Amudaryo tumanida Oʻzbekiston Respublikasi Suv xoʻjaligi vazirining sayyor qabuli oʻtkazildi

25-sentyabr kuni Oʻzbekiston Respublikasi Suv xoʻjaligi vaziri Shavkat Xamrayev Amudaryo tumanida ommaviy sayyor qabul oʻtkazdi. Ushbu tadbir nafaqat hudud aholisining muammolarini hal etish, balki suv resurslaridan oqilona foydalanish, sohada olib borilayotgan islohotlarni tushuntirish hamda joylardagi amaliy muammolarga yechim topish uchun muhim muloqot maydoniga aylandi.

Tumanning Choykoʻl ovulida tashkil etilgan sayyor qabulda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev, Amudaryo tumani hokimi Sobir Xoʻjametov, Qoraqalpogʻiston Respublikasi Suv xoʻjaligi vaziri Baxtiyor Yusupov, mutasaddi idoralar vakillari, suv xoʻjaligi sohasi mutaxassislari, fermer xoʻjaliklari rahbarlari hamda suv isteʼmolchilari, aholi vakillari qatnashdi.

Vazir Shavkat Xamrayev oʻz chiqishida mamlakatimiz suv xoʻjaligi tizimida amalga oshirilayotgan keng koʻlamli islohotlar haqida toʻxtalib, Prezident tashabbusi bilan qabul qilingan yangi farmon va qarorlarning amaliy ahamiyatini atroflicha tushuntirdi. Xususan, suv resurslaridan samarali foydalanish, ularni tejash va qayta taqsimlash, yangi texnologiyalarni joriy etish, moʻl hosil yetishtirishda suvning toʻgʻri boshqarilishi hal qiluvchi omil ekanini taʼkidladi.

Tadbir ochiq muloqot shaklida davom ettirildi. Unda hududdagi fermerlar, tadbirkorlar, mahalla faollari oʻz muammolari va takliflari bilan murojaat qildilar. Suv taqchilligi, irrigatsiya tarmoqlarini taʼmirlash, sugʻorish tizimlarida elektr taʼminoti, yangi quvurlar tortish kabi masalalar koʻtarildi.

Qabul jarayonida jami oʻndan ortiq murojaat tinglandi. Ulardan koʻpchiligiga joyida hal etiladi. Ayrim masalalar esa qoʻshimcha oʻrganishni talab etgani bois, mutasaddilarga aniq topshiriqlar berildi. Jumladan, Qoraqalpogʻiston Respublikasi Suv xoʻjaligi vaziri Baxtiyor Yusupov va Amudaryo tumani “Suv yetkazib berish xizmati” davlat muassasasi direktori Baxtiyor Davekovlar ushbu masalalar ijrosiga masʼul etib belgilandi.

Qabul yakunida ishtirokchilar oʻz murojaatlari ijobiy hal etilganidan mamnun ekanliklarini bildirib, suv xoʻjaligi tizimi vakillariga minnatdorchilik izhor qildilar. “Eng muhimi – bizning ovozimiz eshitilayotganidan, muammolarimiz joyida hal qilinayotganidan xursandmiz”, – deya taʼkidladilar ular.

Darhaqiqat, suv – hayot manbai. Uning oqilona boshqarilishi nafaqat dehqonning moʻl hosili, balki xalq farovonligi va yurt taraqqiyoti bilan chambarchas bogʻliq. Tumanimizda oʻtkazilgan ushbu sayyor qabul ham aynan shu ezgu maqsadlarga xizmat qildi.

Bugungi kunda davlatimiz tomonidan suv xoʻjaligini takomillashtirish, suv tejovchi texnologiyalarni keng joriy etish, mavjud resurslardan samarali foydalanish borasida keng koʻlamli ishlar amalga oshirilmoqda. Bunday ochiq muloqotlar esa bu jarayonni yanada jadallashtirish, xalq bilan tizim mutasaddilari oʻrtasida bevosita aloqani mustahkamlash uchun muhim omil boʻlib xizmat qilmoqda.

Charos Arslonova, tuman hokimligining Axborot xizmati rahbari.