Oʻzbekiston Respublikasi Konstitutsiyasi qabul qilinganining 32 yilligi munosib nishonlandi
Xalqimiz siyosiy-huquqiy tafakkurining yuksak namunasi boʻlgan Konstitutsiyamiz yurtimizda demokratik davlat va fuqarolik jamiyati barpo etish, Oʻzbekistonning xalqaro maydonda munosib oʻrin egallashida mustahkam poydevor boʻlib xizmat qilmoqda.
Konstitutsiyamiz Oʻzbekiston tarixida uzoq, davomli maqsad va vazifalarimizni aniq belgilab berishda oʻzining puxta oʻylangan tamoyillari bilan ishonchli va hal qiluvchi omil boʻldi. Mamlakatimizning bugungi kungacha bosib oʻtgan gʻoyat murakkab va sharafli yoʻli bosh qomusimizning hayotbaxsh kuchi va ulkan salohiyatidan dalolat beradi.
8-dekabr sanasi bosh qomusimiz – Konstitutsiya qabul qilingan kun sifatida butun yurtimiz boʻylab tantanali nishonlanadi. Ushbu sana munosabati bilan Amudaryo tumani Madaniyat boʻlimida bayram tadbiri boʻlib oʻtdi. Unda tumandagi sektorlar rahbarlari, tuman hokimi oʻrinbosarlari, boʻlimlar, tashkilotlar rahbarlari, mahallalar masʼullari hamda jamoatchilik vakillari ishtirok etdilar.
Bayram tadbiri Oʻzbekiston va Qoraqalpogʻiston Respublikalari davlat madhiyalari sadolari bilan boshlandi. Tadbirni tuman hokimining birinchi oʻrinbosari – iqtisodiy taraqqiyot va kambagʻallikni qisqartirish boʻlimi boshligʻi Fahriddin Yusupov tabrik soʻzi bilan ochib berdi. U oʻz nutqida Konstitutsiyamiz yurtimizda demokratik islohotlar, iqtisodiyotni modernizatsiya qilish, ijtimoiy oʻzgarishlar uchun asos boʻlganligini, u inson huquq va erkinliklarini oliy qadriyat deb eʼlon qilib, millatlararo tinchlik va totuvlikni mustahkamlash, tarixiy-madaniy anʼanalarni rivojlantirishga xizmat qilayotganligini taʼkidladi hamda barchani bayram bilan tabrikladi.
Bayram tadbirida shuningdek, tuman prokurori Abat Djumamuratov soʻzga chiqib, Konstitutsiya davlat suvereniteti, jamiyatda tinchlik va totuvlik tamoyillariga rioya etish, qonun ustuvorligini taʼminlash, hayotimizning barcha jabhalarida keng koʻlamli islohotlarni amalga oshirishning kafolati ekanligini, ushbu xujjat Oʻzbekiston davlatchiligi shakllanishining eng yangi bosqichini boshlab berganligini va bugungi kunda u har bir insonning huquq va erkinliklarini kafolatlashini qayd etdi va yurtimiz ahlini bosh qomusimiz qabul qilinganining 32 yilligi bilan tabrikladi.
Konstitutsiyamiz qabul qilingan sana munosabati bilan tashkil etilgan bayram tadbiri tuman Madaniyat boʻlimi ijodkorlari tomonidan tayyorlangan ajoyib chiqishlar va betakror kuy-qoʻshiqlar bilan davom etdi. Tumanimizning isteʼdodli xonandalari tinchlik, doʻstlik, Vatanni madh etuvchi, shuningdek, musaffo osmon ostida totuvlikda bir oila boʻlib yashayotgan turli millat va elatlarning milliy kuy-qoʻshiqlarini ijro etdilar. Raqqosa qizlar ijrosidagi ajoyib raqslar barchaga yuqori bayramona kayfiyat bagʻishladi.
Bayram tadbirida soʻzga chiqqanlar asosiy qonunimiz negizida yaratilgan Harakatlar strategiyasi bugungi kunda jonajon Vatanimiz taraqqiyotini yangi bosqichga koʻtarishda, innovatsion va industrial rivojlanish sari odimlashda beqiyos oʻrin egallayotganini, xalq bilan doimiy muloqotda boʻlish, odamlarning tashvish-muammolarini hal etish, ularni rozi qilishda asosiy mezoniga aylanayotganini taʼkidladilar. Aynan shu sababli bosh qomusimizni chuqur oʻrganish, anglash, hayotga joriy etish va unga soʻzsiz amal qilish – barchamizning sharafli burchimiz ekanligi qayd etildi.
Tadbirda isteʼdodli oʻquvchi yoshlar tomonidan ijro etilgan Bosh Qomusimiz haqidagi sheʼrlar hamda ajoyib kuy-qoʻshiqlar ishtirokchilarda unutilmas taassurotlar qoldirdi.
Taʼkidlash joizki, Konstitutsiya — bu mamlakatimiz kelajagi, xalqimizning barqaror rivoji, tinchligi va farovonligi kafolatidir. Oʻzbekiston Konstitutsiyasining ahamiyati va taʼsiri tobora ortib borar ekan, uning zamon talablariga moslashishi va jamiyatimizga xizmat qilishi davom etadi. Konstitutsiyamizda mustahkamlangan qadriyatlar, adolat va qonun ustuvorligi har bir fuqaroga yoshidan, millatidan qatʼiy nazar teng huquqlar berishni taʼminlaydi. Shu sababli ham Konstitutsiya kuni umumxalq bayrami sifatida keng nishonlanadi, Bosh Qomusimiz esa asriy orzularimiz roʻyobi muhrlangan hujjat sifatida eʼzozlanadi.
Charos Arslonova, tuman hokimligining Axborot xizmati rahbari.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
