USTOZLARIMDAN MINNATDORMAN
Inson orzu-maqsadlar bilan yashaydi. Ularga yetishishga harakat qilib, doim oldinga intiladi. Oʻrganishlar bilan boshlangan hayot oʻrganishlar bilan davom etadi. Ayniqsa, taʼlim maskani inson hayotida ulkan ahamiyat kasb etadi. Bilim dunyosiga ilk qadam shu yerdan boshlanadi. Ustoz-oʻqituvchilarimiz bor bilimini bizga beradi, ilm oʻrgatib, mustaqil hayotga kuzatadi.
Men 40-sonli maktabda tajribali, mahoratli ustozlardan taʼlim oldim. Bu dargohga kelgan ilk kunim, hayajonlanganim hamon yodimda. Ustozlarim mehr bilan qoʻlimdan tutib, boshlab kirgan bu ziyo maskanida yillar davomida bilim oʻrgandim. Barcha fanlarni oʻqituvchilarim yordamida oʻzlashtirdim, tushunchalarimni kengaytirdim. Tarix fanidan Jahongir Otaniyozov, matematikadan Doniyor Yoʻldoshev, ingliz tilidan Nurbek Jumaniyozov, ona tilidan Hulkaroy Xoʻjaniyozovalardan taʼlim olib, tafakkurimni boyitdim. Kasb tanlashimda ham ota-onam bilan bir qatorda oʻqituvchilarimning koʻmagi beqiyos boʻldi. Mendagi iqtidorni toʻldirib, shakllantirgan muallimlarim bergan bilimlar bilan talaba boʻlishga erishdim. Ayni paytda nufuzli oliygohlardan biri boʻlgan Toshkent Davlat huquqshunoslik universitetida 1-bosqichda, yangi ustozlarimdan tahsil olishni boshlab yubordim.
Men kelajakda kuchli bilimga ega huquqshunos boʻlib, rahmatlik bobom Gulmirza Matyusupov va buvijonim Shukurjon Rajabova, dadam Moʻʼminjon Matyusupovlar kabi tumanimiz aholisining haq-huquqlari qonuniy himoya qilinishiga, fuqarolarning huquqiy ongi, bilimi, madaniyati yuksalishi, davlatimizdagi qonunlar, hujjatlar ijrosi taʼminlanishiga hissa qoʻshishni maqsad qilganman.
Bu hayotimda ustozlarim tufayli erishgan ilk va eng katta yutugʻim. Shunday baxtga musharraf boʻlishimga koʻmak bergan ustozlarimdan juda minnatdorman hamda ularni Oʻqituvchi va murabbiylar kuni bayrami bilan tabriklayman. Bayramingiz muborak, aziz ustozlar!
Muhsinbek Mirzayev, Toshkent Davlat huquqshunoslik
universiteti 1-bosqich talabasi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
