Тадбиркорлар муражаатларини ҳал қилиш юзасидан сайёр қабул ўтказилди

Бугунги кунда мамлакатимизда давлатимиз раҳбари ташаббуси билан тадбиркорлик субьектларини янада қўллаб-қувватлаш борасида кенг кўламли чора-тадбирлар амалга оширилмоқда. Тадбиркорлик фаолиятини янада ривожлантиришга қаратилган кўплаб имкониятлар ҳамда шарт-шароитлар яратилмоқда.

Жорий йилнинг 14 сентябрь санасида Амударё туман ҳокимлигининг мажлислар залида тадбиркорларни қийнаётган муаммоларни ҳал қилиш, уларга ҳар томонлама ёрдам бериш, таклиф ва ташаббусларини қўллаб-қувватлаш мақсадида учрашув ўтказилди.

Учрашувда Қорақалпоғистон Республикасидаги Ўзбекистон Республикаси Бош вазирининг Тадбиркорлар мурожаатларини кўриб чиқиш қабулхонаси мудири Ринат Айтмуратов, Ўзбекистон Республикаси Президенти ҳузуридаги Тадбиркорлик субьектларининг ҳуқуқлари ва қонуний манфаатларини ҳимоя қилиш бўйича вакил девонининг Қорақалпоғистон Республикасидаги бош инспектори Айбек Камалов, туман ҳокими Султонбой Йўлдашев, ҳоким ўринбосарлари, бўлимлар бошлиқлари, корхона-ташкилотлар масъуллари ҳамда тадбиркорлар иштирок этдилар.

Учрашувда сўзга чиққанлар Ўзбекистон Республикаси Президенти Шавкат Мирзиёев томонидан жорий йилнинг 20 август куни мамлакатимиз тадбиркорлари билан ўтказган очиқ мулоқотида соҳани янада ривожлантириш борасида қатор устувор вазифалар белгилаб берилганини қайд этдилар.

Таъкидланганидек, Президент мазкур учрашувда тадбрикорлар мурожаатларини ҳал қилишга қаратилган 7 та муҳим йўналишни кўрсатиб ўтди. Биринчи йўналиш – бизнесни молиялаштириш, иккинчиси – солиқ тизимини такомиллаштириш ва бизнесга солиқ юкини камайтириш, учинчиси – ер ажратиш, тўртинчиси – инфратузилма, бешинчиси – экспортёр корхоналарни қўллаб-қувватлаш, олтинчиси – транспорт-логистика, еттинчиси – соҳадаги тартиб-таомилларни соддалаштириш масалаларига қаратилди.

Туман ҳокимлигида ўтказилган учрашув мобайнида тадбиркорлар томонидан турли мазмундаги 15 дан ортиқ мурожаатлар келиб тушди. Мурожаатлардаги масалалар асосан электр таъминоти, банк-кредит, савдо қилиш учун терминал олиш мазмунида бўлиб, кўпчилик тадбиркорлар кредит олишда муаммоларга дуч келаётганларини, уларни ҳал қилишда амалий ёрдам беришларини сўраб мурожаат қилдилар.

Хусусан, “Мафтуна-Султонбой Қорамон” оилавий корхонаси раҳбари Маҳкамбек Шержановнинг электр тармоғига уланишда амалий ёрдам сўраб қилган мурожаати, “Ўрта қалъа чорвадори” масъулияти чекланган жамияти раҳбари Ғулом Расуловнинг паррандачилик фермер хўжалигига туман экология бўлимидан хулоса олишда амалий ёрдам бериш ҳақидаги мурожаатлари тегишли масъуллар томонидан кўриб чиқилиб, ҳал қилинадиган бўлди.

Шунингдек, тадбиркорларнинг банк ва кредит масалаларида қилган мурожаатлари бўйича туманимиздаги тижорат банклари филиаллари масъулларига топшириқлар берилиб, муаммолар бартараф қилинадиган бўлди. Тадбиркорлар томонидан берилган саволларга тегишлича жавоблар қайтарилди.

Туман ҳокимлининг Ахборот хизмати.