3-dekabr – Xalqaro Nogironlar kuniga bagʻishlab sport musobaqalari tashkil etildi

Joriy yilning 20-noyabr sanasida Oʻzbekiston Nogironlar jamiyati Amudaryo tumani boʻlinmasi, Amudaryo tuman hokimligining Turizm va sport boʻlimi va tuman Xalq taʼlimi boʻlimi hamkorligida “Sport – yosh tanlamaydi, sport – hamma uchun!” shiori ostida sport musobaqalari oʻtkazildi.

Tuman Nogironlar jamiyatining 10 yoshdan 30 yoshgacha boʻlgan imkoniyati cheklangan 30 nafar aʼzolari ishtirokida boʻlib oʻtgan musobaqalarning doʻstona va qiziqarli oʻtishini taʼminlash maqsadida 16-sonli ixtisoslashtirilgan davlat umumtaʼlim maktabi  maʼmuriyati tomonidan zarur shart-sharoitlar yaratib berildi.

Xususan, maktabning sport zali sportning bir necha turlari uchun zarur sport jihozlari bilan taʼminlangani ishtirokchilar uchun munosib qulayliklar yaratdi.

Tadbirning qiziqarli va zavqli oʻtishini taʼminlash maqsadida tuman Turizm va sport boʻlimi boshligʻi  Gʻulomjon Qurbonboyev, “Barkamol avlod” bolalar maktabi direktori Xonimjon Rajabova, Yoshlar ishlari agentligi Amudaryo tuman boʻlimi boshligʻi Jasur Davletov, tuman Madaniyat boʻlimi mudiri Shuhrat Yusupov, Xalq  taʼlimi boʻlimi psixologi Tatʼyana  Pirlepesova  hamda Oʻzbekiston Nogironlar jamiyati Amudaryo tumani boʻlinmasi boshligʻi Nilufar Xolboyevalar har bir sportchining  chiqishini eʼtibor bilan kuzatib bordilar.

Tadbirda imkoniyati cheklangan sportsevar yoshlar sportning bir necha turlari boʻyicha bahslashdilar va oʻz mahoratlarini namoyish etdilar.

Tadbir davomida “Barkamol avlod” bolalar maktabi ijodkor oʻquvchi-yoshlari tomonidan tayyorlangan maroqli kontsert dasturi ham namoyish etildi.

3-dekabr – Xalqaro Nogironlar kuni arafasida boʻlib oʻtgan mazkur musobaqalarning  ishtirokchilari “Biz gʻoliblik uchun hamjihatlikda harakat qilamiz va barchamiz birmiz, birdammiz!” shiori ostida  kuch sinashdilar va 30 nafar imkoniyati cheklangan sportsevarlarning barchasi tadbir tashkilotchilari va homiylari tomonidan faxriy yorliqlar bilan taqdirlanib, bayram sovgʻalari topshirildi.

Doʻstona  va qiziqarli bahslarga boy oʻtgan tadbir yakunida homiylar tomonidan fayzli dasturxon yozilib, osh tortildi.

Xalqaro nogironlar kuni arafasida oʻtkazilgan mazkur tadbirga Oʻzbekiston Nogironlar jamiyati Amudaryo tuman boʻlinmasi, tadbirkorlar Rahmatulla Yoqubov, Nargiza Abdukarimjonova, “Shukurxon” ijodiy ustaxonasi direktori Rustam Yangiboyev, “Doniyorbek Sobirov” MChJ doʻkoni va Amudaryo muhandislik texnikumi oʻqituvchisi Nilufarxon Nasrullayevalar homiylik qildilar.

Robiya YOʻLDOShEVA.