Amudaryo tumanida Xalqlar doʻstligi kuni keng nishonlandi

Oʻzbekiston azaldan turli millat va elat vakillari ahil, totuv va bir oila farzandlaridek yashab kelayotgan bagʻrikeng diyor sifatida butun dunyoga maʼlum va mashhurdir. Ushbu tabarruk zamindagi tinchlik, osoyishtalik va oʻzaro hurmat muhiti mamlakat taraqqiyotining, xalq farovonligining eng muhim poydevori hisoblanadi. Ana shunday buyuk qadriyatlarni oʻzida mujassam etgan va xalqimizning qon-qoniga singib ketgan mehr-oqibat, ahillik tuygʻularini yanada jonlantirish maqsadida, yurtimizda 30-iyul sanasi «Xalqlar doʻstligi kuni» sifatida nishonlanib kelinmoqda.

Joriy yilda ham ushbu sana munosabati bilan respublikamizning barcha goʻshalarida katta bayram tadbirlari, madaniy-maʼrifiy kechalar yuqori saviyada tashkil etildi. Xususan, Amudaryo tumanida ham millatlararo totuvlik, oʻzaro hurmat va birdamlik gʻoyalarini ulugʻlovchi, qalblarni ezgulikka chorlovchi «Doʻstlik festivali» katta tantana bilan, oʻzgacha shukuhda boʻlib oʻtdi.

Bayram tadbiriga tuman hokimi oʻrinbosari Jasur Yaxshimov, qator davlat va jamoat tashkilotlari rahbarlari, koʻpni koʻrgan duogoʻy nuroniylar, keng jamoatchilik vakillari hamda tumanning turli burchaklaridan tashrif buyurgan aholi vakillari jam boʻldi.

Tadbirning rasmiy qismida soʻzga chiqqanlar tomonidan bugungi kunda jonajon yurtimizda turli millat va elat vakillari oʻrtasidagi doʻstlik, hamjihatlik hamda oʻzaro hurmat muhitini yanada mustahkamlash, barchamiz uchun bebaho neʼmat boʻlgan tinchlik va osoyishtalikni koʻz qorachigʻidek asrab-avaylash borasida davlatimiz tomonidan amalga oshirilayotgan keng koʻlamli, ezgu ishlar alohida eʼtirof etildi.

Taʼkidlanganidek, bugungi kunda Oʻzbekistonda istiqomat qilayotgan barcha millat vakillari yagona maqsad — Vatanimizni yanada rivojlantirish, uning dunyo hamjamiyatidagi oʻrnini yuksaltirish yoʻlida hamjihatlikda fidokorona mehnat qilib, turli sohalarda juda yuqori va salmoqli natijalarga erishib kelmoqda.

Festival tuman Madaniyat boʻlimi iqtidorli sanʼatkorlari va badiiy havaskorlik jamoalarining chiqishlari bilan davom etdi. Ular ijrosidagi dilbar kuy-qoʻshiqlar, joʻshqin musiqiy chiqishlar hamda milliy qadriyatlarimizni, xalqlar oʻrtasidagi azaliy doʻstlikni tarannum etuvchi sahna koʻrinishlari bayramga yanada fayz va joziba bagʻishladi. Rang-barang milliy liboslardagi ijrochilarning chiqishlari, turli tillarda yangragan shoʻx taronalar tadbir ishtirokchilariga unutilmas lahzalarni hadya etdi.

Bunday bayramona va jozibador dasturlar ishtirokchilarning barchasiga koʻtarinki kayfiyat ulashib, ularning qalbidagi doʻstlik va birdamlik gʻoyalarini yanada mustahkamladi. Aynan mana shunday madaniy tadbirlar xalqimizning koʻp asrlik bagʻrikenglik anʼanalarini, millatlararo ahillik va oʻzaro hurmat tamoyillarini keng ommaga targʻib etishga, jamiyatimizdagi birlik va hamjihatlik muhitini har qachongidan ham mustahkamlashga xizmat qiladi.

Taʼkidlash joizki, «Xalqlar doʻstligi kuni» bayrami va uning doirasidagi «Doʻstlik festivali» nafaqat Amudaryo tumanida, balki butun yurtimiz boʻylab har yili ushbu sanada keng turda oʻtkazib kelinmoqda. Keng koʻlamda nishonlanayotgan ushbu umumxalq bayrami tadbirlari eng chekka va olis ovullardan, mahallalardan boshlab, yirik shaharlar va tumanlargacha qamrab olgan boʻlib, oʻziga xos xalq sayillari koʻrinishida davom etmoqda. Ushbu sayillarda milliy madaniy markazlar ham faol ishtirok etmoqda. Ular tomonidan tashkil etilgan koʻrgazmalarda har bir millatning oʻziga xos milliy taomlari, mohir rassom va hunarmandlarning qoʻl mehnati bilan yaratilgan amaliy sanʼat asarlari namoyish etilmoqda. Bu koʻrgazmalar turli madaniyatlarning goʻzal bir guldastaga aylanib, tomoshabinlar eʼtiboriga havola etilmoqda va eng asosiy boyligimiz boʻlgan yurtimiz tinchligini saqlashda, xalqlar doʻstligini, millatlararo totuvlikni yanada mustahkamlashda gʻoyat katta ahamiyat kasb etmoqda. Chunki tinchlik va ahillik bor joydagina taraqqiyot va farovonlik boʻladi.

Festival doirasidagi bayram tadbirining davomi taniqli xushovoz xonandalar ijrosidagi katta gala-kontsert dasturiga ulanib ketdi. Ochiq osmon ostida yangragan kuy-qoʻshiqlar tadbirga yigʻilgan yurtdoshlarimiz qalbida unutilmas xotiralar qoldirdi va mamlakatimizda hukm surayotgan doʻstlik, tinchlik va totuvlikning abadiyligini yana bir bor namoyon qildi.