XALQLAR DOʻSTLIGI – MILLATIMIZ KOʻRKI

Bizning xalqimiz koʻp millatli xalq, yagona oilada, eng kichik guruhlarda ham oʻz ona tilida gaplashish, uning tarixi, madaniyati va urf-odatlarini eʼzozlash huquqini davlatimiz qonuniy tasdiqlab, imkon yaratib berib qoʻyibdi.

Barcha xalqlarning urf-odatlari va anʼanalariga hurmat nazari bilan qaragan holda oʻz ona tilimizning imlosini, adabiyotimizni istagancha oʻrganmoqmoqdamiz. Bu borada adabiy-badiiy tadbirlar oʻtkazilmoqda.

Mana shunday tadbirlardan biri 8-fevral kuni 45-sonli umumtaʼlim maktabida boʻlib oʻtdi.

Kechada qozoq sinfi oʻquvchilari qozoq xalqining  buyuk adibi Muqagʻaliy Maqtayevning 90 yillik yubiley tantanasini nishonlash uchun yigʻilishdi. Kechaga ota-onalar, maktabning sobiq oʻqituvchilari ham taklif qilindi.

Kechani maktab direktori Guloyim Qalandarova kirish soʻzi bilan ochib berdi.

Adibning hayot yoʻli, ijodi haqidagi maʼruzalar tinglandi. Oʻquvchi-yoshlar  shoirning sheʼrlaridan namunalar oʻqidilar. Ayniqsa, shoirning «Aqqular uqtagʻanda» sheʼriy dramasi gʻoyatda taʼsirli boʻldi. Ona siymosi, uning farzand uchun iztiroblari mahorat bilan koʻrsatib berildi.

Shoirning sheʼrlari oʻquvchilar va ota-onalar tomonidan doʻmbira joʻrligida juda ham maromiga yetkazilib ijro etildi.

Kecha ishtirokchilari shoirning ijod mahsullari bilan yanada yaqinroq tanishdilar.

Kechani maktabning qozoq tili va adabiyot fani oʻqituvchisi Zaynab Yelavova va boshlangʻich sinf oʻqituvchisi Gulnur Bekmuratovalar tayyorladilar. Bundan oʻquvchilarning ota-onalari juda mamnun boʻlishdi va koʻtarinki kayfiyat bilan kecha tashkilotchilariga minnatdorchilik bildirdilar.

Mana shunday kechalar tez-tez tashkil etilib tursa, oʻquvchilar har bir adib haqida yanada chuqur maʼlumotlarga ega boʻlar, shoirlar hayotiga yaqindan yondashar edi. Qolaversa, maktab, oila va mahalla orasidagi oʻzaro munosabat rishtalari yanada mustahkam boʻlar edi.

***

25-sonli maktabgacha taʼlim maskanida 30-yanvar kuni tarbiyalanuvchilarning ota-onalari va tarbiyachilar hamkorligida navbatdagi ota-onalar yigʻilishi boʻlib oʻtdi.

Yigʻilishda taʼlim maskanining mudiri Baxtiyor Eshimbetov bola tarbiyasida ota-ona va bolalar muassasaning oʻrni va ahamiyati, undagi tarbiya intizomi, shart-sharoitlar haqida gapirdi. Shuningdek, MTT hamshirasi Tamara Usenboyeva bolalarning ozodaligi va vitaminlarga boy oziq-ovqatlar bilan toʻgʻri, vaqtida ovqatlanishi sogʻlom farzand tarbiyasida muhim oʻrin egallashini taʼkidladi.

Ota-onalar nomidan Dilbar Aqmanova gapirib, qachonki mahalla, oila va tarbiyachilar hamjihatlikda ish olib borsalar, davr ruhiga mos farzandlar tarbiyalanishi, jamiyatimizdagi har bir inson farzand tarbiyasiga masʼullik tuygʻusi bilan yoshdashishi zarurligini, ota-onalar farzand tarbiyasiga befarq boʻlmasligi kerakligini qayd etdi.

- Ularning har bir harakati va qiziqishini eʼtibordan chetda qoldirmay ogoh boʻlsak, bu borada koʻzlangan maqsadimizga erishamiz, -  dedi u.

Muzokaralarda soʻzga chiqqan ota-onalar farzandlari tarbiya topayotgan maskan xodimlariga oʻz minnatdorchiligini bildirdilar.

Yaqinda mazkur MTT tarbiyalanuvchilaridan ikki nafari Qoraqalpogʻiston Respublikasi Maktabgacha taʼlim vazirligi tomonidan oʻtkazilgan jajji rassomlar tanlovida faxriy yorliq bilan taqdirlanganidan ota-onalar mamnun boʻldilar.

Yigʻilish oʻzaro hamjihatlikda oʻtdi va tegishli qarorlar qabul qilindi.

Jumagul QOʻShJANOVA, mehnat faxriysi.