11 NAFAR HAMYuRTIMIZGA “MEHR-SAXOVAT” KOʻKRAK NIShONI BERILDI

Hozirgi pandemiya sharoitida aholining ijtimoiy himoyaga muhtoj qatlamlarini har tomonlama qoʻllab-quvvatlash va ularga beminnat koʻmak berish borasidagi ishlarni umumxalq harakati darajasiga koʻtarishga katta hissa qoʻshgan, jamiyatimizda tinchlik-osoyishtalik, birlik va hamjihatlik muhitini mustahkamlashda faol ishtirok etib, begʻaraz homiylik yordami hamda ezgu ishlari bilan koʻpchilikka alohida oʻrnak boʻlayotgan yurtdoshlarimizni taqdirlash maqsadida Prezident farmoni bilan “Mehr-saxovat” koʻkrak nishoni taʼsis etilgan edi. Quvonarlisi shuki, tumanimizda ham 11 nafar hamyurtimiz ushbu koʻkrak nishoniga munosib deb topildi.

24-sentyabr kuni tuman hokimligi binosida tuman hokimi Sultonboy Yoʻldashev, hokim oʻrinbosarlari, boʻlimlar rahbarlari, va tumanimizning bir guruh faollari ishtirokida “Mehr-saxovat” koʻkrak nishonini topshirish marosimi boʻlib oʻtdi. Marosimda tuman hokimi nutq soʻzlab, ushbu mukofotga loyiq deb topilgan yurtdoshlarimizni samimiy qutladi.

Tuman hokimi oʻz soʻzida butun dunyoni larzaga solgan pandemiya davrida tumanimizda aholining ijtimoiy himoyaga muhtoj qatlamlarini qoʻllab-quvvatlashda oʻzining beminnat yordamini ayamay ogʻir kunlarda yelkadosh boʻlayotgan, mehr-muruvvat, xayr-saxovat koʻrsatayotgan hamyurtlarimizga oʻz minnatdorchiligini izhor etdi. Sinovli bu kunlar hademay ortda qolishini, hamjihatlikda ushbu ofatni yengib chiqishimiz muqarrarligini, ayni paytda karantin qoidalariga amal qilish, atrofdagilarga ham buni tushuntirish, ishsiz va ehtiyojmandlarni qoʻllab-quvvatlash lozimligini aytib oʻtdi. Shundan soʻng, “Mehr-saxovat” koʻkrak nishoni oʻz egalariga tantanali ravishda topshirildi.

Jumladan, muhtaram Prezidentimizning “Mehr-saxovat” koʻkrak nishoniga tumandagi “Usta Allayar” fermer xoʻjaligi boshligʻi Rajabbay Sultanov, “Beshbayev Qurbangʻali” fermer xoʻjaligi rahbari Qurbangʻali Beshbayev, “Qoraqalpoq mahsulotlari” masʼuliyati cheklangan jamiyati raisi Yerkin Rasulov, “Xoʻjakoʻl” fermer xoʻjaligi boshligʻi Xidirboy Xaydarovlar munosib koʻrildi.

Shuningdek, Sanitariya-epidemiyalogiya nazorati davlat inspektsiyasi Qoraqalpogʻistin Respublikasi boshqarmasi Amudaryo tumani filiali mudiri Durbek Bobojanov, “Qurilishxizmat” masʼuliyati cheklangan jamiyati raisi Bahodir Toʻraboyev, “Maqsud oʻgʻli Rahmatjon” masʼuliyati cheklangan jamiyati direktori Maqsud Abdullayev, “Xudaybergan ota” masʼuliyati cheklangan jamiyati rahbari Rustam Allakulovlar ham ushbu mukofotga loyiq deb topildilar.

Shu bilan birga Toshkent shahrida faoliyat yuritayotgan “Grand stroy” xususiy korxonasi rahbari Rashid Xudayberganov, “Amudaryo maxsus qurilish” masʼuliyati cheklangan jamiyati direktori oʻrinbosari Javlonbek Yoʻldashev hamda “Polvonboy ovuli” fermer xoʻjaligi raisi Mansur Xoʻjaahmedovlar ham oʻzlarining xayr-saxovat ishlari natijasida “Mehr-saxovat” koʻkrak nishoniga sazovor boʻldilar.

Taqdirlash marosimiga yigʻilganlar koʻkrak nishoni sohiblarini davlatimizning bu kabi yuksak eʼtibori hamda ragʻbati bilan samimiy tabrikladilar va yurtimiz boshiga tushgan ogʻir kunlarda kamarbasta boʻlgan yurtdoshlarimizning hayr-saxovat ishlari boshqalarga oʻrnak boʻlishini taʼkidlab, ularning kelgusidagi faoliyatlarida muvaffaqiyatlar tiladilar.

Xalqimizda “Savob ishni har kim, har kun qilishi kerak” degan ajoyib bir naql bor. Mana shu hikmatli soʻzlarga amal qilayotgan, sinovli kunlarda savobli ishlar boshida turib, oʻzgalarga namuna boʻlayotgan yurtdoshlarimizni ushbu mukofot bilan samimiy qutlaymiz.

Amudaryo tuman hokimligining Axborot xizmati.