Mangʻitda yangi va zamonaviy «Rizq-baraka» supermarketi ish boshladi

29-mart kuni Amudaryo tumanining Mangʻit shahri markazida qad rostlagan zamonaviy va koʻrkam maskan — "Rizq-baraka" supermarketining tantanali ochilish marosimi boʻlib oʻtdi. Tadbirda keng jamoatchilik vakillari, nuroniylar va yoshlar jam boʻlib, yangi majmuaning ish boshlashini katta shodiyona bilan qarshi oldilar.

Marosimda ishtirok etgan Amudaryo tumani hokimi Sobir Xoʻjametov yigʻilganlarni qutlar ekan, bugungi kunda yurtimizda davlatimiz rahbari boshchiligida tadbirkorlikni qoʻllab-quvvatlash, xususiy sektorga keng yoʻl ochish borasida amalga oshirilayotgan tizimli islohotlarning ahamiyatiga alohida toʻxtalib oʻtdi. Taʼkidlandiki, kichik biznes va xususiy tadbirkorlik vakillari uchun yaratilayotgan imtiyozlar, byurokratik toʻsiqlarning bartaraf etilishi va qulay investitsiya muhiti yaratilishi mana shunday zamonaviy obʼektlarning koʻpayishiga zamin yaratmoqda. Tuman hokimi oʻz nutqida yangi supermarket nafaqat aholiga qulaylik yaratishini, balki yangi ish oʻrinlari ochilishi orqali mahalliy aholi bandligini taʼminlashga ham xizmat qilishini eʼtirof etib, majmua jamoasiga va tadbirkorlarga kelgusi faoliyatlarida ulkan zafarlar tiladi.

Mazkur yangi savdo majmuasi oʻz nomiga mos ravishda toʻkin-sochinlik va fayz-baraka maskani, desak mubolagʻa boʻlmaydi. Supermarketning ichki dizayni va mahsulotlarning joylashtirilishi eng zamonaviy standartlarga javob beradi. Binoga qadam qoʻygan har bir xaridor avvalo kenglik va yorugʻlikni, soʻngra peshtaxtalardagi xilma-xillikni his etadi. Bu yerda kundalik hayot uchun zarur boʻlgan barcha turdagi oziq-ovqat mahsulotlari, yangi uzilgan sarxil qishloq xoʻjaligi neʼmatlaridan tortib, turli xildagi nooziq-ovqat tovarlari va roʻzgʻor buyumlarigacha mavjud.

Supermarket maʼmuriyati mahsulotlar sifatiga va ularning yangiligiga alohida eʼtibor qaratadi. Ayniqsa, mahalliy ishlab chiqaruvchilar va fermer xoʻjaliklari bilan toʻgʻridan-toʻgʻri aloqalar oʻrnatilgani bois, qishloq xoʻjaligi mahsulotlarining sarxilligi va tabiiyligi taʼminlangan. Bu esa supermarketni Mangʻit shahri aholisining ogʻirini yengil, uzogʻini yaqin qiladigan, bir manzilning oʻzida barcha ehtiyojlarni qondirish imkonini beradigan majmuaga aylantirdi. Peshtaxtalardan oʻrin olgan har bir mahsulot xaridorlarning talab va istaklarini oʻrgangan holda tanlangan boʻlib, bu yerda ham oilaviy xaridlar, ham individual ehtiyojlar uchun barcha sharoitlar muhayyo qilingan.

Supermarketning eng muhim va diqqatga sazovor jihatlaridan biri — bu mahsulotlarning narx-navosidir. Isteʼmol bozorida raqobat kuchayib borayotgan bir davrda, "Rizq-baraka" supermarketi rahbariyati xalqchil narx siyosatini yuritishni oʻz oldiga maqsad qilib qoʻygan. Narxlarning hamyonbopligi va turli aktsiyalarning yoʻlga qoʻyilishi aholining xarid qobiliyatini oshirishga va oilaviy byudjetini tejashga xizmat qiladi. Bu esa ijtimoiy yoʻnaltirilgan tadbirkorlikning yorqin namunasidir.

Ochilish marosimiga yigʻilgan aholi vakillari – ilk xarijorlar mazkur maskanning ish boshlashidan mamnun ekanliklarini, ayniqsa xizmat koʻrsatish madaniyati yuqori ekanligini alohida taʼkidladilar. Xushmuomala sotuvchilar va tezkor kassa xizmati mijozlarning vaqtini tejash va ularga sifatli xizmat koʻrsatish imkonini beradi. Majmuaning texnik jihozlanishi, sovitish tizimlari va saqlash kameralari mahsulotlarning sifatini uzoq vaqt davomida asl holida saqlashga kafolat beradi.

Xulosa oʻrnida aytish mumkinki, Mangʻit shahrining Gulzor mahallasida qad rostlagan va 25 nafar ishsiz aholini ish bilan taʼminlagan ushbu yangi savdo majmuasi Amudaryo tumanining iqtisodiy salohiyati ortib borayotganining yana bir amaliy ifodasi boʻldi. Bu kabi loyihalarning amalga oshirilishi xalqimizning turmush farovonligini yuksaltirish, hududlarda zamonaviy infratuzilmani rivojlantirish va tadbirkorlikka keng yoʻl ochish borasidagi davlat siyosatining natijasidir.

"Rizq-baraka" supermarketi endilikda nafaqat savdo maskani, balki aholi uchun qulaylik, sifat va ishonch ramziga aylanishi shubhasiz. Zero, tadbirkorlik rivojlangan yurtda toʻkinlik, baraka va taraqqiyot bardavom boʻlaveradi.

Yangi maskanning ochilishi esa tuman ahli uchun bahorning ilk oyida munosib sovgʻa boʻldi. Bunday xayrli ishlarning davomiyligi yurtimizdagi tinchlik va barqarorlikning, mehnatkash xalqimizning porloq kelajak sari tashlayotgan dadil qadamlarining samarasidir. Endilikda Mangʻitliklar oʻzlariga yaqin va qulay boʻlgan, barcha sharoitlarga ega maskanda koʻngildagidek xaridlarni amalga oshirishlari mumkin. Bu esa inson qadri ulugʻlangan yurtda har bir fuqaroning manfaati va qulayligi ustuvor ekanining yana bir isbotidir.