Voyaga yetmaganlarning qishki taʼtil kunlarida qarovsiz qolishlarining oldini olish maqsadida reydlar oʻtkazilmoqda

Ichki ishlar organlari tomonidan tegishli tashkilotlar bilan hamkorlikda voyaga yetmaganlarning qarovsiz va nazoratsiz qolishining, huquqbuzarliklar sodir etishining oldini olish masalalariga alohida eʼtibor qaratilmoqda.

Amudaryo tumanda aholining umumiy soni 203 ming 600 nafar boʻlib, shundan voyaga yetmaganlar 74 ming 200  nafarni tashkil qiladi. Tuman Ichki ishlar boʻlimi huquqbuzarliklar profilaktikasi boʻlinmasi voyaga yetmaganlar masalalari boʻyicha inspektor psixologlari bolalarning hamda voyaga yetmaganlarning qishki taʼtil kunlarida qarovsiz qolishlarining oldini olish maqsadida taʼtil kunlarida jamoat joylarida reydlar oʻtkazmoqdalar.

Reydlar davomida voyaga yetmaganlarning jamoat joylarida tungi vaqtlarda maqsadsiz yurishlari, voyaga yetmaganlar mehnatidan noqonuniy foydalanish va boshqa huquqbuzarliklar aniqlanib, tegishli choralar koʻrilmoqda.

Reydlarda ota-onalarga ham bolalar bilan bogʻliq kutilmagan vaziyatlarning oldini olish, ayniqsa, agar ular kattalar nazoratisiz uyda qoldirilgan boʻlsa, ularning xavfsizligini taʼminlash boʻyicha tavsiyalar berilmoqda.

Maʼlumot tariqasida aytish kerakki, dunyo miqyosida sodir etilayotgan jinoyatlarning oʻndan biri hali voyaga yetmagan bolalar hissasiga toʻgʻri keladi. Shu sababli voyaga yetmaganlar oʻrtasida jinoyatchilik va huquqbuzarliklar profilaktikasiga katta eʼtibor qaratilmoqda.

Oʻtgan 2021-yil davomida voyaga yetmaganlar ishlari boʻyicha Amudaryo tumani idoralararo komissiyaning 12 ta majlisi oʻtkazilgan boʻlib, ularda voyaga yetmagan oʻquvchilarning taʼlim olishi, voyaga yetmaganlar oʻrtasida nazoratsizlik, qarovsizlik, huquqbuzarliklar va boshqa gʻayriijtimoiy xatti-harakatlar, voyaga yetmaganlarning huquqlari, erkinliklari va qonuniy manfaatlari himoya qilinishini taʼminlash yuzasidan jami 12 ta masalalar koʻrilgan.

Komissiya majlislarida 94 ta ishlar koʻrilgan boʻlib, ularning 10 tasini huquqbuzarlik va gʻayriijtimoiy xatti-harakatlar sodir etgan voyaga yetmaganlarga nisbatan koʻrilgan ishlar, 1 tasini taʼlim muassasasi mashgʻulotlariga sababsiz kelmagan yoki muntazam ravishda qatnashmayotgan voyaga yetmaganlarga nisbatan koʻrilgan ishlar va 83 tasini voyaga yetmaganlarni taʼlim muassasasi oʻquvchilari safidan chiqarish haqidagi ishlar tashkil qilgan.

Oʻtgan yil davomida voyaga yetmaganlarning ota-onalari yoki ularning oʻrnini bosuvchi shaxslarga nisbatan Maʼmuriy javobgarlik toʻgʻrisidagi Kodeksning 47-moddasi 1-qismi, yaʼni ota-onalar yoki ularning oʻrnini bosuvchi shaxslar tomonidan voyaga yetmagan bolalarni tarbiyalash va ularga taʼlim berish borasidagi majburiyatlarni bajarmaslik, shu jumladan voyaga yetmagan bolalarning maʼmuriy huquqbuzarlik sodir etishiga olib kelish holatlari boʻyicha jami 10 ta ishlar koʻrilgan.

Komissiya tomonidan voyaga yetmaganlar oʻrtasida nazoratsizlik va huquqbuzarliklar profilaktikasini amalga oshiruvchi organlar va muassasalarda 5 ta, taʼlim muassasalarida, madaniy-maʼrifiy, jismoniy tarbiya va sport muassasalarida 5 ta tekshirishlar oʻtkazilgan.

Voyaga yetmaganlarning huquq va majburiyatini tushuntirish, ular bilan ishlashning oʻziga xos jihatlari boʻyicha 32 ta davra suhbatlari, 36 ta yigʻilishlar oʻtkazilib, ommaviy axborot vositalarida 8-marta chiqishlar qilingan.

Amudaryo tumani Ichki ishlar boʻlimi huquqbuzarliklar profilaktikasi boʻlinmasi voyaga yetmaganlar masalalari boʻyicha inspektor psixologlari tomonidan oʻtkazilayotgan reyd tadbirlari ham voyaga yetmaganlar oʻrtasida jinoyatchilik va huquqbuzarliklarning oldini olishda muhim ahamiyat kasb etadi.