KARANTIN HALI BEKOR QILINGANI YOʻQ, ChUNKI VIRUS ORAMIZDA YuRIBDI

Respublikamizda koronavirus infektsiyasining oxirgi uch oy davomida qayd etilish darajasi har yuz ming aholiga 02 foiz boʻlgan boʻlsa, oxirgi 4-5 kun ichida bu koʻrsatkich 0,4 foizga koʻtarilgan. Epidemiologik tahlillar natijasida hozirgi kunga kelib Respublikamizda koronavirus bilan kasallanish koʻrsatkichi sekin-asta ortib bormoqda.

Oʻtgan yili koronavirus pandemiyasi davrida umumiy kasallanishlar orasida bolalar ulushi 5-7 foiz boʻlsa, hozirgi kunda bu koʻrsakich 25 foizdan ortib ketgan. Shuning uchun ham Toshkent shahrining ayrim tumanlarida maktablar taʼlimi onlayn tartibiga oʻtkazilgan.

Respublika maxsus kamissiyasining qaroriga koʻra, joriy yilning 1-aprelidan boshlab aholi gavjum boʻladigan tadbirlarda biroz cheklovlar oʻrnatilmoqda. Toʻyxonalarda toʻy oʻtkazish va oilaviy marosimlarni oʻtkazishda 100 kishidan oshmaslik tartibi belgilandi. Kontsert, teatr va kinoteatrlarda karantin nazorati kuchaytirildi.

Shuni esda tutishimiz kerakki, karantin hali bekor qilingani yoʻq, eng muhim va birlamchi himoya usullari hali amalda.

Aholining asosiy qatlami, ayniqsa, yoshlarimiz karantin qoidalariga amal qilishni unutib qoʻyishdi. Vaholanki, koronavirus hali yonimizda yuribdi, shu sabab karantin qoidalariga rioya etgan holda, eng asosiysi – niqob taqib yurish, antiseptik vositalardan foydalanish, shaxsiy gigiyenaga rioya etish, joylarda odamlar orasida masofani saqlash va jamoat joylarida hamda jamoat transportlarida karantin qoidalariga amal qilish zarur.

Tuman Sanitariya-epidemiologik osoyishtalik va jamoat salomatligi boʻlimi va tuman tibbiyot birlashmasi tomonidan Oʻzbekiston Respublikasi Sogʻliqni saqlash Vazirligining joriy yil 15-fevraldagi “Koronavirus infektsiyasiga qarshi ommaviy emlash jarayonlariga tayyorgarlik koʻrish va oʻtkazish toʻgʻrisida”gi buyrugʻiga asosan COVID-19 kasalligiga qarshi emlashni tashkil qilish va eslash jarayonlarini nazoratga olish shtabi tuzildi.

Tumanimizda ommaviy emlash jarayonlarini oʻtkazish maqsadida davolash-profilaktika muassasalarida 23 ta emlash brigadalari, shundan 10 tasi statsionar va 13 tasi mobil brigadalar tashkil qilindi.

Mazkur brigadalarga aholini COVID-19 kasallagiga qarshi sifatli va xavfsiz emlashga tayyorgarlik jarayonini olib borishni tashkil etish boʻyicha tuman Tibbiyot birlashmasi hamda tuman SEO va JSBning mutaxassislari biriktirilgan. Emlash ishlariga jalb qilinadigan tibbiyot xodimlari oʻrtasida seminar mashgʻulotlar oʻtkazilib, emlash ishlarini olib borish tayyorgarlikdan oʻtkazildi.

2021-yil 17-mart kuni Respublikamizga birinchi partiya vaktsina kirib keldi. Vaktsinatsiya birinchi navbatda 65 yoshdan oshgan nuroniy qariyalarga, keyingi bosqichda bemorlar bilan bevosita muloqotda boʻluvchi tibbiyot xodimlari (maxsus shifoxonalar tibbiyot xodimlari, tez tibbiy yordam xizmati va yuqumli kasalliklar shifoxonalari tibbiyot xodimlari) va jamoat joylarida xizmat koʻrsatuvchi xodimlarga ketma-ketlikda emlash oʻtkaziladi.

Karantin davrida aholi orasida koronavirus infektsiyasining oldini olish boʻyicha tuman SEO va JS boʻlimi tomonidan profilaktik dezinfektsiya ishlarini oʻtkazish uchun dezinfektsiyalovchi moddalar va avtomaks asbob-anjomlari, xodimlar uchun maxsus himoya kiyimlari va antiseptik vositalari zaxirasi yaratildi kasallik oʻchoqlarida va oʻquv muassasalarida dezinfektsiya tadbirlari olib borilmoqda.

T.BABANIYoZOV, Amudaryo tumani SEO va JSB nazoratlarni muvofiqlashtirish va maʼmuriy amaliyot boʻlimi mudiri. Oliy toifali sanitariya vrachi.