Tadbirkorlar murajaatlarini hal qilish yuzasidan sayyor qabul oʻtkazildi

Bugungi kunda mamlakatimizda davlatimiz rahbari tashabbusi bilan tadbirkorlik subektlarini yanada qoʻllab-quvvatlash borasida keng koʻlamli chora-tadbirlar amalga oshirilmoqda. Tadbirkorlik faoliyatini yanada rivojlantirishga qaratilgan koʻplab imkoniyatlar hamda shart-sharoitlar yaratilmoqda.

Joriy yilning 14-sentyabr sanasida Amudaryo tuman hokimligining majlislar zalida tadbirkorlarni qiynayotgan muammolarni hal qilish, ularga har tomonlama yordam berish, taklif va tashabbuslarini qoʻllab-quvvatlash maqsadida uchrashuv oʻtkazildi.

Uchrashuvda Qoraqalpogʻiston Respublikasidagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi mudiri Rinat Aytmuratov, Oʻzbekiston Respublikasi Prezidenti huzuridagi Tadbirkorlik subektlarining huquqlari va qonuniy manfaatlarini himoya qilish boʻyicha vakil devonining Qoraqalpogʻiston Respublikasidagi bosh inspektori Aybek Kamalov, tuman hokimi Sultonboy Yoʻldashev, hokim oʻrinbosarlari, boʻlimlar boshliqlari, korxona-tashkilotlar masʼullari hamda tadbirkorlar ishtirok etdilar.

Uchrashuvda soʻzga chiqqanlar Oʻzbekiston Respublikasi Prezidenti Shavkat Mirziyoyev tomonidan joriy yilning 20-avgust kuni mamlakatimiz tadbirkorlari bilan oʻtkazgan ochiq muloqotida sohani yanada rivojlantirish borasida qator ustuvor vazifalar belgilab berilganini qayd etdilar.

Taʼkidlanganidek, Prezident mazkur uchrashuvda tadbrikorlar murojaatlarini hal qilishga qaratilgan 7 ta muhim yoʻnalishni koʻrsatib oʻtdi. Birinchi yoʻnalish – biznesni moliyalashtirish, ikkinchisi – soliq tizimini takomillashtirish va biznesga soliq yukini kamaytirish, uchinchisi – yer ajratish, toʻrtinchisi – infratuzilma, beshinchisi – eksportyor korxonalarni qoʻllab-quvvatlash, oltinchisi – transport-logistika, yettinchisi – sohadagi tartib-taomillarni soddalashtirish masalalariga qaratildi.

Tuman hokimligida oʻtkazilgan uchrashuv mobaynida tadbirkorlar tomonidan turli mazmundagi 15 dan ortiq murojaatlar kelib tushdi. Murojaatlardagi masalalar asosan elektr taʼminoti, bank-kredit, savdo qilish uchun terminal olish mazmunida boʻlib, koʻpchilik tadbirkorlar kredit olishda muammolarga duch kelayotganlarini, ularni hal qilishda amaliy yordam berishlarini soʻrab murojaat qildilar.

Xususan, “Maftuna-Sultonboy Qoramon” oilaviy korxonasi rahbari Mahkambek Sherjanovning elektr tarmogʻiga ulanishda amaliy yordam soʻrab qilgan murojaati, “Oʻrta qalʼa chorvadori” masʼuliyati cheklangan jamiyati rahbari Gʻulom Rasulovning parrandachilik fermer xoʻjaligiga tuman ekologiya boʻlimidan xulosa olishda amaliy yordam berish haqidagi murojaatlari tegishli masʼullar tomonidan koʻrib chiqilib, hal qilinadigan boʻldi.

Shuningdek, tadbirkorlarning bank va kredit masalalarida qilgan murojaatlari boʻyicha tumanimizdagi tijorat banklari filiallari masʼullariga topshiriqlar berilib, muammolar bartaraf qilinadigan boʻldi. Tadbirkorlar tomonidan berilgan savollarga tegishlicha javoblar qaytarildi.

Tuman hokimlining Axborot xizmati.