Bosh vazirining tumandagi qabulxonasi 1100 qisqa raqami orqali 20 ta murojaatlarni qabul qilgan

Soʻnggi yillarda tadbirkorlarning iqtisodiyot va jamiyatda tutgan oʻrni keskin oshganini hisobga olib, joriy yilning avgust oyi boshlarida Oʻzbekiston Respublikasi Prezidentining tadbirkorlar va ishbilarmonlar bilan ochiq muloqoti oʻtkazilishi rejalashtirilmoqda.

Ushbu tadbirda tadbirkorlarga toʻsiq boʻlayotgan dolzarb muammolar va ularning yechimlari, respublikada biznes muhitini yanada yaxshilash boʻyicha taklif va tashabbuslar muhokama qilinishi koʻzda tutilgan. Shunga muvofiq, joriy yil 20-iyuldan 31-iyulgacha tadbirkorlik subʼektlarining  faoliyatiga bogʻliq masala, biznesini kengaytirish va rivojlantirishga turtki beradigan gʻoya va takliflar bilan toʻgʻridan-toʻgʻri Oʻzbekiston Respublikasi Prezidentiga murojaat qilishi mumkinligi belgilangan edi.

Tumanda faoliyat olib borayotgan tadbirkorlar va tadbirkorlik qilish istagi boʻlgan fuqarolarning Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasining 1100 qisqa raqami orqali  Oʻzbekiston Respublikasi Prezidentiga mavjud takliflari va muammolarini aytib murojaat qilishi imkoniyati yaratilgan.

Shu davr mobaynida tumandagi tadbirkorlardan 1100 qisqa raqami orqali  20 ta murojaatlar qabul qilingan boʻlib, mazkur murojaatlardagi muammolarni oʻrganish va qisqa fursatlarda hal qilish choralari koʻrildi. Jumladan, Xolimbeg ovul fuqarolar yigʻini hududida yashovchi I.Bozorboyevning parrandachilikni rivojlantirish yoʻnalishida Mikrokreditbankdan 33 mln. soʻm kredit mablagʻi ajratish boʻyicha murojaati bank xodimlari tomonidan qisqa muddatlarda ijobiy yechim topildi.  "MANG'IT AMU BREKET" MChJ rahbari G.Allabergenovning qizilmiya oʻsimligini chet davlatlarga eksport qilishdagi toʻlamlar boʻyicha bergan taklifi Oʻzbekiston Respublikasi Ekologiya va atrof-muhitni muhofaza qilish davlat qoʻmitasi tomonidan huquqiy maʼlumot berilib, hal etildi. Qilichboy ovul fuqarolar yigʻinida yashovchi X.Xudoyarovning imtiyozli kreditlarni sektorlar kesimida ajratish boʻyicha bergan taklifi esa Markaziy bank Qoraqalpogʻiston Respublikasi Bosh boshqarmasi tomonidan qabul qilindi.

Hozirgi kunda jarayondagi murojaatlarni vakolatli organlar tomonidan qisqa fursatlarda hal qilish choralari koʻrilmoqda.

A.Xoʻjamurodov, tumandagi Oʻzbekiston Respublikasi Bosh vazirining Tadbirkorlar murojaatlarini koʻrib chiqish qabulxonasi mudiri.