nishoni sohibi.