Navroʻz kelmay qolmasin!

Oʻrik guli – bayoti,
Tolmas qushlar qanoti,
Sevishganlar najoti –
Vafo kelmay qolmasin!

Tutun toʻlgan havoga,
Sunʼiy ohang navoda,
“Qiyur-qiyur”samoda
Turna kelmay qolmasin.

Qogʻoz gullar serobday,
Chin ishq, mehr sarobday,
Laqqa, suvan kamyobday,
Bakra kelmay qolmasin.

Qirilmagan boʻlsaydi,
Koʻkqargʻa, gʻoz kelsaydi,
Nevaram ham koʻrsaydi,
Jayron kelmay qolmasin.

Asrang boshdan – oyogʻin:
Osmon, Ummon, koʻl, togʻin,
Kalon Minor mayogʻi –
Laylak kelmay qolmasin.

Qumrilarni jerkitmang,
Qalb ayvonin berkitmang,
Qaldirgʻochni hurkitmang –
Tamom, kelmay qolmasin!

Qarang, hidlar amaki,
Gulmas – sharob, tamaki,
Kuy-sozlar ham qalbaki,
Maqom kelmay qolmasin.

Koʻnglim, magʻrursan, biroq
Gina-kekdan boʻl yiroq,
Bir-biriga et-tirnoq –
Jigar kelmay qolmasin.

Egallang ilm – chiroqni,
Jon deb oching  quchoqni,
Chitmang qosh-u qaboqni,
Mehmon kelmay qolmasin.

Dilga durud, sanolar,
Tilga shukur, duolar,
Ming bir dardga davolar,
Shifo kelmay qolmasin.

Shular bari kelsin-ey,
Olam gulga toʻlsin-ey,
Hamma baxtli boʻlsin-ey,
Omad kelmay qolmasin!

Murodi har odamning,
Qutlugʻ boʻlsin qadami,
Elning oydin bayrami –
Navroʻz kelmay qolmasin!

Tursunboy Abdullayev.