PREZIDENT MASLAHATChISINING BIRINChI OʻRINBOSARI IShTIROKIDA SAYYoR QABUL OʻTKAZILDI

Aholining turli qatlamlari bilan toʻgʻridan-toʻgʻri muloqot qilish orqali mavjud dolzarb muammolarni bevosita joyida bartaraf etish yuzasidan aniq va tezkor choralar koʻrishda oʻtkazilayotgan sayyor qabullarning oʻrni juda ahamiyatlidir.

Buningdek tadbirlarda fuqarolarning ariza va murojaatlari xolislik tamoyillari asosida koʻrib chiqilib, ijobiy hal etilayotgani – mamlakatimizda inson huquqlari va manfaatlariga oliy qadriyat sifatida qaralayotganining yaqqol ifodasidir.

Shu yilning 4-martida tuman hokimligi majlislar xonasida sud-huquq masalalari boʻyicha Oʻzbekiston Respublikasi Prezidenti maslahatchisining birinchi  oʻrinbosari Baxtiyor Islomov boshchiligida,  Oʻzbekiston Respublikasi Bosh prokurori oʻrinbosari, Oʻzbekiston Respublikasi harbiy prokurori Shuhrat Uzoqov, Oʻzbekiston Respublikasi Ichki ishlar vaziri oʻrinbosari, Tergov departamenti boshligʻi Yahyojon Abdulhaqov, Oʻzbekiston Respublikasi Bojxona qoʻmitasi raisi oʻrinbosari Gʻafurjon Shukurov, Oʻzbekiston Respublikasi Oliy sudi raisi oʻrinbosari Ikram Muslimov, Oʻzbekiston Respublikasi Adliya vaziri oʻrinbosari Muzraf Ikromov va Qoraqalpogʻiston Respublikasidagi vazirliklar masʼullari ishtirokida boʻlib oʻtgan sayyor qabul ham tumanimiz aholisining sud-huquq sohasidagi koʻpgina muammolarining ijobiy yechimini  topishiga sabab boʻldi.

Sayyor qabulda tuman hokimi Sultonboy Yoʻldashev Prezidentimiz tashabbusi bilan xalqning dardini tinglab, turmushidagi muammolarini hal qilish borasida koʻpgina saʼy-harakatlar olib borilayotgani, ayniqsa keyingi yillarda sud-huquq sohasini demokratlashtirish, sud hokimiyatining fuqarolar huquqlari va Qonuniy manfaatlarini himoya qilish borasidagi roli tobora ortib borayotganini, bu oʻz navbatida jamiyatimizda ijtimoiy adolatning barqarorligiga, fuqarolar tinchligi va totuvligiga xizmat qilayotganini taʼkidladi. Tumanimiz fuqarolari bilan yuzma-yuz muloqot qilib, muammolarini tinglash, yechimiga amaliy koʻmak berish uchun tashrif buyurgan maʼsullarga minnatdorchilik bildirdi.

Sayyor qabulda tumanimizning 150 nafardan ortiq fuqarolari qatnashib, sud-huquq sohasiga doir murojaatlar qildilar.

Qabul davomida sud tomonidan tayinlangan axloq tuzatish ishlari jazosidan muddatidan ilgari shartli ravishda ozod etish, tayinlangan sinov muddatida yuklatilgan majburiyatlarni olib tashlash, tayinlangan muayyan huquqdan mahrum qilish (transport vositasini boshqarish huquqidan) jazosidan muddatidan oldan shartli ravishda ozod qilish va shu kabi sud masalalariga oid boʻlgan 20 nafar fuqarolarning muammolari hal qilindi. Ular buning uchun Oʻzbekiston Respublikasi Prezidenti nomiga yozma tashakkurnoma bildirdilar.

Sayyor qabul davomida Bosh prokuratura tomonidan jami 15 nafar fuqarolardan 21 ta murojaatlar qabul qilinib, 1 nafar fuqaroning murojaatlari joyida ijobiy hal qilinib, 5 ta murojaatlarga huquqiy maslahat va maʼlumot berildi, 6 ta murojaatlarga tushuntirish berildi. Qolgan 9 nafar fuqarolarning murojaatlari ijro uchun nazoratga olindi.

Adliya Vazirligi tomonidan 11 nafar fuqarolardan 11 ta murojaatlar qabul qilinib, 9 tasi huquqiy maslahat va maʼlumotlar berish orqali hal  qilindi, 2 tasiga tushuntirish berildi.

Bundan tashqari 4 nafar yoshlarga fuqarolik pasporti berildi. Adliya Vazirligi tomonidan 9 nafar fuqarolarga huquqiy maslahat va maʼlumotlar berish orqali murojaatlari hal qilindi.

Oʻzbekiston Respublikasi Oliy sudi raisi oʻrinbosari tomonidan jami 78 nafar fuqarolar qabul qilindi. Ular 50 ta jinoyat ishlari boʻyicha, 17 ta fuqarolik ishlari boʻyicha, 11 ta maʼmuriy ishlar boʻyicha sudlarga oid muammolari yuzasidan murojaat qildilar.

Jami 78 ta murojaatlardan 42 tasiga huquqiy tushuntirishlar berildi, 10 ta murojaat joyida ijobiy hal etilib, qanoatlantirildi. 26 ta murojaat boʻyicha arizalar Oliy sud tomonidan kassatsiya tartibida xal qilish uchun qabul qilindi, ushbu murojaatlarning barchasi qanoatlantirilib, tegishli sudlov xayʼatiga koʻrib chiqish uchun oʻtkazildi.  10 ta murojaat boʻyicha - jinoyat ishlari boʻyicha hukm qilingan 10 nafar shaxs jazoni oʻtashdan muddatidan oldin ozod qilindi.

Sayyor qabul mamlakatimiz sud-huquq sohasida insonparvarlik, bagʻrikenglik tamoyillari ustuvor ekanligining, inson qadr-qimmati yuksak tutilayotganining namoyishi boʻldi, desak adashmaymiz.

Tuman hokimligi Axborot xizmati.