3 декабрь – Халқаро Ногиронлар кунига бағишлаб спорт мусобақалари ташкил этилди

Жорий йилнинг 20 ноябрь санасида Ўзбекистон Ногиронлар жамияти Амударё тумани бўлинмаси, Амударё туман ҳокимлигининг Туризм ва спорт бўлими ва туман Халқ таълими бўлими ҳамкорлигида “Спорт – ёш танламайди, спорт – ҳамма учун!” шиори остида спорт мусобақалари ўтказилди.

Туман Ногиронлар жамиятининг 10 ёшдан 30 ёшгача бўлган имконияти чекланган 30 нафар аъзолари иштирокида бўлиб ўтган мусобақаларнинг дўстона ва қизиқарли ўтишини таъминлаш мақсадида 16-сонли ихтисослаштирилган давлат умумтаълим мактаби  маъмурияти томонидан зарур шарт-шароитлар яратиб берилди.

Хусусан, мактабнинг спорт зали спортнинг бир неча турлари учун зарур спорт жиҳозлари билан таъминлангани иштирокчилар учун муносиб қулайликлар яратди.

Тадбирнинг қизиқарли ва завқли ўтишини таъминлаш мақсадида туман Туризм ва спорт бўлими бошлиғи  Ғуломжон Қурбонбоев, “Баркамол авлод” болалар мактаби директори Хонимжон Ражабова, Ёшлар ишлари агентлиги Амударё туман бўлими бошлиғи Жасур Давлетов, туман Маданият бўлими мудири Шуҳрат Юсупов, Халқ  таълими бўлими психологи Татъяна  Пирлепесова  ҳамда Ўзбекистон Ногиронлар жамияти Амударё тумани бўлинмаси бошлиғи Нилуфар Холбоевалар ҳар бир спортчининг  чиқишини эътибор билан кузатиб бордилар.

Тадбирда имконияти чекланган спортсевар ёшлар спортнинг бир неча турлари бўйича баҳслашдилар ва ўз маҳоратларини намойиш этдилар.

Тадбир давомида “Баркамол авлод” болалар мактаби ижодкор ўқувчи-ёшлари томонидан тайёрланган мароқли концерт дастури ҳам намойиш этилди.

3 декабрь – Халқаро Ногиронлар куни арафасида бўлиб ўтган мазкур мусобақаларнинг  иштирокчилари “Биз ғолиблик учун ҳамжиҳатликда ҳаракат қиламиз ва барчамиз бирмиз, бирдаммиз!” шиори остида  куч синашдилар ва 30 нафар имконияти чекланган спортсеварларнинг барчаси тадбир ташкилотчилари ва ҳомийлари томонидан фахрий ёрлиқлар билан тақдирланиб, байрам совғалари топширилди.

Дўстона  ва қизиқарли баҳсларга бой ўтган тадбир якунида ҳомийлар томонидан файзли дастурхон ёзилиб, ош тортилди.

Халқаро ногиронлар куни арафасида ўтказилган мазкур тадбирга Ўзбекистон Ногиронлар жамияти Амударё туман бўлинмаси, тадбиркорлар Раҳматулла Ёқубов, Наргиза Абдукаримжонова, “Шукурхон” ижодий устахонаси директори Рустам Янгибоев, “Дониёрбек Собиров” МЧЖ дўкони ва Амударё муҳандислик техникуми ўқитувчиси Нилуфархон Насруллаевалар ҳомийлик қилдилар.

Робия ЙЎЛДОШЕВА.