Hokim yordamchisining dastlabki ish kuni

Mamlakatimizda muhtaram Prezidentimizning 2021-yil 3-dekabrda qabul qilgan “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha hokim yordamchilari faoliyatini tashkil etish chora-tadbirlari toʻgʻrisida”gi qaroriga muvofiq barcha ovul, mahalla va shaharcha fuqarolar yigʻinlarida hokim yordamchilari faoliyati yoʻlga qoʻyildi. Tumanimizda ham ushbu lavozimlarga tanlov asosida oliy maʼlumotli, iqtisodiyot sohasida kamida 2-yil mehnat stajiga ega boʻlgan, hududning shart-sharoitini yaxshi biladigan, iqtidorli mutaxassislar tayinlandi. Ular faoliyatida amalga oshirilishi lozim boʻlgan vazifalari xususida maxsus oʻqitildi va seminar-treninglarda qatnashib, keng tushunchalarga ega boʻlib, xizmat lavozimiga kirishdilar.

Amudaryo tumanining Oʻrta qaʼla ovulida avval iqtisodiyot tarmoqlarida masʼul lavozimlarda ishlab, ulkan tajriba toʻplagan Hamza Haytimbetov hokim yordamchisi sifatida ish boshladi.

Ushbu ovulda bugungi kunda 812 xonadonda 4910 nafar aholi istiqomat qiladi. Ovul aholisi asosan dehqonchilik, parrandachilik va chorvachilik bilan shugʻullanadi. Azal-azaldan mehnatkash, oʻz intilishlari tufayli farovon hayot kechirib kelayotgan ovul aholisining yarmidan koʻpini yoshlar tashkil qilishini, ular orasida ishga yaroqli, ishsizlar ham shuningdek, ehtiyojmand oilalar ham borligi bois hokim yordamchi oʻz ishini avvalo xonadonma-xonadon yurib, har bir oilaning haqiqiy ahvoli bilan tanishishdan boshladi.

Ovul fuqarolar yigʻini raisi Baxtiyor Davekov, harbiy hisob boʻlimi mutaxassisi Ozodboy Oʻrozaliyevlar bilan birgalikda xonadonma-xonadon oʻrganishlar olib borishayapti.

Oʻrganishlar dastlab 3-Qumariq koʻchasi, 16 uyda yashovchi Mahmud Xudoyberganov xonadonidan boshlandi, oila boshligʻining oʻgʻli Gʻayrat Hayitboyev bilan suhbatlashdi. Ushbu xonadonda 6 bosh sogʻin sigiri borligini inobatga olib, faoliyatini kengaytirish taklifini berdi va bu borada yaratilayotgan imkoniyatlar, xususan imtiyozli kredit olish mumkinligini tushuntirdi.

Asli yakka tadbirkorlik bilan shugʻullanayotgan ushbu oilada 2 ta zamonaviy tegirmoni ishlab turibdi. Endilikda chorva uchun yem ishlab chiqarishni yoʻlga qoʻyish imkoniyati ham mavjud ekanligi maʼlum boʻldi. Shunday qilib, ushbu oila uning ish daftariga bank krediti hisobiga tadbirkorligini kengaytirishi mumkinligi qayd etildi.

2-Qumariq koʻchasi 4-uyda yashovchi Nurbek Ismoilov bilan oʻtkazilgan suhbat jarayonida ushbu oila tomorqasida bogʻdorchilik bilan shugʻullanishi, 100 tupdan ziyod mevali daraxtlaridan har yili moʻl hosil olib kelayotganligi, endilikda ixcham issiqxona tashkil etib, ertagi sabzavotlar yetishtirish rejasi borligi maʼlum boʻldi va bu borada uni qoʻllab-quvvatlashini, amaliy yordam berishini bildirdi.

Maʼlumki, hokim yordamchilari mahallada tadbirkorlikni rivojlantirish va yangi ish joylarini yaratishga masʼul boʻlib, yer, kredit, infratuzilma, kasbga oʻqitish va boshqa zaruriy koʻmak berish tizimini yoʻlga qoʻyadi, oʻz “byudjeti” boʻlib, ehtiyojmand oilalarga subsidiyalar ajratish, jamoat ishlariga jalb qilishni tashkillashtiradi.

Har bir oila – oʻziga xos bir olam. Ularning turmushlari farovon boʻlishi, hayot sifati oshishida ovul va mahallalarda faoliyat boshlayotgan barcha hokim yordamchilari munosib hissa qoʻshishiga ishonamiz.

Oygul Rajabova.