Амударё туманида вояга етмаганлар хавфсизлиги: тунги рейдлар ва натижалар

Амударё туманида ёшларнинг келажаги ва уларнинг хавфсизлигини таъминлаш мақсадида профилактик тадбирлар изчил давом эттирилмоқда. Хусусан, вояга етмаганларнинг тунги вақтда назоратсиз қолиши ҳамда турли кўнгилочар масканларда қонуний вакилларисиз бўлишининг олдини олиш бугунги куннинг энг долзарб вазифаларидан бирига айланган.

Шу мақсадда, Амударё тумани Ички ишлар бўлими Жамоат хавфсизлиги хизмати Ҳуқуқбузарликлар профилактикаси бўлинмаси ҳамда вояга етмаганлар масалалари бўйича инспектор-психологлар томонидан кенг кўламли тунги рейдлар мунтазам равишда ўтказиб келинмоқда.

Навбатдаги шундай тадбир аввалида ҳам туман Ички ишлар бўлими бошлиғи ўринбосари подполковник Шарапат Жолдасбаев томонидан шахсий таркибга аниқ ва қатъий кўрсатмалар берилди. Мазкур топшириқларга кўра, ҳар бир текширув фуқароларнинг ҳуқуқларини ҳурмат қилган ҳолда, юксак хизмат маданияти асосида олиб борилиши қатъий белгиланди. Шунингдек, 18 ёшга тўлмаган шахслар аниқланганда уларнинг ҳужжатларини текшириш, мулойим ва тарбиявий руҳда суҳбатлашиш ҳамда уларни ўз ота-оналарига топшириш жараёнида катталар билан ҳам жиддий тушунтириш ишларини олиб бориш вазифаси юклатилди. Кўнгилочар масканлар эгаларига эса қонунчилик талабларини яна бир бор тушунтириш орқали такрорий ҳуқуқбузарликларнинг олдини олиш зарурлиги алоҳида таъкидланди.

Тунги рейдлар давомида ички ишлар органлари ходимлари интернет-кафелар, компьютер клублари, ресторанлар, кафелар, барлар ва тунги клублар каби қатор объектларни кўздан кечирдилар. Ушбу тадбирларнинг асосий мақсади ёшларни жазолаш эмас, балки уларнинг ҳаёти ва соғлиғини муҳофаза қилиш, тунда назоратсиз юриб жиноят қурбонига ёки иштирокчисига айланиб қолишининг олдини олишдир.

Маълумки, соат 22:00 дан то 06:00 га қадар вояга етмаган фуқароларнинг ота-онаси ёки уларнинг ўрнини босувчи шахслар ҳамроҳлигисиз бундай жойларда бўлиши қатъиян тақиқланади. Компьютер заллари ва интернет-кафелар ҳам ўз навбатида ёшларга ўқув вақтида ва тунда хизмат кўрсатмаслиги шарт. Агар ушбу тақиқлар бузилса, қонунчиликда қатъий жавобгарлик чоралари кўзда тутилган.

Хусусан, фарзандининг тунда назоратсиз юришига йўл қўйган ота-оналарга нисбатан Маъмурий жавобгарлик тўғрисидаги кодекснинг 47-моддаси асосида чора кўрилади. Вояга етмаганларни тунда ичкарига киритган маскан эгалари эса ушбу кодекснинг 188²-моддасига мувофиқ базавий ҳисоблаш миқдорининг 10 бараваридан 15 бараваригача жаримага тортилиши ёки уларнинг фаолияти чекланиши ва ҳатто тўхтатилиши мумкин.

Кўрилаётган чора-тадбирларнинг натижадорлиги рақамларда ҳам ўз аксини топмоқда. 2026 йилнинг дастлабки 4 ойи давомида Амударё тумани ҳудудида жами 82 маротаба тунги рейд тадбирлари амалга оширилди. Бу текширувлар давомида 15 та қонунбузилиш ҳолати аниқланиб, маскан эгаларига нисбатан Маъмурий жавобгарлик тўғрисидаги кодекснинг тегишли моддасига асосан баённомалар расмийлаштирилди.

Шунингдек, тунги вақтда мақсадсиз юрган 42 нафар вояга етмаган шахслар аниқланиб, уларнинг ота-оналарига кодекснинг 47-моддаси асосида тегишли таъсир чоралари қўлланилди. Энг ачинарлиси, ушбу ёшларнинг 10 нафари мутлақо қаровсиз ва назоратсиз қолганлиги сабабли ижтимоий-ҳуқуқий ёрдам кўрсатиш марказларига жойлаштирилди ва уларнинг қонуний вакиллари зудлик билан чақиртирилди.

Бугунги кунда ўтказилаётган бундай тадбирлар фақатгина ҳуқуқбузарликларни аниқлаш ва қайд этиш билан чекланиб қолмайди. Унинг негизида ёшларни тўғри йўлга йўналтириш, уларнинг хавфсизлигини таъминлаш ва жамиятда соғлом муҳитни шакллантиришдек улуғвор мақсад ётибди. Ҳар бир фуқаро, айниқса ота-оналар ва тадбиркорлар бу борада ҳушёрлик ва юксак масъулиятни ҳис этишлари лозим. Зеро, бугун амалга оширилаётган ҳар бир саъй-ҳаракат ва назорат тадбири эртанги кунимиз эгалари бўлган ёш авлоднинг порлоқ ва бехатар келажаги учун қўйилган энг муҳим қадамдир.