Gʻalladan boʻshagan yer maydonlariga takroriy ekinlar ekilmoqda

Mamlakatimizda aholining oziq-ovqat mahsulotlariga boʻlgan talabini toʻla qondirish, bozorlarda qishloq xoʻjaligi mahsulotlari narxlarining barqarorligini taʼminlash, qish-bahor oylari uchun mahsulotlar zaxirasini yaratishga alohida eʼtibor qaratilmoqda. Shu maqsadda joriy yilgi mavsumda boshoqli don ekinlaridan boʻshaydigan maydonlarga oziq-ovqat ekinlarining tezpishar navlarini takroriy ekin sifatida qisqa muddatlarda ekish, agrotexnika tadbirlarini oʻz muddatlarida oʻtkazish, ularga talab etiladigan moddiy-texnika resurslarini yetkazib berish va yetishtirilgan hosilni nes-nobud qilmasdan yigʻib-terib olish borasida qator amaliy ishlar qilinmoqda.

Amudaryo tumanida ham 2021-yil hosili uchun gʻalladan boʻshaydigan maydonlarga takroriy ekinlar ekishni tashkil etish hamda aholi bandligini taminlash maqsadida yer maydonlarini ajratib berish yuzasidan amaliy ishlar qilinmoqda. Joriy yilning 12-iyun kuni tumandagi Oq oltin ovulidagi gʻalladan boʻshagan yer maydonlari “Temir daftar”ga, “Ayollar daftari” va “Yoshlar daftari”ga kiritilgan ehtiyojmand oilalar, yordamga muhtoj ayollar hamda band boʻlmagan yoshlarga takroriy ekinlar ekib, yerdan unumli foydalanish maqsadida ajratib berildi.

Aytish kerakki, tumanda oziq-ovqat xavfsizligini taʼminlash maqsadida 2021-yil hosili uchun ekilgan gʻalla maydonlaridan boʻshaydigan maydonlarning 3300 gektariga takroriy ekinlar ekish rejalashtirilgan boʻlib, takroriy ekinlarni ekish va mahsulot yetishtirish uchun talab etiladigan urugʻlik, mineral oʻgʻit, yoqilgʻi moylash materiallari va kredit mablagʻlari uchun jami 16 851 mln soʻmlik pul mablagʻlari zarur boʻladi.

Mazkur 3300 gektar yer maydonlarida eksportbop va bozorbop takroriy ekinlar ekish hamda shu orqali 11550 nafar ishsiz, “Temir daftar”, “Yoshlar daftari” va “Ayollar daftari”ga kiritilgan, yer olib, dehqonchilik qilish istagi boʻlgan aholi vakillarining roʻyxati shakllantirildi. Shundan 9075 nafari mavsumiy ish bilan taʼminlanadigan ishchilar, 2475 nafari “Temir daftar”, “Yoshlar daftari” va “Ayollar daftari”ga kiritilgan ehtiyojmand aholi hisoblanadi.

Qolaversa, 2475 nafar ehtiyojmand aholiga jami 495 gektar (har biriga oʻrtacha 20 sotix) yer maydonlari ajratib berilishi hamda bandligi taʼminlanishi rejalashtirilgan. Shundan takroriy ekin ekiladigan yer maydonlarining 1-sektor hududida 124,8 gektari, 2-sektor hududida 149,8 gektari, 3-sektor hududida 161,4 gektari, 4-sektor hududida 59 gektari ehtiyojmand aholiga beriladigan yer maydonlari hisoblanadi.

Shuningdek, gʻalladan boʻshaydigan yer maydonlarini takroriy ekish uchun aholiga berish orqali 1-sektor hududidagi 2860 nafar, 2-sektor hududidagi 3206 nafar, 3-sektor hududidagi 3974 nafar, 4-sektor hududidagi 1510 nafar yurtdoshlarimiz ish bilan taʼminlanadi. Shundan jami 2475 nafari ehtiyojmand aholi soniga, 9075 nafari mavsumiy ishchilar soniga toʻgʻri keladi. Xususan, Oq oltin ovuli hududidagi “Kenjayeva Shahlo” fermer hoʻjaligida 3 gektar gʻalladan boʻshagan yer maydoni 15 nafar yoshlarga ajratib berildi. Ajratilgan yer maydonlarida mosh ekildi.

Taʼkidlash joizki, bugun mamlakatimiz aholisi soni ortib borishi bilan bir qatorda uning mehnat bandligini taʼminlash masalasi ham dolzarb ahamiyat kasb etmoqda. Ishsizlik muammosini hal etishga qaratilgan chora-tadbirlar esa bu borada qator ijobiy natijalar bermoqda. Ayniqsa, ishsiz yoshlarning bandligini taʼminlash borasidagi ishlar yaqqol koʻzga tashlanmoqda.

 Bandlikni taʼminlashda eng katta zaxiralardan biri dehqonchilik qilish uchun yer ajratishdir. Shu maqsadda joylarda ekin yerlaridan yoshlarga dehqonchilik uchun ajratish tartibi joriy etilmoqda. Shuningdek, quduqlar qazib, zaxira yerlarni yoshlarga foydalanish uchun berish, tomorqada limonchilik, parrandachilik, quyonchilik, asalarichilik qilishlari uchun kreditlar ajratish orqali ham yoshlar bandligi taʼminlanmoqda.

Charos Arslonova, tuman hokimligining Ahborot xizmati rahbari.