Amudaryo tumanida voyaga yetmaganlar xavfsizligi: tungi reydlar va natijalar

Amudaryo tumanida yoshlarning kelajagi va ularning xavfsizligini taʼminlash maqsadida profilaktik tadbirlar izchil davom ettirilmoqda. Xususan, voyaga yetmaganlarning tungi vaqtda nazoratsiz qolishi hamda turli koʻngilochar maskanlarda qonuniy vakillarisiz boʻlishining oldini olish bugungi kunning eng dolzarb vazifalaridan biriga aylangan.

Shu maqsadda, Amudaryo tumani Ichki ishlar boʻlimi Jamoat xavfsizligi xizmati Huquqbuzarliklar profilaktikasi boʻlinmasi hamda voyaga yetmaganlar masalalari boʻyicha inspektor-psixologlar tomonidan keng koʻlamli tungi reydlar muntazam ravishda oʻtkazib kelinmoqda.

Navbatdagi shunday tadbir avvalida ham tuman Ichki ishlar boʻlimi boshligʻi oʻrinbosari podpolkovnik Sharapat Joldasbayev tomonidan shaxsiy tarkibga aniq va qatʼiy koʻrsatmalar berildi. Mazkur topshiriqlarga koʻra, har bir tekshiruv fuqarolarning huquqlarini hurmat qilgan holda, yuksak xizmat madaniyati asosida olib borilishi qatʼiy belgilandi. Shuningdek, 18 yoshga toʻlmagan shaxslar aniqlanganda ularning hujjatlarini tekshirish, muloyim va tarbiyaviy ruhda suhbatlashish hamda ularni oʻz ota-onalariga topshirish jarayonida kattalar bilan ham jiddiy tushuntirish ishlarini olib borish vazifasi yuklatildi. Koʻngilochar maskanlar egalariga esa qonunchilik talablarini yana bir bor tushuntirish orqali takroriy huquqbuzarliklarning oldini olish zarurligi alohida taʼkidlandi.

Tungi reydlar davomida ichki ishlar organlari xodimlari internet-kafelar, kompyuter klublari, restoranlar, kafelar, barlar va tungi klublar kabi qator obʼektlarni koʻzdan kechirdilar. Ushbu tadbirlarning asosiy maqsadi yoshlarni jazolash emas, balki ularning hayoti va sogʻligʻini muhofaza qilish, tunda nazoratsiz yurib jinoyat qurboniga yoki ishtirokchisiga aylanib qolishining oldini olishdir.

Maʼlumki, soat 22:00 dan to 06:00 ga qadar voyaga yetmagan fuqarolarning ota-onasi yoki ularning oʻrnini bosuvchi shaxslar hamrohligisiz bunday joylarda boʻlishi qatʼiyan taqiqlanadi. Kompyuter zallari va internet-kafelar ham oʻz navbatida yoshlarga oʻquv vaqtida va tunda xizmat koʻrsatmasligi shart. Agar ushbu taqiqlar buzilsa, qonunchilikda qatʼiy javobgarlik choralari koʻzda tutilgan.

Xususan, farzandining tunda nazoratsiz yurishiga yoʻl qoʻygan ota-onalarga nisbatan Maʼmuriy javobgarlik toʻgʻrisidagi kodeksning 47-moddasi asosida chora koʻriladi. Voyaga yetmaganlarni tunda ichkariga kiritgan maskan egalari esa ushbu kodeksning 188²-moddasiga muvofiq bazaviy hisoblash miqdorining 10 baravaridan 15 baravarigacha jarimaga tortilishi yoki ularning faoliyati cheklanishi va hatto toʻxtatilishi mumkin.

Koʻrilayotgan chora-tadbirlarning natijadorligi raqamlarda ham oʻz aksini topmoqda. 2026-yilning dastlabki 4 oyi davomida Amudaryo tumani hududida jami 82 marotaba tungi reyd tadbirlari amalga oshirildi. Bu tekshiruvlar davomida 15 ta qonunbuzilish holati aniqlanib, maskan egalariga nisbatan Maʼmuriy javobgarlik toʻgʻrisidagi kodeksning tegishli moddasiga asosan bayonnomalar rasmiylashtirildi.

Shuningdek, tungi vaqtda maqsadsiz yurgan 42 nafar voyaga yetmagan shaxslar aniqlanib, ularning ota-onalariga kodeksning 47-moddasi asosida tegishli taʼsir choralari qoʻllanildi. Eng achinarlisi, ushbu yoshlarning 10 nafari mutlaqo qarovsiz va nazoratsiz qolganligi sababli ijtimoiy-huquqiy yordam koʻrsatish markazlariga joylashtirildi va ularning qonuniy vakillari zudlik bilan chaqirtirildi.

Bugungi kunda oʻtkazilayotgan bunday tadbirlar faqatgina huquqbuzarliklarni aniqlash va qayd etish bilan cheklanib qolmaydi. Uning negizida yoshlarni toʻgʻri yoʻlga yoʻnaltirish, ularning xavfsizligini taʼminlash va jamiyatda sogʻlom muhitni shakllantirishdek ulugʻvor maqsad yotibdi. Har bir fuqaro, ayniqsa ota-onalar va tadbirkorlar bu borada hushyorlik va yuksak masʼuliyatni his etishlari lozim. Zero, bugun amalga oshirilayotgan har bir saʼy-harakat va nazorat tadbiri ertangi kunimiz egalari boʻlgan yosh avlodning porloq va bexatar kelajagi uchun qoʻyilgan eng muhim qadamdir.