ПРЕЗИДЕНТ МАСЛАҲАТЧИСИНИНГ БИРИНЧИ ЎРИНБОСАРИ ИШТИРОКИДА САЙЁР ҚАБУЛ ЎТКАЗИЛДИ

Аҳолининг турли қатламлари билан тўғридан-тўғри мулоқот қилиш орқали мавжуд долзарб муаммоларни бевосита жойида бартараф этиш юзасидан аниқ ва тезкор чоралар кўришда ўтказилаётган сайёр қабулларнинг ўрни жуда аҳамиятлидир.

Бунингдек тадбирларда фуқароларнинг ариза ва мурожаатлари холислик тамойиллари асосида кўриб чиқилиб, ижобий ҳал этилаётгани – мамлакатимизда инсон ҳуқуқлари ва манфаатларига олий қадрият сифатида қаралаётганининг яққол ифодасидир.

Шу йилнинг 4 мартида туман ҳокимлиги мажлислар хонасида суд-ҳуқуқ масалалари бўйича Ўзбекистон Республикаси Президенти маслаҳатчисининг биринчи  ўринбосари Бахтиёр Исломов бошчилигида,  Ўзбекистон Республикаси Бош прокурори ўринбосари, Ўзбекистон Республикаси ҳарбий прокурори Шуҳрат Узоқов, Ўзбекистон Республикаси Ички ишлар вазири ўринбосари, Тергов департаменти бошлиғи Яҳёжон Абдулҳақов, Ўзбекистон Республикаси Божхона қўмитаси раиси ўринбосари Ғафуржон Шукуров, Ўзбекистон Республикаси Олий суди раиси ўринбосари Икрам Муслимов, Ўзбекистон Республикаси Адлия вазири ўринбосари Музраф Икромов ва Қорақалпоғистон Республикасидаги вазирликлар масъуллари иштирокида бўлиб ўтган сайёр қабул ҳам туманимиз аҳолисининг суд-ҳуқуқ соҳасидаги кўпгина муаммоларининг ижобий ечимини  топишига сабаб бўлди.

Сайёр қабулда туман ҳокими Султонбой Йўлдашев Президентимиз ташаббуси билан халқнинг дардини тинглаб, турмушидаги муаммоларини ҳал қилиш борасида кўпгина саъй-ҳаракатлар олиб борилаётгани, айниқса кейинги йилларда суд-ҳуқуқ соҳасини демократлаштириш, суд ҳокимиятининг фуқаролар ҳуқуқлари ва Қонуний манфаатларини ҳимоя қилиш борасидаги роли тобора ортиб бораётганини, бу ўз навбатида жамиятимизда ижтимоий адолатнинг барқарорлигига, фуқаролар тинчлиги ва тотувлигига хизмат қилаётганини таъкидлади. Туманимиз фуқаролари билан юзма-юз мулоқот қилиб, муаммоларини тинглаш, ечимига амалий кўмак бериш учун ташриф буюрган маъсулларга миннатдорчилик билдирди.

Сайёр қабулда туманимизнинг 150 нафардан ортиқ фуқаролари қатнашиб, суд-ҳуқуқ соҳасига доир мурожаатлар қилдилар.

Қабул давомида суд томонидан тайинланган ахлоқ тузатиш ишлари жазосидан муддатидан илгари шартли равишда озод этиш, тайинланган синов муддатида юклатилган мажбуриятларни олиб ташлаш, тайинланган муайян ҳуқуқдан маҳрум қилиш (транспорт воситасини бошқариш ҳуқуқидан) жазосидан муддатидан олдан шартли равишда озод қилиш ва шу каби суд масалаларига оид бўлган 20 нафар фуқароларнинг муаммолари ҳал қилинди. Улар бунинг учун Ўзбекистон Республикаси Президенти номига ёзма ташаккурнома билдирдилар.

Сайёр қабул давомида Бош прокуратура томонидан жами 15 нафар фуқаролардан 21 та мурожаатлар қабул қилиниб, 1 нафар фуқаронинг мурожаатлари жойида ижобий ҳал қилиниб, 5 та мурожаатларга ҳуқуқий маслаҳат ва маълумот берилди, 6 та мурожаатларга тушунтириш берилди. Қолган 9 нафар фуқароларнинг мурожаатлари ижро учун назоратга олинди.

Адлия Вазирлиги томонидан 11 нафар фуқаролардан 11 та мурожаатлар қабул қилиниб, 9 таси ҳуқуқий маслаҳат ва маълумотлар бериш орқали ҳал  қилинди, 2 тасига тушунтириш берилди.

Бундан ташқари 4 нафар ёшларга фуқаролик паспорти берилди. Адлия Вазирлиги томонидан 9 нафар фуқароларга ҳуқуқий маслаҳат ва маълумотлар бериш орқали мурожаатлари ҳал қилинди.

Ўзбекистон Республикаси Олий суди раиси ўринбосари томонидан жами 78 нафар фуқаролар қабул қилинди. Улар 50 та жиноят ишлари бўйича, 17 та фуқаролик ишлари бўйича, 11 та маъмурий ишлар бўйича судларга оид муаммолари юзасидан мурожаат қилдилар.

Жами 78 та мурожаатлардан 42 тасига ҳуқуқий тушунтиришлар берилди, 10 та мурожаат жойида ижобий ҳал этилиб, қаноатлантирилди. 26 та мурожаат бўйича аризалар Олий суд томонидан кассация тартибида хал қилиш учун қабул қилинди, ушбу мурожаатларнинг барчаси қаноатлантирилиб, тегишли судлов хайъатига кўриб чиқиш учун ўтказилди.  10 та мурожаат бўйича - жиноят ишлари бўйича ҳукм қилинган 10 нафар шахс жазони ўташдан муддатидан олдин озод қилинди.

Сайёр қабул мамлакатимиз суд-ҳуқуқ соҳасида инсонпарварлик, бағрикенглик тамойиллари устувор эканлигининг, инсон қадр-қиммати юксак тутилаётганининг намойиши бўлди, десак адашмаймиз.

Туман ҳокимлиги Ахборот хизмати.