DEPUTATLIKKA NOMZODLAR SAYLOVChILAR BILAN UChRAShDI

Shu yilning 28-noyabrida Xalq deputatlari tuman Kengashida boʻshab qolgan yigirma uchinchi Bobur saylov okrugida deputat saylovi boʻlib oʻtadi.

Tumanimizda faoliyat yuritayotgan siyosiy partiyalardan koʻrsatilgan deputatlikka nomzodlar ovul aholisi bilan uchrashib, oʻzlarining saylovoldi dasturlari bilan tanishtirmoqdalar.

Saylov okrugi va unga qarashli saylov uchastkalarida saylovga puxta taraddud koʻrilmoqda. Nomzodlar haqida aholiga batafsil maʼlumotlar berilib, saylov kunida faol ishtirok etishga, oʻz tanlagan nomzodiga uyushqoqlik bilan ovoz berishga daʼvat etilmoqda. Saylov okrugi va unga qarashli uchastka saylov komissiyalari aʼzolari saylov jarayonining demokratik tamoyillarga, milliy saylov qonunchiligimizga muvofiq oʻtkazilishi uchun zarur shart-sharoitlarni yaratishga harakat qilmoqdalar.

24-noyabr kuni hududdagi 86-sonli umumiy oʻrta taʼlim maktabida tuman Kengashida boʻshab qolgan Bobur saylov okrugidan  deputatlikka “Milliy tiklanish” demokratik  partiyasidan nomzod Rasul Tojiboyev, “Adolat” sotsial-demokratik partiyasidan nomzod Ogʻabek Ollaberganov, Tadbirkorlar va ishbilarmonlar harakati – Oʻzbekiston Liberal demokratik partiyasidan nomzod Sarvar Shukurullayev, Oʻzbekiston “Ekologik” partiyasidan nomzod Shavkat Yangiboyev, Xalq demokratik partiyasidan nomzod Mahmud Eshmonovlarning saylovchilari bilan uchrashuvi boʻlib oʻtdi.

Uchrashuvga maktab oʻqituvchilari, ovul faollari, siyosiy partiyalarning tuman Kengashlari raislari, deputatlikka nomzodlarning ishonchli vakillari ishtirok etdilar.

Yigʻilganlarni deputatlikka  nomzodlarning ishonchli vakillari ularning tarjimai holi, mehnat faoliyati bilan yaqindan tanishtirdilar. Shundan soʻng deputatlikka nomzodlar soʻzga chiqib, saylovchilarini oʻzlarining saylovoldi dasturi bilan tanishtirdilar.

Saylovchilar deputatlikka nomzodlarning maʼruzalarini tingladilar va oʻzlarini qiziqtirgan savollarini berib, batafsil javoblar oldilar.

Xalq deputatlari tuman Kengashining boʻshab qolgan  deputatlik oʻrni uchun saylov boʻlib oʻtadigan Bobur nomli okrug saylovchilari 28-noyabr kuni uchta saylov uchastkalarida ovoz beradilar. 129-saylov uchastkasi 86-sonli, 130-saylov uchastkasi 6-sonli, 131-saylov uchastkasi 45-sonli umumiy oʻrta taʼlim maktablarida joylashgan.

Shu kungacha ushbu uchastkalarda saylov kuni fuqarolarning kelishlari, oʻz tanlagan nomzodlariga ovoz berishlari uchun zarur sharoitlar taxt qilindi, uchastka saylov komissiyalari aʼzolari deputatlikka nomzodlarni aholiga yaqindan tanishtirib, saylov qonunchiligimizga koʻra oʻzlari eng munosib deb bilgan nomzodga ovoz berishlari mumkinligini keng tushuntirmoqda.

Deputatlikka nomzodlar bilan uchrashuv saylovchilarning ular haqida yana ham koʻproq tasavvurga ega boʻlishlariga xizmat qilishi bilan ahamiyatlidir.

Oygul RAJABOVA.